އަދީބްގެ ބަލިހާލަތުން ރައީސް ޔާމީން ހޯއްދަވަނީ އުފާ: ނަޝްވާ
28 އޯގަސްޓު 2018 | އަންގާރަ 11:50އަދީބްގެ ބަލިހާލަތު ރައީސް ޔާމީން ދޮގު ކުރައްވާފައެއް ނުވޭ
ކުރީގެ ނައިބުރައީސް އަޙުމަދު އަދީބް، ސަރުކާރުގައި ހުންނެވި އިރު، ރައީސް ޔާމީންގެ އަރިހުގައި
ކުރީގެ ނައިބުރައީސް އަޙުމަދު އަދީބްގެ ސިއްޙީ ހާލަތު ރައީސް ޔާމީނަށް ރަނގަޅަށް އެނގިވަޑައިގަންނަވާނެ ކަމަށާއި، އެކަމުން އެމަނިކުފާނު ހޯއްދަވަނީ އުފާ ކަމަށް އަދީބްގެ އަނބިކަނބަލުން މަރިޔަމް ނަޝްވާ ވިދާޅުވެއްޖެއެވެ.
އަންގާރަ ދުވަހު ކުރެއްވި ޓްވީޓެއްގައި ނަޝްވާ ވިދާޅުވީ، އެކަށޭނަ ބޭސްފަރުވާ ނުދިނުމުގެ ސަބަބުން އަދީބްގެ ފުރާނަ ނުރައްކަލަށް ހުށަހެޅިފައިވާކަން ރައީސް ޔާމީނަށް ރަނގަޅަށް އެނގިވަޑައިގަންނަވާނެ ކަމަށެވެ. އަދި ފުރާނައަށް ނުރައްކާވާފަދަ ސިއްޙީ ބޮޑެތި މައްސަލަތަކެއް އަދީބަށް ދިމާވެފައިވާކަމާއިމެދު ރައީސް ޔާމީން ދެކޮޅު ނުހައްދަވާ ކަމަށާއި، އަދީބްގެ ހާލަތު ރައީސް ޔާމީން ދޮގުވެސް ކުރައްވާފައި ނުވާކަން ނަޝްވާ ވަނީ ފާހަގަ ކުރައްވާފައެވެ.
އަދި އަދީބްގެ ފުރާނަ ނުރައްކަލުގެ ތެރޭގައިވާކަން އެނގިވަޑައިގެން ހުންނަވައި، ރައީސް ޔާމީން އެކަމުން އުފާ ހޯއްދަވަމުން ގެންދަވާކަމަށް ނަޝްވާ ވިދާޅުވިއެވެ.
އަދީބްގެ ބަލިހާލަތާއި ގުޅޭގޮތުން ނަޝްވާ މިފަދައިން ޓްވީތް ކުރައްވާފައިވާއިރު، ދާދިފަހުން ތ. ގުރައިދޫގައި ވާހަކަފުޅު ދައްކަވަމުން ރައީސް ޔާމީން ވަނީ އަދީބްގެ އިންސާނީ ޙައްޤެއް ނޯންނާނެ ކަމަށް ވިދާޅުވެފައެވެ. ގުރައިދޫ ރައްޔިތުންނާ މުޚާތަބުކުރައްވައި ދެއްކެވި ވާހަކަފުޅުގައި ރައީސް ޔާމީން ވިދާޅުވީ ދައުލަތަށް ދައްކަންޖެހޭ ފައިސާއެއް އޮތް މީހެއްގެ އެއްވެސް އިންސާނީ ހައްގެއް ނޯންނާނެ ކަމަށެވެ.
"އަޅުގަނޑު އާންމުން ތަންތަނުގައިވެސް ބުނަން، އޭނާ (އަހުމަދު އަދީބު) ސަރުކާރުން ނެގި ފައިސާ އަނބުރާ ސަރުކާރަށް ދެއްކިއްޔާ ނޫނީ އޭނާ ރާއްޖޭން ބޭރަށްދާކަށް ހުއްދައެއް ނުދޭނަމޭ، އަޅުގަނޑާއި ދޭތެރޭ ހިނގާފައިވާ ކަމަކީ އަމިއްލަ ކަމެއް، އެކަމަކު ދައުލަތުން ނެގި ފައިސާ ދައުލަތަށް ދޭށޭ އަޅުގަނޑު މިބުނަނީ، ދައުލަތުން ނެގި ފައިސާ އަނބުރާ ދިނިއްޔާ ނޫނިއްޔަކާ ކިތަންމެ ބަލިވިޔަސް އޭނާގެ އިންސާނީ ޙައްގެއް އޮންނާނެ ކަމަށް އަޅުގަނޑު ޤަބޫލެއް ނުކުރާނަން" ރައީސް ވިދާޅުވެފައި ވެއެވެ.
ރައީސް ޔާމީން މިފަދައިން ވިދާޅުވި ނަމަވެސް، ދައުލަތުގެ އެއްވެސް މުއައްސަސާއަކަށް އެއްވެސް އަދަދަކަށް ފައިސާއެއް ދެއްކުމަށް ރައްޖޭގެ އެއްވެސް ކޯޓަކުން ޙުކުމެއް ކޮށްފައެއް ނުވެއެވެ.
ސަރުކާރުން އަދީބްގެ ބޭސްފަރުވާއަށް ތަކުރާރުކޮށް ހުރަސްއަޅަމުންދާއިރު، އަދީބްގެ ހަށިގަނޑުގައި އުފެދިފައިވާ ސިސްޓުތަކެއް ކެންސަރަށް ބަދަލުވެދާނެކަމަށް ބެލެވޭތީ އަދީބް ކެންސަރަށް ސްކްރީން ކުރުމަށް މީގެ ތިން އަހަރެއްހާ ދުވަސްކުރިން ޑޮކްޓަރު ލަފާދެއްވާފައި ވީނަމަވެސް އެ ޓެސްޓް އަދިވެސް ހަދާފައެއް ނުވެއެވެ. އަދި އޭގެ ފަހުން އަދީބަށް ގްލޮކޯމާ ކިޔާ ލޮލުގެ ބައްޔެއް ޖެހި، ލޮލުގެ ފެނުން ގެއްލެމުންދާއިރު، އެ ބައްޔަށްވެސް މިހާތަނަށް ފަރުވާ ދީފައެއް ނުވެއެވެ.
