ލާރިއަށް އައިޑީކާޑް ވިއްކުމަކީ ހުއްދަ ކަމެއް ނޫން:ޝައިޚް ޒައިދު
ރިޝްވަތަކީ ބޮޑުވެގެންވާ ލައުނަތް ހުރި ހަރާމް ކަމެއްކަން
ޝައިޚް ޒައިދު މިސްކިތުގައި ދީނީ ދަރުސް ދެއްވަނީ
ލާރިއަށް އައިޑީކާޑް ވިއްކުމަކީ ހުއްދަ ކަމެއް ނޫން ކަމަށް ދީނީ ޢިލްމުވެރިޔާ އައްޝައިޚް ޢަލީ ޒައިދު ވިދާޅުވެއްޖެވެ.
ޝައިޚް ޒައިދު މިހެން ވިދާޅުވެފައި މިވަނީ ރިޔާސީ އިންތިޚާބުގެ ވޯޓާ ގުޅުވައިގެން ބޮޑު އަގުގައި ބައެއް މީހުންގެ އައިޑީކާޑު ގަތުމާއި ވިއްކާ ކަމުގެ ވާހަކަ ދައްކަމުންދާ ދަނޑިވަޅެއްގައެވެ.
ޝައިޚް ޒައިދު ކުރައްވާފައިވާ ޓްވީޓެއްގައި ވިދާޅުވެފައިވަނީ ލާރިއަށް އައިޑީކާޑް ވިއްކުމަކީ ހުއްދަ ކަމެއް ނޫން ކަމުގައި އެންމެހާ ފަރާތްތަކުގެ މައުލޫމާތައް ޓަކައި ދަންނަވާ ކަމަށެވެ. އަދި ރިޝްވަތަކީ ބޮޑުވެގެންވާ ލައުނަތް ހުރި ހަރާމް ކަމެއްކަންވެސް ހަނދާންކޮށްދޭ ކަމަށެވެ.
ޝައިޚް ޒައިދުއަކީ ދީނުގައި އޮންނަ ގޮތް ފާޅުކަން ބޮޑުގޮތެއްގައި ހާމަކުރައްވާ ޝައިޚެވެ. ދާދިފަހުން ސަރުކާރުން ވަނީ ޝައިޚް ޒައިދު ދީނީ ދަރުސް ދެއްވުމުގެ ހުއްދަ ސަސްޕެންޑްކޮށްފައެވެ. ނަމަވެސް ފަހުން ވަނީ އެސަސްޕެންޝަން އުވާލާފައެވެ.
