މޯލްޑިވްސް ކަރެކްޝަން ސާރވިސް އިން ކުރީގެ ރައީސް މައުމޫން އަބްދުލްގައްޔޫމަށް ކުރިމަތިކުރާ ކަންކަމަކީ ޓޯޗާރގެ އަމަލުތަކެއް ކަމަށް އެމަނިކުފާނުގެ ދިފާއީ ވަކީލުންގެ ޓީމުގައި އިސްކޮން މަސައްކަތް ކުރައްވަމުން ގެންދަވާ ހުސެއިން ޝަމީމް ވިދާޅުވެއްޖެއެވެ.

ރާއްޖެޓީވީގައި ވާހަކަދައްކަވަމުން ޝަމީމް ވިދާޅުވީ ރައީސް މައުމޫނަށް ޖެހިވަޑައިގެންފާއިވާ އާލާސްކަންފުޅުގެ ސަބަބުން އެއްތަނުން އަނެއްތަނަށް ވަޑައިގަތުން ޑޮކްޓަރު މަނާ ކޮށްފައިވާ ކަމަށާއި، ބޭސް ފަރިއްކުޅުއްވުމަށް ފަހު 48 ގަޑިއިރު ވަންދެން ހަރަކާތްތެރިވެ ނޫޅެ ތަނެއްގައި އޮންނަވަންޖެހޭ ކަމަށެވެ. ޝަމީމް ވިދާޅުވީ ޑޮކްޓަރުން ލަފަޔާ ދެކޮޅަށް ކަރެކްޝަނުން އަމަލުކުރާ ކަމަށާއި، މިއީ ހިތާމަ ހުރި ކަމެއް ކަމަށެވެ.

ރައީސް މައުމޫންގެ ސިއްހީހާލުކޮޅު އެނގި ތިބެ މިގޮތަށް އެމަނިކުފާނު ތެޅުވުމަކީ ޓޯޗާރކުރުންކަން ފާހަގަކުރައްވައި ޝަމީމް ވިދާޅުވީ މިއީ ރައީސް މައުމޫނާއި، އެމަނިކުފާނުގެ އާއިލާއަށް ތުރާ ކުރުމުގެ އިތުރުން ކުރާ ޖެއްސުން ކުރުމުގެ އަމަލެއް ކަމަށެވެ.

"އެގޮތަށް ލަފާ ދެއްވީމަ އަޅުގަނޑުމެންނަކަށް ނޭނގެ ކަރެކްޝަން ބޭފުޅުން ކިހިނެއް ކަމެއް އެލަފާ ކިޔުއްވުނީކީއެއް. ކަރެކްޝަން ބޭފުޅުންނަށް ގަބޫލުކުރެއްވުނީ އެހެންވީމަ އެމަނިކުފާނު ތަންތަނަށް ދުއްވަންވީއޭ. ތަންތަނަށް ބަދަލުކުރަންވީއޭ،" ޝަމީމް ވިދާޅުވިއެވެ.

ޝަމީމް ވިދާޅުވީ ރައީސް މައުމޫންގެ ސިއްހީހާލުކޮޅު ގޯސްވުމުން ގެންދަން ޖެހޭނީ ދޫނިދޫއަށް ނޫން ކަމަށާއި، އެމަނިކުފާނުގެ ގެންދަންޖެހޭނީ ސިއްހީ ފަރުވާދޭ މަރުކަޒަކަށް ކަމަށެވެ.

