ހިންނަވަރު ޕީޕީއެމްގެ ދެ ކައުންސިލަރުން އެމްޑީޕީއަށް
15 ސެޕްޓެމްބަރު 2018 | ހޮނިހިރު 03:34އިބޫ ވަނީ އަލަށް ގުޅުނު ފަރާތްތަކަށް ޝުކުރު އަދާކުރައްވާފައި
ޕީޕީއެމް އަށް ނިސްބަތްވާ ހިންނަވަރު ކައުންސިލަރަކު އެމްޑީޕީއަށް ސޮއިކުރެއްވުމަށް ފަހު އިބޫއާ ފޯމް ހަވާލުކުރައްވަނީ
ހިންނަވަރު ރަށު ކައުންސިލްގައި ހިމެނިވަޑައިގަންނަވާ ޕީޕީއެމްއަށް ނިސްބަތްވާ ދެ ކައުންސިލަރުން ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) އަށް ތާއިދު ކުރަން ނިންމަވައި، އެމްޑީޕީ އަށް ސޮއިކުރައްވައިފިއެވެ.
އިބޫގެ އުފަން ރަށުގައި ގުޅިފައިވާ ޕާޓީތަކުން ބޭއްވި ޖަލްސާގައި އެމްޑީޕީއަށް ސޮއިކުރެއްވީ ކައުންސިލް މެމްބަރު އަހުމަދު ރިޝްވާން އަދި އިބްރާހިމް އާތިފެވެ. ރިޝްވާނަކީ ދެ ދައުރެއްގައި އެމްޑީޕީ ކައުންސިލަރެއްގެ ގޮތުގައި ހުންނެވުމަށް ފަހު، މިހާރު ހިނގަމުންދާ ދައުރަށް ޕީޕީއެމް ޓިކެޓުގައި ނިކުންނަވައި އިންތިހާބު ކާމިޔާބު ކުރެއްވި ކައުންސިލަރެކެވެ. ރަށު ކައުންސިލްގެ ފަސް މެންބަރުންގެ ތެރެއިން މިހާރު އެމްޑީޕީގެ ދެ ކައުންސިލަރުން ތިއްބަވާ އިރު އަތޮޅު ކައުންސިލްގައި މިހާރު ތިއްބަވާ ހުރިހާ ކައުންސިލަރުންނަކީ ވެސް އެމްޑީޕީ އަށް ނިސްބަތްވާ މެންބަރުންނެވެ.
އިބޫ ވަނީ އެ ދެ ކައުންސިލަރުންނަށް ޝުކުރު އަދާ ކުރައްވާފައެވެ.
އެމްއޭސީއެލް ބޯޑުގައި ހިމެނިވަޑައިގެއްނެވި އަހުމަދު ޝަރީފް އަބްދުއްރަހްމާން ވެސް އިބޫ އަށް ތާއިދު ކުރައްވަން ނިންމަވައި، މަގާމުން އިސްތިއުފާ ދެއްވާފައެވެ. އަހްމަދު ޝަރީފަކީ ހިންނަވަރަށް ނިސްބަތްވާ ބޭފުޅެކެވެ. އޭނާ ވަނީ 2009 ވަނަ އަހަރުގެ ރައްޔިތުންގެ މަޖިލީހަށް އިބޫއާ ވާދަކުރައްވާފައެވެ. އިބޫ ވިދާޅުވީ އަހުމަދު ޝަރީފް އަބްދުއްރަހްމާން ސިޔާސީ ފިކުރު އެކަހެރިކޮށް ނުކުމެވަޑައިގެންނެވީ މި ގައުމު ސަލާމަތްކުރެއްވުމަށްޓަކައި ކަމަށެވެ.
އެމްޑީޕީއާ ގުޅިވަޑައިގެންނެވި ކައުންސިލަރަކާ އިބޫ ސަލާމްކުރައްވަނީ
