އިންޑިއާގެ ނިއުދިއްލީ އާއި ސިންގަޕޫރުގެ އިތުރުން 11 ތަނެއްގައި ވޯޓްފޮށި ނުބަހައްޓަން ނިންމައިފި!

ސެޕްޓެމްބަރު މަހުގެ 23 ވަނަ ދުވަހު ބާއްވާ ރިޔާސީ އިންތިޚާބުގައި އިންޑިއާގެ ނިއުދިއްލީ އާއި ސިންގަޕޫރުގެ އިތުރުން 11 ތަނެއްގައި ވޯޓްފޮށި ނުބަހައްޓަން ނިންމައިފިއެވެ.

އިލެކްޝަންސް ކޮމިޝަނުން ހޮނިހިރު ދުވަހު ކޮށްފައިވާ އިއުލާނެއްގައި ބުނެފައިވަނީ، ރާއްޖެއިން ބޭރުގައި ވޯޓުފޮށި ބަހަށްޓާނެކަމަށް އިޢުލާނުކޮށްފައިވާ 7 ތަނުގެ ތެރެއިން ކޮމިޝަނުން ކަނޑައަޅާފައިވާ ޢަދަދަށް މަދުވެގެން 200 މީހުން ރަޖިސްޓަރީކޮށްފައި ނުވާތީ އިންޑިއާގެ ނިއުދިއްލީއާއި، ސިންގަޕޫރުގައި ވޯޓްފޮށި ނުބެހެއްޓުމަށް ނިންމީ ކަމަށެވެ.

Advertisement

މީގެ އިތުރުން 9 ރިސޯޓެއްގައިވެސް ވޯޓްފޮށި ނުބެހެއްޓުމަށް އެ ކޮމިޝަނުން ވަނީ ނިންމާފައެވެ. ސަބަބެއްކަމަށް އެ ކޮމިޝަނުން ބުނީ، އިންތިޚާބުގައި ވޯޓުފޮށި ބަހަށްޓާނެކަމަށް އިޢުލާނުކޮށްފައިވާ 44 ރިސޯޓުގެ ތެރެއިން ކޮމިޝަނުން ކަނޑައަޅާފައިވާ ޢަދަދަށް މަދުވެގެން 100 މީހުން ރަޖިސްޓަރީކޮށްފައި ނުވާތީ ކަމަށެވެ. އެގޮތުން ވޯޓްފޮށި ނުބެހެއްޓުމަށް ނިންމާފައިވަނީ، އަދާރަން ސިލެކްޓް ހުދުރަންފުށި (ކ. ޅޮހިފުށި)، ވައްކަރު މޯލްޑިވްސް (ބ.ވައްކަރު)، އަމިއްލަފުށި އެންޑް ކޯސްޓްލައިން ރެސިޑެންސް (ބ.ފިނޮޅަސް)، އެޓްމޮސްފިއަރ ކަނިފުށި މޯލްޑިވްސް(ޅ. ކަނިފުށި) ، ކޮކޫން މޯލްޑިވްސް (ޅ. އޫކޮޅު ފިނޮޅު)، ކޮންސްޓަންސް ހަލަވެލި ރިސޯޓު (އއ. ހަލަވެލި)، އަމާރި ހަވޮއްޑާ މޯލްޑިވްސް (ގދ. ހަވޮޢްޑާ)، ކަނުހުރާ (ޅ. ކަނުހުރާ)، ރޮބިންސަން ކްލަބް ނޫނު(ނ. އޮރިވަރު) ގައެވެ.

އަދި ސިނާއީ މަސައްކަތް ކުރާ ދެ ރަށް ކަމުގައިވާ ފެލިވަރާއި ކައްދޫގައިވެސް 100 މީހުން ހަމަވާ ވަރަށް ރަޖިސްޓްރީކޮށްފައި ނުވާތީ އެ ދެ ރަށުގައިވެސް ވޯޓްފޮށި ނުބެހެއްޓުމަށް ނިންމާކަމަށް އެ ކޮމިޝަނުން ވަނީ ބުނެފައެވެ.

އިލެކްޝަންސް ކޮމިޝަނުން ވަނީ، މި ވޯޓުފޮށިތަކަށް ރީ-ރަޖިސްޓަރީ ވެފައިވާ މީހުން އެމީހަކު ރަޖިސްޓަރީ ވެފައިވާތަން ނޫން އެހެންތަނެއްގައި ވޯޓުލުމަށް ރީ-ރަޖިސްޓަރީ ކުރުމަށް ބޭނުންވާނަމަ، މި އޮގަސްޓް މަހުގެ 27 އިން 29 އަށް ކޮންމެ ދުވަހެއްގެ ހެނދުނު 08:30 އިން ހަވީރު 06:00 އަށް ރީ-ރަޖިސްޓަރީ ކުރުމުގެ ފުރުޞަތު ހުޅުވާލާފައެވެ.