ޔޫރަޕިއަން ޔޫނިއަން އިން ރާއްޖޭގެ 41 ފަރުދަކާ ދެކޮޅަށް ފިޔަވަޅު އެޅުމަށް ނިންމާފައިވާ ލިސްޓް އެބަ އޮތް ކަމަށް ވިދާޅުވާ ވިދާޅުވުން ޔޫރަޕިއަން ޕާލިމެންޓްގެ މެމްބަރު ތޯމަސް ޒެކޯވްސްކީ ތަކުރާރު ކުރައްވައިފިއެވެ. 

ޔޫރަޕިއަން ޕާލިމެންޓްގެ މެމްބަރުންގެ ހަބަރުތައް ގެނެސްދޭ ވެބްސައިޓެއް ކަމަށްވާ އީޕީ ޓުޑޭއަށް ދެއްވި އިންޓަވިއުއެއްގައި ޒެކޯވްސްކީ ވިދާޅުވީ ރާއްޖޭގެ ވަކިވަކި ފަރުދުންނާ ދެކޮޅަށް ފިޔަވަޅު އެޅުމަށް ނިންމައި ތައްޔާރުކޮށްފައިވާ ލިސްޓް ފެނިވަޑައިގެންނެވި ކަމަށާއި އެ ލިސްޓްގައި 41 ނަމެއް އޮތްކަން އެނގިވަޑައިގަންނަވާ ކަމަށެވެ.

މީގެ އިތުރުން ބޭފުޅަކު ކުރައްވާފައިވާ ޓްވީޓެއްގެ ރައްދުގައި ބުދަ ދުވަހު ޒެކޯވްސްކީ ކުރެއްވި ޓްވީޓެއްގައި ވިދާޅުވެފައިވަނީ "ދެއަރ އިޒް" {އެބަ އޮތް} ކަމަށެވެ.

ޚާރިޖީ ވަޒީރެއް އެކަހެރި ކުރެއްވުމަށް ފަހު، ޚާރިޖީ ކަންކަމާ ބަސްވިދާޅުވާ ފިޝަރީޒް މިނިސްޓަރ ޑރ. މުހައްމަދު ޝައިނީ ބުދަ ދުވަހު ކުރެއްވި ޓްވީޓެއްގައި ވިދާޅުވެފައި ވަނީ އީޔޫގެ ދަތިކުރުރުމުގެ ފިޔަވަޅުގެ ލިސްޓެއް ނެތް ކަމަށެވެ. އަދި އެއްވެސް ބޭފުޅެއް އޮޅުމެއް އަރާ ނަމަ ކޮޅުނބުގައި ހުންނަވާ އީޔޫގެ ސަފީރަށް ގުޅައި ސާފުކުރުމަށް އެދިވަޑައިގެންނެވިއެވެ. 

ލިސްޓް ތައްޔާރުކުރުމަކީ އީޔޫގެ ގާނޫނުހަދާ މަޖިލީހުގެ މަސައްކަތެއް ނޫން ކަމަށާއި އެއީ ކައުންސިލްގެ އިއްތިފާގުން ކުރަން އޮންނަ ކަމެއް ކަމަށް ޝައިނީ ވިދާޅުވެފައި ވެއެވެ.

މީގެ އިތުރުން އެމަނިކުފާނުގެ އަތްޕުޅުގައި ގައްދާރުންގެ ލިސްޓެއް އޮތް ކަމަށް ވިދާޅުވެ ރާއްޖޭގެ ފުރަތަމަ ޑެމޮކްރެޓިކް ރައީސުލް ޖުމްހޫރިއްޔާ އަދި އދ. ގެ ޗެމްޕިއަން އޮފް ދި އަރތު، ރައީސް މުހައްމަދު ނަޝީދުގެ ނަންފުޅު އޮތީ އެ ލިސްޓްގެ ކުރީގައި ކަމަށް ވިދާޅުވެފައި ވެއެވެ.

ޒެކޯވްސްކީ ކުރެއްވި އިތުރު ޓްވީޓެއްގައި ވިދާޅުވެފައި ވަނީ ސަރުކާރުން ރާއްޖޭގެ އިދިކޮޅު ފަރާތްތައް ޖަލަށްލާ އިރު އީޔޫ ހިމޭނުން އޮންނާނެ ކަމަށް ވިސްނާ މީހަކު ނަމަ އެ މީހަކަށް އެ ކުރެވެނީ ކުށްހީއެއް ކަމަށެވެ. އީޔޫގެ ވިސްނުން ސާފު ކަމަށާއި އެއީ ބަލައި ގަންނާނެ ކަމެއް ނޫން ކަމަށް ޒެކޯވްސްކީ ވިދާޅުވެފައި ވެއެވެ.