ރައީސް މައުމޫންއާއެކު ޝެޑިއުލް ކޮށްފައިވާ ބައްދަލުވުން ކެންސަލްކޮށްފި ޚަބަރު ދިނީ އެންމެ 8 މިނެޓަށްވެފައި ވަނިކޮށް ކަމަށް އެ މަނިކުފާނުގެ ގާނޫނީ ވަކީލުން ވިދާޅުވެއްޖެއެވެ.
ބައްދަލުވުން ކެންސަލް ކުރިކަން އެންގީ ފޯނު ކޯލެއް މެދުވެރިކޮށް ކަމަށާއި އެހެން ނަމަވެސް ކެންސަލް ކުރީ ކީއްވެގެންކަމެއް އަންގާފައި ނުވާކަމަށް ވަކީލުން ވިދާޅުވިއެވެ. ފުލުހުން ގާތު ކެންސަލްވި ސަބަބު އެހުމުން ފުލުހުން ބުނެފައިވަނީ ފަހުން ކިޔައިދޭނެ ކަމަށެވެ. އަދި ފަހުން ފުލުހުން ވަނީ ބައްދަލުވުން ކެންސަލް ކުރީ އިދާރީ ކަންތައްތައް ހަމަނުޖެހިގެންކަމަށް އަންގާފައި ކަމަށް ވެސް ވަކީލުން ވަނީ ވިދާޅުވެފައެވެ.
ކަން އެގޮތަށް އޮތް ނަމަވެސް، ބައްދަލުވުން އަސްލު ކެންސަލް ކޮށްފައި ވަނީ ރައީސް މައުމޫންގެ ސިއްހީ ހާލުކޮޅު މާ ބޮޑަށް ދަށްވުމުން އެކަން ފޮރުވުމަށްކަމަށް ބެލެވޭކަމަށް ވެސް ވަކީލުން ވަނީ ވިދާޅުވެފައެވެ.
ރައީސް މައުމޫންގެ ސިއްހީ ހާލުކޮޅު ދަށްވެފައިވާ މިދަނޑިވަޅުގައި އެމަނިކުފާނަށް ދޭންޖެހޭ ބޭސްތައް ފުލުހުން އެއްވެސް ފަރާތަކަށް ނާންގާ ނަގައިފައިވާކަމަށް އެމަނުކުފާނުގެ ވަކީލުން ވަނީ ތުހުމަތު ކޮށްފައެވެ.
އެމަނިކުފާނުގެ ޤާނޫނީ ވަކީލު އަލްއުސްތާޛް ހުސައިން ޝަމީމް ވިދާޅުވީ ރައީސް މައުމޫން ދޫނިދޫ ޖަލަށް ބަދަލުކުރުމަށްފަހު ފުލުހުން އެމަނިކުފާނުގެ ދަބަސްކޮޅުން އެބޭސްތައް ނަގާފައިވާކަމަށެވެ. އަދި ބުރާސްފަތި ދުވަހުގެރޭ ބޭސް ފަރިއްކުޅުއްވަން ބެއްލެވިއިރު ބޭސްތައް ނެތްކަމަށް ޝަމީމް ވިދާޅުވިއެވެ. ރައީސް މައުމޫންގެ ބޭސްތައް ފުލުހުން ނެގީ އެމަނިކުފާނަށް ނޭނގިކަމަށްވެސް ޝަމީމް ވިދާޅުވިއެވެ.
އެމަނިކުފާނުގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ރައްޔިތުންގެ މަޖިލީހުގެ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް ނ.މިލަދޫގައި ބުދަ ދުވަހުގެ ރޭ ބޭއްވި ގުޅިފައިވާ ސިޔާސީ ޕާޓީތަކުން ބޭއްވި ކެމްޕެއިން ޖަލްސާގައި ވާހަކަދައްކަވަމުން ވައްޑެ ވިދާޅުވީ ފާއިތުވި ދެ ދުވަހު ވެސް މައުމޫނުގެ ސިއްހީ ހާލުކޮޅު ނާޒުކު ކަމަށެވެ. އޭނާ ވިދާޅުވީ ރައީސް މައުމޫނަށް ޖަލު ގޮޅި ހައްގު ކަމަށް ވަކި ބަޔަކު ގަބޫލުކޮށްގެން އެމަނިކުފާނު ޖަލަށް ލީ ނަމަވެސް އެކަން ގަބޫލު ނުކުރައްވާ ކަމަށެވެ. އެ އަނިޔާ ރައީސް މައުމޫނު ލިބެންވާނެ ކަމަށް ގަބޫލު ނުކުރައްވާ ކަމަށްވެސް އޭނާ ވިދާޅުވިއެވެ.
