ރައީސް ޔާމިންގެ ފޮޓޯފުޅަށް ކުލަ ޖެހި ކަމަށް ތުހުމަތުކޮށް ކޮނޑޭއިން މީހަކު ހައްޔަރުކޮށްފި
30 އޯގަސްޓު 2018 | ބުރާސްފަތި 20:39ރައީސް ޔާމިންގެ ފޮޓޯފުޅަށް ކުލަ ޖެހިކަމުގެ ތުހުމަތުގައި ހައްޔަރުކުރީ ކޮނޑޭއަށް އުފަން 38 އަހަރުގެ ޝަހުނީޒް އިބްރާހިމް
ގއ ކޮނޑޭ - އެ ރަށުގައި ހުރި ރައީސް ޔާމީންގެ ފޮޓޮއަކަށް ކުލަޖެހިކަމުގެ ތުހުމަތުގައި މީހަކު ވަނީ ހައްޔަރުކޮށްފައި
ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމްގެ ފޮޓޯފުޅަށް ކުލަޖެހިކަމަށް ތުހުމަތުކޮށް ގއ. ކޮނޑޭއިން މީހަކު ހައްޔަރުކޮށްފިއެވެ.
މިތުހުމަތުގައި ހައްޔަރުކުރީ ކޮނޑޭއަށް އުފަން, 38 އަހަރުގެ ޝަހުނީޒް އިބްރާހިމްއެވެ. އޭނާ އަކީ ގުޅިފައިވާ ޕާޓީތަކުގެ ކެންޕޭންގައި އިސްކޮށް ހަރަކާތްތެރިވާ މީހެކެއެވެ. އަދި އެމްޑީޕީގެ ވަރަށް ގަދަ އެކްޓިވިސްޓެކެވެ.
ޝަހުނީޒްގެ އެއްބަނޑު އެއްބަފާ މީހަކު ރާއްޖެ.އެމްވީއަށް މައުލޫމާތު ދެމުން ބުނީ ޝަހުނީޒް ހައްޔަރު ކުރީ ބުރާސްފަތި ދުވަހުގެ ހެނދުނު 10:30 ހާއިރު ކަމަށެވެ. އަދި ރައީސް ޔާމިންގެ ފޮޓޯފުޅަށް ކުލަ ޖެހި ކަމުގައި ތުހުމަތުގައި ޝަހުނީޒް ހައްޔަރު ކުރީ ޕީޕީއެމްގެ މަދު އެކްޓިވިސްޓުންތަކެއް ރިޕޯޓްކުރި މައްސަލައާ ގުޅިގެން ކަމަށެވެ.
އެމީހާ ބުނީ ޝަހުނީޒު ހައްޔަރު ކުރީ ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ހުވަދު އަތޮޅަށް ވަޑައިގަންނަވާތީ ކެންޕޭންގެ ހަރަކާތްތަކަށް ހުރަސް އެޅުމުގެ މަގުސަދު ކަމަށެވެ.
"ޝަހުނީޒު ހައްޔަރުކުރީ ކެންޕޭން ހަރަކާތްތަކަށް ހުރަސްއަޅަން. އޭނަ އަކީ ވަރަށް ފޯރީގަ ގުޅިފައިވާ ކެންޕޭންގައި ހަރަކާތްތެރިވާ މީހެއް. އިސްކޮށް އުޅޭ މީހުން އުފުރާލުން މަގުސަދަކީ" ޝަހުނީޒުގެ އާއިލާ މެންބަރު ބުންޏެވެ.
އޭނަ ބުނީ ގުޅިފައިވާ ޕާޓީތަކުގެ ކެންޕޭންގައި އިސްކޮށް ހަރަކާތްތެރިވާ މީހުން ހައްޔަރު ކުރި ނަމަވެސް މިހަރަކާތަށް އެއްވެސް ހުރަހެއް ނޭޅޭނެ ކަމަށާއި، ވަރަށް ޖޯޝާ ފޯރީގައި ކެންޕޭންގެ ހަރަކާތްތައް ކުރިއަށް ގެންދާނެ ކަމަށެވެ. އަދި މިކަމުން ރައީސް ޔާމިނަށް ލިބޭނެ ތާއީދެއް ނޯންނޭނެ ކަމަށާއި، ކޮނޑޭގެ މެޖޯރީޓީގެ ތާއީދު ވެސް ނުލިބޭނެ ކަމަށެވެ.
