ޕާކިސްތާނުގެ ކުރީގެ ބޮޑުވަޒީރު ނަވާޒް ޝަރީފް އަދި އޭނާގެ ދަރިކަނބަލުން މަރިޔަމް ނަވާޒް ޝަރީފާއި ދެކޮޅަށް ޚިޔާނާތުގެ ދައުވާ އުފުލައިފި އެވެ.

ނަވާޒް ޝަރީފާއި ދަރިކަނބަލުން މަރިޔަމްގެ މައްޗަށް ޚިޔާނާތުގެ ދައުވާ އުފުލާފައިވަނީ، އިނގިރޭސިވިލާތުން ގެތަކެއް ބައްލަވައިގަންނަވާފައިވާކަން، ލީކުވެފައިވާ ޕެނަމާ ޕޭޕަރސްގެ ލިޔެކިޔުންތަކުން ފަޅާ އެރުމާއި ގުޅިގެންނެވެ. އެމައްސަލާގައި އޭނާގެ މައްޗަށް ވަނީ އާމްދަނީ އާއި މިލްކިއްޔާތު ހާމަކުރުމުގައި ޤާނޫނާއި ޚިލާފަށް އޮޅުވާލުމާއި ޚިޔާނާތްތެރިވުމުގެ ދައުވާ އުފުލާފައެވެ. މިމައްސަލަ ސާބިތުވެއްޖެނަމަ، އޭނާގެ މައްޗަށް ޖަލު ހުކުމެއް އަންނާނެ އެވެ.

ޚިޔާނާތުގެ މައްސަލައިގެ ތުހުމަތުތަކާއި ގުޅިގެން ޕާކިސްތާނުގެ ބޮޑުވަޒީރުގެ މަގާމަށް ޝަރުތު ހަމަނުވާ ކަމަށް ޕާކިސްތާނުގެ ސުޕްރީމް ކޯޓުން މިދިޔަ ޖުލައި މަހު ކުރި ހުކުމާއި ގުޅިގެން އޭނާ ވަނީ ބޮޑުވަޒީރުގެ މަގާމުން އިސްތިއުފާ ދެއްވާފައެވެ.

މިމައްސަލާގައި ނަވާޒް ޝަރީފަށް ބޮޑުވަޒީރުގެ މަގާމް ގެއްލުނު ނަމަވެސް، ޕާކިސްތާނުގައި ވެރިކަން ކުރާ ޕާކިސްތާން މުސްލިމް ލީގް-ނަވާޒް ޕާޓީގައި އަދިވެސް އޭނާގެ ނުފޫޒު އެބައޮތެވެ.

ނަވާޒް ޝަރީފާއި ދަރިކަނބަލުން މަރިޔަމް ނަވާޒް ޝަރީފްގެ އިތުރު މަރިޔަމްގެ ފިރިކަލުން މުޙައްމަދު ސަފްދަރުގެ މައްޗަށްވެސް މިމައްސަލާގައި ޕާކިސްތާނުގެ ނޭޝަނަލް އެކައުންޓަބިލިޓީ ބިއުރޯ (އެންއޭބީ) އިން ދައުވާ އުފުލާފައިވެއެވެ.

މިމައްސަލައިގެ ޝަރީޢަތުގެ އަޑުއެހުމަށް މަރިޔަމް އަދި ސަފްދަރު ހާޒިރުވި ނަމަވެސް، ނަވާޒް ޝަރީފް ކޯޓަށް ހާޒިރުވެވަޑައިގެންފައެއްނުވެއެވެ. ކެންސަރުގެ އާލާސްކަންފުޅަކަށް ފަރުވާ ހޯއްދަވަމުން ގެންދަވާ އެނބިކަނބަލުންނާއެކު އިނގިރޭސިވިލާތުގެ ލަންޑަންގައި ހުންނެވި ނަވާޒް ޝަރީފްގެ ބަދަލުގައި ކޯޓަށް ވަޑައިގެންފައިވަނީ ނަވާޒްގެ މަންދޫބެކެވެ.

ޝަރީޢަތުގެ އަޑުއެހުމުގައި މަރިޔަމް އާއި ސަފްދަރު އަދި ނަވާޒް ޝަރީފްގެ މަންދޫބުވެސް ވަނީ އެމީހުންގެ މައްޗަށް ކުރެވިފައިވާ ތުހުމަތުތަކަށް އިންކާރު ކުރައްވާފައެވެ.

ކޯޓު ރޫމުން ނިކުމެވަޑައިގެންނެވުމަށްފަހު މަރިޔަމް ވަނީ އެކަމަނާ އާއި ފިރިކަލުން އަދި ބައްޕާފުޅުގެ މައްޗަށް ކުރާ ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަމަށް ވިދާޅުވެފަ އެވެ. އަދި ބައްޕާފުޅު އެނބުރި ޕާކިސްތާނަށް ވަޑައިގަންނަވާނެ ކަމަށާއި، ކޯޓުގައި އޮތް މައްސަލަ އާއި ކުރިމަތިލާނީ ސާބިތުކަމާއިއެކުގައި ކަމަށް އެކަމަނާ ވިދާޅުވި އެވެ.

