މިދިޔަ މަހު ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ޗައިނާ އިން ކަމަށް ޓޫރިޒަމް މިނިސްޓްރީން ބުނެފިއެވެ.

ޓޫރިޒަމް މިނިސްޓްރީން އާންމުކުރި ތަފާސް ހިސާބުތަކުން ދައްކާ ގޮތުގައި ޗައިނާ އިން 33،277 ފަތުރުވެރިން އައިސްފައިވެއެވެ. އެކަމަކު ޗައިނާ އިން އައި ޓޫރިސްޓުންގެ އަދަދު ވަނީ މިދިޔަ އަހަރުގެ ޖުލައި މަހާ އަޅާބަލާއިރު 3.1 ޕަސެންޓް ދަށްވެފައެވެ.

ޔޫރަޕް މާކެޓުން އެންމެ ގިނަ ފަތުރުވެރިން އިނގިރޭސިވިލާތުން އައިސްފައިވާއިރު އެ ގައުމުން 8،421 ޓޫރިސްޓުން މިދިޔަ މަހު އައިސްފައިވެއެވެ. މިއީ 9.3 ޕަސެންޓްގެ ކުރިއެރުމެއް ކަމަށް ޓޫރިޒަމް މިނިސްޓްރީން ބުނެއެވެ.

ޓޫރިޒަމް މިނިސްޓްރީން އާންމުކުރި ތަފާސްހިސާބުތައް ދައްކާ ގޮތުން މިދިޔަ މަހު ޔޫރަޕް މާކެޓުން 12.8 ޕަސެންޓް ކުރިއެރުމެއް ލިބުނުއިރު ޗައިނާ ހިމެނޭ އޭޝިއާ އަދި ޕެސިފިކް މާކެޓުން ވެސް 6.5 ޕަސެންޓްގެ ކުރިއެރުމެއް ލިބިފައިވެއެވެ.

ތަފާސްހިސާބުތައް ދައްކާ ގޮތުން މިދިޔަ މަހު ރާއްޖެއަށް 122،332 ޓޫރިސްޓުން އައިސްފައިވެ އެވެ. އަދި ޖުލައި މަސް ނިމުނުއިރު ޖުމްލަ 848،847 ޓޫރިސްޓުން އައިސްފައިވެ އެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 10.1 ޕަސެންޓްގެ ކުރިއެރުމެކެވެ.

މި އަހަރުގެ ފުރަތަމަ ތިން މަސް ދުވަހުގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް އިތުރުވެ ރާއްޖެއަށް 993.5 މިލިއަން ޑޮލަރު (15.3 ބިލިޔަން ރުފިޔާ) ލިބިފައިވާ ކަމަށް މަރުކަޒީ ބޭންކް، އެމްއެމްއޭ އިން ވަނީ ލަފާކޮށްފައެވެ.