ރައީސް މައުމޫނުގެ ސިއްހީ ހާލުކޮޅު ގޯސްވެފައި ވަނިކޮށް މާފުށީ ޖަލުން ދޫނިދޫ ޖަލަށް ބަދަލު ކޮށްފި
23 އޯގަސްޓު 2018 | ބުރާސްފަތި 13:45ރައީސް މައުމޫނު ދޫނިދޫ ޖަލަށް ބަދަލުކޮށްފައިވަނީ ޖަލުތަކާއި ޕެރޯލް ޤާނޫނުގެ ދަށުން ހާއްސަ ހާލަތެއްގެ ދަށުން
ކުރީގެ ރައީސް މައުމޫނު އަބްދުލްގައްޔޫމް
ކުރީގެ ރައީސް މައުމޫނު އަބްދުލްގައްޔޫމް ސިއްހީ ހާލުކޮޅު ގޯސްވެފައި ވަނިކޮށް މާފުށީ ޖަލުން ދޫނިދޫ ޖަލަށް ބަދަލު ކޮށްފިއެވެ.
ކަރެކްޝަން ސާރވިސްއިން ބުނީ ރައީސް މައުމޫނު ބުރާސްފަތި ދުވަހު ދޫނިދޫ ޖަލަށް ބަދަލު ކޮށްފައިވަނީ ޖަލުތަކާއި ޕެރޯލް ޤާނޫނުގެ ދަށުން ހާއްސަ ހާލަތެއްގައި ކަމަށެވެ. ނަމަވެސް އެމަނިކުފާނަށް ދިމާވެގެން އުޅޭ ސިއްހީ މައްސަލައެއް ކަރެކްޝަނުން ހާމަކޮށްފައެއް ނުވެއެވެ.
ރައީސް މައުމޫން ހާލުކޮޅު އިތުރަށް ގޯސްވުމާއި ގުޅިގެން އެމަނިކުފާނަށް ފަރުވާ ދިނުމަށް މާލެއިން މާފުށީ ޖަލަށް މިމަހު 21 ވަނަ ދުވަހު ޑޮކްޓަރަކު ވެސް ވަނީ ގެންގޮސްފައެވެ.
ރައީސް މައުމޫންގެ އާއިލާއިން ބުނާ ގޮތުގައި، އެމަނިކުފާނަށް ވަނީ "ވެއްޓުމުގެ" އާލާސްކަންފުޅަކާ ކުރިމަތިވެވަޑައިގެންފައެވެ. އެހެންވެ އެމަނިކުފާނު އެކަހެރިކޮށް ނުހުންނެވުމަށް ވެސް ޑޮކްޓަރުން މީގެކުރިން ލަފާ ދީފައިވެއެވެ.
ރައީސް މައުމޫން ހައްޔަރުކޮށް، ހުކުމެއް އިއްވާފައިވަނީ ފެބްރުއަރީ އެކެއްގައި ސުޕްރީމް ކޯޓުން ނެރުނު އަމުރާއި ގުޅިގެން ކުއްލި ނުރައްކަލުގެ ހާލަތު އިއުލާންކޮށް ހިންގި ތަހުގީގަކަށްފަހުއެވެ. އެ އަމުރާ ގުޅިގެން އެމަނިކުފާނަށް ޓެރަރިޒަމްގެ ދައުވާ ވެސް ދައުލަތުން އުފުލިއެވެ. އެ ދައުވާގެ އަޑުއެހުންތައް ކޯޓްގައި ތާވަލްކުރި ނަމަވެސް ވަނީ ކެންސަލްކޮށްފަ އެވެ. އަދި ހާލުކޮޅު ހުރިގޮތުން ރައީސް މައުމޫނުގެ ޝަރީއަތްތައް ޣައިރު ހާޒިރުގައި ކުރިއަށް ގެންދިޔުމަށް ވެސް އެމަނިކުފާނު ވަނީ އެދިވަޑައިގެންފައެވެ.
