ކުލްސޫމްގެ ޖަނާޒާއަށް ނަވާޒު ޝަރީފާއި ދަރިކަނބަލުން ޖަލުން ނެރެނީ

އަންގާރަ ދުވަހު ނިޔާވި ޕާކިސްތާނުގެ ކުރީގެ ބޮޑުވަޒީރު ކުލްސޫމް ނަވާޒުގެގެ ޖަނާޒާއަށް ފިރިކަލުން ނަވާޒު ޝަރީފާއި ދަރިކަނބަލުން ޖަލުން ނެރުމަށް ހަމަޖެހިފައިވާ ކަމަށް ޚަބަރުތައް ބުނެފިއެވެ.

ކޮރަޕްޝަނުގެ މައްސަލައެއް ސާބިތުވެ 10 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ނަވާޒް ޝަރީފްގެ އަނބިކަނބަލުން ކުލްސޫމް ނަވާޒް އަވަހާރަވެފައި ވަނީ ކެންސަރު ބައްޔަށް ކޯމާގައި ފަރުވާ ހޯއްދަވަމުން ގެންދަވަނިކޮށް ލަންޑަންގައެވެ.

އެކަމަނާ އަވަހާރަވި އިރު ފިރިކަލުންގެ އިތުރުން ދަރިކަނބަލުން މަރިޔަމް ދަނީ ޖަލު ހުކުމް ތަންފީޒު ކުރައްވަމުންނެވެ.

ރޮއިޓާސް އިން ޕާކިސްތާނުގެ އިންފޮމޭޝަން މިނިސްޓަރު ފަވާދު ޗައުދްރީއާ ހަވާލާދީ ރިޕޯޓްކޮށްފައިވާ ގޮތުގައި ކުލްސޫމް އަވަހާރަވުމާ ގުޅިގެން ނަވާޒާއި ދަރިކަނބަލުން 12 ގަޑިއިރަށް ކުލްސޫމްގެ ޖަނާޒާއަށް ޖަލުން ނެރުއްވާނެއެވެ.

"ނަވާޒުގެ އާއިލާ އިން ވަނީ ޖަނާޒާއަށް އެމަނިކުފާނާއި ދަރިކަލުން ބައިވެރިކުރުމަށް އެދިލައްވާފައި، އެހެންކަމުން އެ ހުއްދަ ވަނީ ދީފައި،" އިންފޮމޭޝަން މިނިސްޓަރު ފަވާދު ޗައުދްރީ ވިދާޅުވިއެވެ.

ނަވާޒްގެ އަނބިކަނބަލުން ކުލްސޫމް

ނަވާޒް ޝަރީފްއާ ކުލްސޫމް ކައިވެނި ބައްލަވައިގެންފައިވަނީ 1971 ވަނަ އަހަރުއެވެ. އެ ކައިވެންޏަށް ވަނީ ހަތަރު ބޭފުޅުން ލިބިވަޑައިގެންފައެވެ. އެއީ ހަސަން، ހުސައިން، މަރިޔަމް އަދި އަސްމާއެވެ.

އޭގެ ތެރެއިން މަރިޔަމް ދަނީ ޖަލު ހުކުމް ތަންފީޒު ކުރައްވަމުންނެވެ. އުމުރުފުޅުން 68 އަހަރުގެ ނަވާޒް ޝަރީފާއި 44 އަހަރުގެ ދަރިކަނބަލުން މަރްޔަމް ނަވާޒް ޝަރީފް، ޖަލަށް ލުމަށް ހުކުމްކޮށްފައި ވަނީ އިނގިރޭސިވިލާތުގެ ލަންޑަނުން ހަތަރުގެ ބައްލަވައިގަތުމުގައި ކުރައްވާފައިވާ ޚަރަދުތަކާއި އާމްދަނީއާ ނުބައްދަލު ކަމަށް ކޯޓުގައި ސާބިތުވުމާ ގުޅިގެންނެވެ.