އެމްޑީޕީގެ ދިދަތައްނަގާ ވީޑިއޯއެއް އަނެއްކާވެސް އާންމުވެއްޖެ
8 ސެޕްޓެމްބަރު 2018 | ހޮނިހިރު 14:16އެމްޑީޕީގެ ދިދަތައް މީހަކު ހަރުގަނޑަކަށް އަރައިގެން އުރުފާ އަދި ކަނޑާމުންދާ މަންޒަރު ފެނޭ
ލ.މާބައިދޫގައި ނަގާފައިހުރި އެމްޑީޕީގެ ދިދަތައް ނަގަނީ
މޯލްޑިވިއަން ޑިމޮކްރެޓިކް ޕާޓީގެ ދިދަތައްކެއް ނަގާ ވީޑިއޯއެއް އަނެއްކާވެސް އާންމު ވެއްޖެ އެވެ.
އެ ވީޑިއޯ ގައި ފެނިގެންދަނީ ލ. މާބައިދޫގައި ނަގާފައިހުރި އެމްޑީޕީގެ ދިދަތައް މީހަކު ހަރުގަނޑަކަށް އަރައިގެން ނައްޓާ އަދި ކަނޑަމުންދާ މަންޒަރެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި މި ވީޑިއޯގައި ދިދަތައް ނަގަމުންދަނީ ހައުސިން މިނިސްޓްރީގެ ސްޓާފެކެވެ.
މި ވީޑިއޯ އެޓޭޗްކޮށް ގަލޮޅު ދެކުނު ދާއިރާގެ މެންބަރު އަހުމަދު މަހުލޫފް ކޮށްފައިވާ ޓްވީޓެއްގައި ވަނީ ފާޅުގައި އެމްޑީޕީގެ ދިދަތައް ނަގަމުންދާ ކަމަށް ބުނެފައެވެ.
އަދި ކޮލަމާފުށީގެ 18 ޒުވާނުންގެ މައްޗަށް ޓެރެރިޒަމްގެ ދައުވާ ކުރިގޮތަށް ޕީޕީއެމްގެ މި ސަޕޯޓަރުންނަށް ދައުވާ ކޮށްފިންތޯ މަހުލޫފް ވަނީ ފުލުހުންނާއި ސުވާލު ކުރައްވާފައެވެ.
މިމަހުގެ އެއްވަނަ ދުވަހު ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ކޮލަމާފުއްޓަށް ވަޑައިގަންނަވާތީ ގުޅިފައިވާ ސިޔާސީ ޕާޓީތަކަށް ނިސްބަތްވާ ސަޕޯޓަރުން ދިދަ ފަތި ދެމުމާއި ބެނާ ހަރުކުރުމުގެ މަސައްކަތުގެތެރޭގައި ޕީޕީއެމްއަށް ނިސްބަތްވާ ފަރާތްތަކާ ދެމެދު ހިނގާދިޔަ ހަމަނުޖެހުންތަކުގައި ކޮލަމާފުށިން ވަނީ 18 ޒުވާނަކު ހައްޔަރުކޮށްފައެވެ. އަދި އެމީހުންގެ މައްޗަށް ކޮށްފައިވަނީ ޓެރެރިޒަމްގެ ތުހުމަތެވެ.