ޕެނަމާ ޕޭޕާރސް އިން 2016 ވަނަ އަހަރު އާއްމުވި ލިޔެކިޔުންތަކުން ވަނީ ޝަރީފްގެ ދަރިކަނބަލުންނާއި ދެ ދަރިކަލުންގެ ނަންފުޅުގައި އިނގިރޭސިވިލާތުގެ ބްރިޓިޝް ވާރޖިން އައިލެންޑްގައި އޮފްޝޯ ކުންފުނިތަކެއް ރެޖިސްޓަރ ކޮށްފައިވާ ކަމަށާއި، އެކުންފުނިތައް ބޭނުން ކޮށްގެން ލަންޑަނުން މަތީ ފަންތީގެ ފްލެޓްތަކެއް ބައްލަވައިގަންނަވާފައިވާކަން ހާމަވެފައެވެ.

މިމައްސަލަ ފަޅާއެރުމާއި ގުޅިގެން އޭރު ބޮޑުވަޒީރުގެ މަގާމުގައި ހުންނެވި ނަވާޒް ޝަރީފް، މަގާމުން ދުރު ކުރުމަށް ސުޕްރީމް ކޯޓުން ފުރަތަމަ ނިންމާފައެއްނުވެއެވެ. އޭގެ ބަދަލުގައި ސުޕްރީމް ކޯޓުން ވަނީ ނަވާޒް ޝަރީފްގެ އާއިލާގެ މުއްސަނދިކަން ދެނެގަތުމުގެ ތަހުގީގެއް ހިންގުމަށް އަމުރުކޮށްފައެވެ. ބޮޑުވަޒީރުގެ މަގާމަށް ނަވާޒް ޝަރުތުހަމަނުވާ ކަމަށް ސުޕްރީމް ކޯޓުން ނިންމާފައިވަނީ، ނަވާޒް ޝަރީފްގެ ޚިޔާނާތުގެ މައްސަލަ އެތަހުގީގަށް ސާބިތުވުމާއި ގުޅިގެންނެވެ. އަދި ސުޕްރީމް ކޯޓުން ވަނީ އެމައްސަލަ ތަހުގީގުކޮށް ޝަރީޢަތް ހިންގުމަށް އެންއެބީގެ މައްޗަށް އަމުރުކޮށްފައެވެ.

މީގެ އިތުރުން ސުޕްރީމް ކޯޓުން އެކުލަވާލި ވަކި ޕެނަލަކުން ވަނީ، ނަވާޒް ޝަރީފް ހާމަކުރައްވާފައިވާ މިލްކިއްޔާތައި މުއްސަނދިކަން، އޭނާގެ ހަގީގީ މުއްސަނދިކަމާއި ދިމާނުވާ ކަމަށާއި، މަރިޔަމް އަދި ނަވާޒްގެ ދެ ދަރިކަލުން ލަންޑަނުން ފްލެޓް ބައްލަވައިގަތުމަށް ބޭނުން ކުރެއްވި އޯފްޝޯ ކުންފުނިތަކުގެ ހިއްސާދާރުން އޮޅުވާލުމަށް ލިޔެކިޔުންތައް ފޯޖް ކޮށްފައިވާކަމުގެ ތުހުމަތު ކޮށްފައެވެ.

ޕާކިސްތާނުގެ ނޭޝަނަލް އެކައުންޓަބިލިޓީ ބިއުރޯ (އެންއޭބީ) އިން ބަލާ ނުފޫޒުގަދަ ސިޔާސީ ފަރާތްތަކާއި ދެކޮޅަށް ހުށަހެޅޭ މައްސަލަތައް ސާބިތުވާ ނިސްބަތް ކުޑަވުމާއި، އެފަދަ މައްސަލަތަކުގެ ތަހުގީގަށް ގިނަ އަހަރުތަކެއް ނަގައި މައްސަލަ ދިގުދެންމުން ފަދަ ކަންކަމާއި ގުޅިގެން އެންއޭބީ އަކީ "ދަތްނެތް" އިދާރާއެއްގެ ގޮތުގައި ގިނަ ބަޔަކު ދެކެއެވެ.

އެހެންނަމަވެސް މިމައްސަލާގައި ސުޕްރީމް ކޯޓުން ވަނީ އެންއޭބީގެ މައްޗަށް، މައްސަލަ ހަމަސް ދުވަހުގެ ތެރޭގައި ނިންމުމަށާއި، މައްސަލައިގެ ޝަރީއަތްތައް އޮކްޓޯބަރު މަހުގެ 26 ވަނަ ދުވަހުގެ ކުރިން ފެށުމަށް އަމުރުކޮށްފައެވެ.