މުވައްޒަފުން ލައްވާ ރައީސް ޔާމިންގެ ކެންޕޭންގެ މަސައްކަތް ކުރުވާ މައްސަލަ ފެންމަތިވެއްޖެ
28 އޯގަސްޓު 2018 | އަންގާރަ 04:43ދިދަ ދެމުމާއި ޕޯސްޓަރުތައް ހަރުކުރުމުގައި އުޅެން ޖެހެނީ ޕަބްލިކް ވޯރކްސްގައި މަސައްކަތްކުރާ މުވައްޒަފުން
ހުޅުމާލޭގައި ދިދަފަތި ދެމުމަށް އެޗްޑީސީގެ ވެހިކަލްތަކާއި މުވައްޒަފުން ބޭނުންކުރަނީ: ދައުލަތުގެ އެހެން އިދާރާތަކުން ވެސް ވަނީ ރައީސް ޔާމީންގެ ކެމްޕެއިން އަށް މީހުން ދޫކޮށްފައި
ލ. ފޮނަދޫގައި ޕަބްލިކް ވޯރކްސްގައި މަސައްކަތް މުވައްޒަފުން ލައްވާ ރައީސް އަބްދުﷲ ޔާމީންގެ ކެންޕޭންގެ މަސައްކަތް ކުރުވާ މައްސަލަ ފެންމަތިވެއްޖެއެވެ.
ރާއްޖެއެމްވީއަށް މައުލޫމާތު ދެމުން ޕަބްލިކް ވޯކްސްގައި މަސައްކަތްކުރާ މުވައްޒަފަކު ބުނީ ރިޔާސީ އިންތިޚާބަށް ކެންޕޭން ކުރުމަށް ހިންގާ ހަރަކާތްތައް އިންތިޒާމް ކުރުމުގައި އުޅެން ޖެހެނީ ޕަބްލިކް ވޯރކްސްގައި މަސައްކަތްކުރާ މުވައްޒަފުން ކަމަށެވެ.
އެގޮތުން މަގުތަކުގައި ދިދަ ދެމުމާއި ޕޯސްޓަރުތައް ހަރުކުރުމުގައި މަސްއޫލުވެ އުޅެންޖެހޭ ކަމަށް އޭނާ ބުންޏެވެ.
"ޕީޕީއެމުން ޖަގަހަ ހުޅުވި އެކަމުގައި މިއުޅެންޖެހެނީ. މީ ދެން ވަރަށް އުނދަގޫވާ ކަމެއް. ވާޒީފާގައި ކުރަން ޖެހޭ މަސައްކަތަށް ވެސް ނުކުރެވޭ. އެކަމަކު ވަޒީފާގެ ބިރަށް ދެން އުޅެނީ. މިތާ މުވައްޒަފުން ވަރަށް ޝަކުވާ ވެސް ކުރާނެ،" އެމީހާ ބުންޏެވެ.
ޕަބްލިކް ވޯކްސްގައި މަސައްކަތްކުރާ އެ މީހާ ބުނީ ޕީޕީއެމްގެ ކެންޕޭން މަސައްކަތްކުރުމުގެ އިތުރަށް ވަޒީފާގެ ގޮތުން އެ ދުވަހެއްގައި ކުރަން ޖެހޭ މަސައްކަތް ވެސް ކުރަން ޖެހޭ ކަމަށެވެ. އަދި ގިނަ ފަހަރަށް މަގުތަކުގައި ދިދަ ދަމަން ނުކުންނަން ޖެހެނީ ދަންވަރު ކަމަށާއި އެހެންކަމުން ވަރަށް އުނދަގޫތައް ކުރިމަތިވާ ކަމަށް އޭނާ ބުންޏެވެ.
މުޅި ދުވަހު އުޅެން ޖެހެނީ މަސައްކަތުގައިކަން ފާހަގަކޮށް އެ މީހާ ބުނީ ބުރަ މަސައްކަތް ކުރުމަށް ފަހު ބޯނެ ފެން ނުހުންނަ ކަމަށާއި، ފެން ބޯންޖެހެނީ ވެސް އަމިއްލަ އަށް ގަނެގެން ކަމަށެވެ.
އެކި ފަހަރު މަތިން މި މައްސަލަ ކަމާބެހޭ ފަރާތްތަކަށް ހުށަހެޅި ނަމަވެސް ހައްލު ލިބިފައި ނުވާ ކަމަށް އެމީހާ ބުންޏެވެ.
ފޮނަދޫގައި ތާރުއަޅަގެން ޒަމާނީ ފެންވަރަށް ތަރައްގީކުރާ މަގުގެ މަސައްކަތް ކުރަނީ ޕަބްލިކް ވޯރކްސްގައި މަސައްކަތް ކުރާ މީހުންނެވެ. އެހާ ބުރަކޮށް އުޅެމުން އެ މަސައްކަތްކޮށްފައި ރައީސް ޔާމީނުގެ ކެމްޕެއިން މަސައްކަތްތަކުގައި އުޅެން ޖެހުމުން ހަމަ ނިދި ވެސް ނުލިބޭ ކަމަށް ވެސް އޭނާ ބުންޏެވެ.
ފޮނަދޫގެ އިތުރުން އެހެން ބައެއް ރަށްރަށުގައި ސަރުކާރުގެ ކުންފުނިތަކާއި މުވައްޒަފުން ބޭނުންކޮށްގެން ރައީސް އަބްދުﷲ ޔާމީނަށް ކެމްޕެއިން ކުރުމުގެ މަސައްކަތް ދަނީ ކުރަމުންނެވެ. އަދި ސްޓެލްކޯ އާއި ފެނަކަ ފަދަ ބައެއް ކުންފުނިތަކުން ރަސްމީ ގަޑީގައި އޮފީހުގައި ސޮއިކޮށްލުމަށް ފަހު ރައީސް ޔާމީންގެ ކެމްޕެއިން އޮފީހަށް ނުކުންނަން ޖެހޭ ޝަކުވާ ވެސް ވަނީ ބޮޑުވެފައެވެ. މީގެ އިތރުން ހުޅުމާލޭގައި އެޗްޑީސީގެ ވަސީލަތްތަކާއި މުވައްޒަފުން ބޭނުންކޮށްގެން ދިދަފަތި ދެމުމާއި އެ ނޫން ވެސް އެތައް ކަމެއް ދަނީ ކުރުވަމުންނެވެ. ޕީޕީއެމްގެ ނާއިބު ލީޑަރު އަބްދުއްރަހީމް އަބްދުﷲ ވެސް ވިދާޅުވެފައި ވަނީ ރައީސް ޔާމީންގެ ކެމްޕެއިންގައި ސަރުކާރުގެ ކުންފުނިތަކާއި މުއައްސަސާތަކުގެ ވަސީލަތްތަކާއި މުވައްޒަފުން ބޭނުންކުރާނެ ކަމަށެވެ.
