ރައީސް މައުމޫނުގެ ޚިދުމަތަށް ކޫރުން އެޅޭ ކަހަލަ ވާހަކަ ނުދެއްކެވުމަށް ރައީސް ޔާމީން އިލްތިމާސްކުރައްވައިފި
28 އޯގަސްޓު 2018 | އަންގާރަ 07:59ރައީސް މައުމޫނަކީ ރާއްޖެ ތަރައްގީ ކުރެއްވި ބޭފުޅެއް
ރައީސް އަބްދުﷲ ޔާމީން ޖަލްސާއެއްގައި ވާހަކަ ދައްކަވަނީ
ކުރީގެ ރައީސް އަދި ރައީސް އަބްދުﷲ ޔާމީންގެ އެއްބަފާ ބޭބޭފުޅު މައުމޫން އަބްދުލް ގައްޔޫމުގެ ޚިދުމަތްތަކަށް ކޫރުން އެޅޭ ކަހަލަ ވާހަކަތައް ނުދެއްކެވުމަށް ރައީސް ޔާމީން އެދިވަޑައިގެންފިއެވެ.
ރ. ދުވާފަރުގައި ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ އެމަނިކުފާނު އިންނަވާ ޖަލްސާތަކުގައި ވާހަކަ ދައްކަވާ އެއްވެސް ބޭފުޅަކު ރައީސް މައުމޫނަށް އިހާނެތި ބަހެއް ނުބުނުމަށާއި ރައީސް މައުމޫނުގެ ހިދުމަތުގައި ކޫރުމެއް އެޅޭ ފަދަ ބަހެއް ވެސް ނުބުނުމަށް އިލްތިމާސް ކުރައްވާ ކަމަށެވެ.
"އެމަނިކުފާނަކީ ރާއްޖެއަށް ޚިދުމަތްތެރި ބޭފުޅެއް. ރައީސް މައުމޫނަކީ ރާއްޖެ ތަރައްގީ ކުރެއްވި ބޭފުޅެއް. ރައީސް މައުމޫނަކީ ދުވާފަރު ވެސް ތަރައްގީ ކުރެއްވި ބާނީ. އެހެންވީމާ ރައީސް މައުމޫނަކީ އިގްތިސޯދީ ކުރިއެރުން ވެސް އަދި އިޖުމާއީ ހަމަޖެހުން ވެސް އަދި ތައުލީމީ ދާއިރާ ވެސް އަޅުގަނޑުމެން ހީނުކުރާ ހިސާބަށް ކުރިއަށްގެންގޮސް ދެއްވި ބޭފުޅެއް. ޚިދުމަތްތަކެއް ކޮށްދެއްވި ބޭފުޅެއް،" ރައީސް ވިދާޅުވިއެވެ.
ރައީސް ޔާމީން މިހެން ވިދާޅުވީ އެ ޖަލްސާގައި އެންވަޔަރަމެންޓް މިނިސްޓަރ ތޯރިގު ދެއްކެވި ވާހަކަތަކަކަށް އިޝާރާތް ކުރައްވައެވެ.
ތޯރިގު ވިދާޅުވީ ރައީސް މައުމޫނުގެ ވެރިކަމުގައި ވެފައިވާ ޚިޔާނާތްތައް ރައީސް ނަޝީދުގެ ވެރިކަމުގައި ބަލާފައި ނުވާ ކަމަށެވެ. އަދި ރައީސް ޔާމީންގެ އެއްބަފާ ބޭބޭފުޅު މައުމޫނަށް ރާއްޖެ ތަރައްގީ ނުކުރެއްވުނު ކަމަށް ވަނީ ވިދާޅުވެފައެވެ.
ރައީސް ޔާމީން ވިދާޅުވީ ރައީސް މައުމޫނުގެ ވެރިކަމަށް ވުރެ ރައްޔިތުންގެ އުންމީދުތައް އިތުރު ވެގެން ހިނގައްޖެ ކަމަށާއި މި ތަރައްގީ އާއި އުންމީދާ އެކީގައި ބޮޑެތި ކަންކަމަށް ރައްޔިތުން އުންމީދުކުރާ ކަމަށެވެ. އަދި އެކަންކަން ފުރިހަމަކޮށްދޭ ބޭފުޅަކީ ރައީސް ޔާމީން ކަމަށް އެމަނިކުފާނު އަމިއްލަފުޅަށް ވިދާޅުވިއެވެ. މިނިސްޓަރު ތޯރިގު ވިދާޅުވާން އެ އުޅުއްވީ އެ ވާހަކަ ކަމަށް ދެކިވަޑައިގަންނަވާ ކަމަށް ވެސް ރައީސް ޔާމީން ވިދާޅުވިއެވެ.
ރައީސް މައުމޫނުގެ ޚިދުމަތްތަކަށް ކޫރުން އެޅޭ ކަހަލަ ވާހަކަތައް ނުދެއްކެވުމަށް ރައީސް ޔާމީން އިލްތިމާސްކުރެއްވި އިރު ރައީސް މައުމޫނު ޖަލަށް ލާފައިވަނީ މިސަރުކާރުން ފެބްރުއަރީ 5 ވަނަ ދުވަހު ކުއްލި ނުރައްކަލުގެ ހާލަތު އިއުލާނުކޮށް އެމަނިކުފާނު ހައްޔަރު ކުރުމަށް ފަހު، ފޯނު ނުދެއްވި ކަމަށް ބުނެ އަދުލު އިންސާފަށް ހުރަސްއެޅިކަން ސާބިތުކޮށް އެއް އަހަރާއި ހަތް މަހުގެ ޖަލު ހުކުމެއް ވަނީ އިއްވާފައެވެ.
