ރައީސް މައުމޫނަށް ބޭނުންވާ ސިއްޙީ ޚިދުމަތެއް ލިބިދިނުމުގައި އިހުމާލު ވެފައެއް ނުވާނެ: ކަރެކްޝަންސް
ކަންތައްތައް ހަމަޖެހިފައިވަނީ ދަތިކަމެއްނެތި އުޅުއްވެވޭގޮތަށް
ރައީސް މައުމޫން ޖަލުން ގެނެސް މާލެއަށް ބާލަނީ
ޖަލުގައި ހައްޔަރުކޮށްފައިވާ ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމަށް ބޭނުންވާ ސިއްޙީ ޚިދުމަތެއް ލިބިދިނުމުގައި އިހުމާލުވެފައި ނުވާނެ ކަމަށް މޯލްޑިވްސް ކަރެކްޝަނަލް ސަރވިސްއިން ބުނެފިއެވެ.
ކަރެކްޝަނަލް ސަރވިސްއިން ނެރުނު ބަޔާނެއްގައި ބުނެފައިވަނީ ކުރީގެ ރައީސް މައުމޫން ޢަބްދުލް ޤައްޔޫމް މާފުށީ ޖަލަށް ގެންދެވުނީންސުރެ، އެމަނިކުފާނުގެ ހުރިހާ ކަމެއްވަނީ އެމަނިކުފާނުގެ އުމުރާއި ބަލި ޙާލަތާއި ގުޅިގެން ޚާއްޞަ އުސޫލެއްގެ ދަށުން ހަމަޖައްސާފައި ކަމަށާއި އެމަނިކުފާނު ދިރިއުޅުއްވުމުގެ ކަންތައްތައް ހަމަޖެހިފައިވަނީ ދަތިކަމެއްނެތި އުޅުއްވެވޭގޮތަށް ތައްޔާރުކޮށްފައިވާ ވަކި ތަނެއްގައި ކަމަށެވެ. އަދި އެމަނިކުފާނުގެ ޙާލުކޮޅު ބައްލަވައި، އެހީތެރިވެވަޑައިގެން ދެއްވުމަށްޓަކައި އެމަނިކުފާނުގެ އަނބިކަނބަލުންނަށް ކޮންމެ ދުވަހަކުވެސް ވަޑައިގަތުމުގެ ފުރުސަތު ދެވިފައިވާ ކަމަށާއި ހުރިހާ ވަގުތެއްގައިވެސް އެމަނިކުފާނުގެ އަރިހުގައި މީހަކު ބެހެއްޓިފައި ހުންނާނެ ކަމަށް ކަރެކްޝަނުން ވަނީ ބުނެފައެވެ.
ކަރެކްޝަނުން ބުނީ ރައީސް މައުމޫންގެ އާލާސްކަންފުޅަށް ބޭނުންވާ ޑޮކްޓަރުންނާއި އަދި ބޭހުގެ ޚިދުމަތްތައް ވަނީ ހަމަޖައްސާފައި ކަމަށާއި އެއްވެސް ޙާލެއްގައި އެމަނިކުފާނަށް ބޭނުންވާ ސިއްޙީ ޚިދުމަތެއް ލިބިދިނުމުގައި އިހުމާލު ވެފައެއް ނުވާނެ ކަމަށެވެ.
ކަރެކްޝަނަލް ސަރވިސްއިން މިގޮތައް ބަޔާނެއް ނެރެފައިވަނީ ރައީސް މައުމޫންގެ ސިއްޙީ ހާލުކޮޅާ ބެހޭގޮތުން އެމަނިކުފާނުގެ ޤާނޫނީ ވަކީލު ކުރައްވާފައިވާ ތުހުމަތުތަކާ ބެހޭ ގޮތުން ކަމަށް ކަރެކްޝަންސްއިން ވަނީ ބުނެފައެވެ.
