އީރާނުން ފުރަތަމަ ފަހަރަށް ތައާރަފްކުރި އެތެރޭގެ ހަނގުރާމަމަތީ ޖެޓް ކައުސަރް، ޑިފެންސްގެ ޝޯއެއްގައި ދައްކާލައިފިއެވެ.
އީރާނުގެ ރައީސް ހަސަން ރޫހާނީ އާއި ޑިފެންސް މިނިސްޓަރު އާމިރް ހާތަމީ ވަނީ އެ ޝޯގައި ބައިވެރިވެ ވަޑައިގެންފައެވެ. އަދި ރައީސް ރޫހާނީ ވަނީ އަމިއްލަފުޅަށް އެ ޖެޓްގެ ހާލަތު ބައްލަވާލައްވާފައެވެ. އަދި ޖެޓްއަށް އަރުއްވާ ވަނީ އޭތި އޮޕަރޭޓް ކުރާ ގޮތުގެ މައުލޫމާތު ސާފްކުރައްވާފައެވެ.
#Iran unveiled the country’s first state-of-the-art fighter jet dubbed “Kowsar” designed and manufactured by domestic military experts. pic.twitter.com/eznrxW0qbY
— Tasnim News Agency (@Tasnimnews_EN) August 21, 2018
އީރާނުގެ ނިއުސް އޭޖެންސީ، ތަސްނީމް އިން ބުނީ އެ ޖެޓް އުފައްދާފައި ވަނީ އީރާނަށް ޚާއްސަކޮށްގެން ކަމަށާއި އޭގައި ހިމެނޭނީ އެންމެ ފަހުގެ އެޑްވާންސް ފީޗާތައް ކަމަށެވެ. އަދި އެ ޖެޓްގެ ދެ ވައްތަރެއް އުޅޭ ކަމަށާއި ފުރަތަމަ ވައްތަރަކީ އެއް ޕައިލެޓުން އަރާ ވައްތަރު ކަމަށާއި ދެން ހުންނަނީ ދެ ޕައިލެޓުން އަރާ ވައްތަރު ކަމަށެވެ. އެ ޖެޓްގެ ބޭނުން ކުރާނީ ހަމައެކަނި ގައުމުގެ ތެރޭގައި ހިންގާ ހަރަކާތްތަކަށް ކަމަށް ވެސް ތަސްނީމް އިން ސަރުކާރާ ހަވާލާދީ ބުނެފައި ވެއެވެ.
އީރާނުން އެ ޖެޓް ތައާރަފްކޮށްފައިވާ ވަގުތަކީ އެމެރިކާއާ ދެކޮޅަށް ވަރުގަދަ ބަހުގެ ހަމަލާ ދީފައިވާ ވަގުތެކެވެ. ރައީސް ރޫހާނީ ވަނީ އަންގާރަ ދުވަހު އަސްކަރިއްޔާގެ އޮފިޝަލުންނާ ބައްދަލުކޮށް އެ ގައުމުން ބޭނުންކުރާ ހަނގުރާމަމަތީ އުޅަދުތަކަކީ އަމިއްލަ ދިފާއަށްޓަކައި ބޭނުން ކުރާ އެއްޗެއް ކަމަށް ވިދާޅުވެފައެވެ. ނަމަވެސް އެ ގައުމަށް ހަމަލާ ދޭން އުޅޭ ފަރާތްތަކާ ދެކޮޅަށް އަސްކަރިއްޔާ ބޭނުން ކުރާނެ ކަމުގެ އިންޒާރު ވެސް ވަނީ ދެއްވާފައެވެ.