ޝަމީމް ވިދާޅުވީ ފާއިތުވި 24 ގަޑައިރު ތެރޭގައި ރައީސް މައުމޫން ބެހެއްޓެވިތަނެއް ކަށަވަރު ނުވާ ކަމަށާއި، އާއިލާއަށް އެއްވެސް މައުލޫމާތެއް ކަރެކްޝަނުން ހިއްސާކޮށްފައިނުވާ ކަމަށެވެ. ރައީސް މައުމޫންގެ ސިއްހީފަރުވާއަށް އިހުމާލުވާ މައްސަލަ އެތަކެއް ފަހަރުމަތިން ހިއުމަންރައިޓްސް ކޮމިޝަނަށް ހުހަޅާފައިވާ ކަމަށާއި، ނަމަވެސް މައްސަލައަށް ވާ ގޮތް ނޭނގޭ ކަމަށް އޭނަ ވިދާޅުވިއެވެ.

"ހިއުމަން ރައިޓްސްއަށް ހުށަހަޅާ މައްސަލަ އަރަނީ އުޑަށް ކަމެއް ބިން ފަޅާފައި އަޑިއަށް ދަނީ ކަމެއް ނޭނގެ. މިމައްސަލައަށް ވާގޮތެއް އަޅުގަނޑުމެންނަށް ސާފެއް ނުވޭ. އެބޭފުޅުން މިބައްލަވަނީ ތިމައްސަލަ މިދަނީ ބަލަމުންނޭ މި ނޫން ޖަވާބެއް ނުދޭ. މިހާރު ނެތް އިތުބާރެއް. އެހެން ގައުމުތަކުގައި މަސައްކަތް ކުރާ ގޮތަކަށް ނޫން ރާއްޖޭގެ މިހިއުމަން ރައިޓްސްއިން މަސައްކަތް ކުރަނީއެއް. ވަޒީފާއެއް އަދާ ކުރާ އުސޫލުން. ޒިންމާ ނަގާތަނެއް ނުފެނޭ،" ޝަމީމް ވިދާޅުވިއެވެ.

ރައީސް މައުމޫންގެ އާއިލާއިން ބުނާ ގޮތުގައި، އެމަނިކުފާނަށް ވަނީ ވެއްޓިވަޑައިގަތުމުގެ އާލާސްކަންފުޅަކާ ކުރިމަތިވެފައެވެ. އެހެންވެ އެމަނިކުފާނު އެކަހެރިކޮށް ނުހުންނެވުމަށް ވެސް ޑޮކްޓަރުން ވަނީ ލަފާ ދީފައެއެވެ.

ރައީސް މައުމޫން ހައްޔަރުކޮށް، ހުކުމެއް އިއްވާފައި ވަނީ ފެބްރުއަރީ އެކެއްގައި ސުޕްރީމް ކޯޓުން ނެރުނު އަމުރާ ގުޅިގެން ކުއްލި ނުރައްކަލުގެ ހާލަތު އިއުލާންކޮށް ހިންގި ތަހުގީގަކަށް ފަހުއެވެ. އެ އަމުރާ ގުޅިގެން އެމަނިކުފާނަށް ޓެރަރިޒަމްގެ ދައުވާ ވެސް ދައުލަތުން އުފުލާފައެވެ. އެ ދައުވާގެ އަޑުއެހުންތައް ކޯޓްގައި ތާވަލްކުރި ނަމަވެސް ވަނީ ކެންސަލްކޮށްފައެވެ. އަދި ހާލުކޮޅު ހުރި ގޮތުން ރައީސް މައުމޫނުގެ ޝަރީއަތްތައް ޣައިރު ހާޒިރުގައި ކުރިއަށް ގެންދިޔުމަށް ވެސް އެމަނިކުފާނު ވަނީ އެދިވަޑައިގެންފައެވެ.

ސިއްހީ ހާލަތު ގޯސްވުމުގެ ސަބަބުން ރައީސް މައުމޫން ގެއަށް ބަދަލުކޮށް ދިނުމަށް އާއިލާއިން ކޯޓާއި ސަރުކާރުގައި ވެސް އެދިފައިވެއެވެ. ނަމަވެސް މިހާތަނަށް ސަރުކާރުން މިކަމަށް އެއްވެސް އިޖާބައެއް ދީފައެއް ނުވެއެވެ.