މަޤާމުން އިސްތިއުފާ ދެއްވީ ކުރީގެ ރައީސް މައުމޫނަށް އަނިޔާ ކުރަމުންދާތީ ކަމަށާއި ރައީސް ޔާމީންގެ ވެރިކަން ބަދަލު ކުރުމަށް ގުޅިފައިވާ ޕާޓީތަކާ އެކު ކުރެވެން އޮތް ހުރިހާ ކަމެއް ކުރައްވާނެ ކަމަށް އެންވަޔަރަންމަންޓް މިނިސްޓްރީގެ އެގްޒެކެޓިވް ކޯޑިނޭޓަރު ކަމުން ދާދިފަހުން އިސްތިއުފާދެއްވި އިލްޔާސް ފަރުހާދު ވިދާޅުވެއްޖެއެވެ.
މިސަރުކާރުގައި ރައީސުލް ޖުމްހޫރިއްޔާގެ އޮފީހުގެ ޑެޕިއުޓީ އަންޑަރ ސެކްރެޓަރީގެ މަޤާމު ވެސް ކުރިން އަދާކުރެއްވި އިލްޔާސް އިސްތިއުފާ ދެއްވަމުން ރައީސް ޔާމީނަށް ފޮނުއްވާފައިވާ ސިޓީގައި ވިދާޅުވެފައިވާ ގޮތުގައި އެންމެ ޅަދުވަހުން ފެށިގެން ވެސް އޭނާއަކީ ރައީސް ޔާމީން ވެސް ހިމެނޭ ގޮތަށް ރައީސް މައުމޫނާއި އެމަނިކުފާނުގެ ޢާއިލާ ދެކެ ވަރަށް ލޯބިވާ މީހެއް ކަމަށެވެ. އަދި އޭނާގެ ސިޔާސީ ހަޔާތް ފެށުނީ ވެސް ރައީސް މައުމޫނުގެ ވެރިކަމުގައި ކަމުން އެމަނިކުފާނުގެ ސިޔާސަތުތަކަށް އިންތިހާއަށް ލޯބިކުރައްވާ ކަމަށް ވެސް ސިޓީގައި ވެއެވެ.
ސިޓީގައި ވިދާޅުވެފައިވާ ގޮތުގައި ރައީސް މައުމޫން ފެއްޓެވި އިސްލާހީ މަސައްކަތްޕުޅަކީ ޤައުމަށް ނުހަނު ބޭނުންތެރި މަސައްކަތްޕުޅުތަކެއް ކަމުގައި ހިތުގެ އަޑިން ޤަބޫލްކުރެވޭ ހިނދު އެއީ ދަރިންގެ ދަރިންނާއި ހަމައަށް މިޤައުމު އަމާންކަމާ އެކު ގެންގޮސް ދެއްވުމަށް އެމަނިކުފާނު ފެއްޓެވި އިޚްލާސްތެރި މަސައްކަތްޕުޅެއް ކަމަށެވެ.
ރައީސް މައުމޫނަށް ދެމުން ގެންދާ އަނިޔާ އެއްވެސް ހާލެއްގައި ޤަބޫލު ނުކުރާނެކަން ފާހަގަ ކުރައްވަމުން އިލްޔާސް ވިދާޅުވީ އިންސާނީ ކަރާމާތާއި ޙައްޤުތަކަށް ޙުރުމަތްތެރިކޮށް ހިތުމަކީ ޤަބޫލުކުރާ އަސާސް ކަމަށް ވާއިރު ރައީސް މައުމޫނަށް ލިބެންޖެހޭ އިންސާނީ ކަރާމާތާއި ޙައްޤުތަކާއި މިނިވަންކަން ނުދީ އެމަނިކުފާނު ޖަލުގައި ބަންދުގައި ބަހައްޓާފައިވާ ބެހެއްޓުމަކީ އެމަނިކުފާނަށް ދެވޭ އަނިޔާއެއް ކަމުގައި ނޫނީ ނުވާނެ ކަމަށެވެ. އަދި އެކަމާ ހިތާމަކޮށް އެކަން އެންމެ ހަރުކަށި އިބާރާތުން ކުށްވެރިކުރާ ކަމަށް ވެސް ސިޓީގައި ވިދާޅުވެފައި ވެއެވެ.
ހަމަ އެފަދައިން ދިވެހިންނަކީ ދުވަހަކު ވެސް އަނިޔާވެރިކަމާއި ފަސާދަ ޤަބޫލުކުރާ ބަޔަކަށް ނުވާހިނދު މިއީ އެއްވެސް ދިވެހި ރައްޔިތަކު ބަލައިގަންނަ ކަމަކަށް ނުވާނެތީ އާއި މިއީ މިއަދު މިޤައުމުގައިވާ ނާތަހުޒީބު ކަމެއް ކަމުގައި ދެކޭ ކަމަށް ވެސް މަޤާމުން އިސްތިއުފާ ދެއްވައި ފޮނުއްވި ސިޓީގައި އިލްޔާސް ވިދާޅުވެފައި ވެއެވެ.
ރާއްޖެ އެމްވީއަށް އިލްޔާސް ވިދާޅުވީ ކުރިއަށް އޮތްތަނުގައި ގުޅިފައިވާ ޕާޓީތަކުގެ ހަރަކާތްތަކުން ވެސް ފެންނާނެ ކަމަށާއި ކުރިއަށް އޮތް ރިޔާސީ އިންތިޚާބުގައި ރައީސް ޔާމިން ބަލިކުރަން ކުރެވެން ހުރި ހުރިހާ ކަމެއް ވެސް ކުރައްވާނެ ކަމަށެވެ.
