އެއް ހޮރަކުން ދެ ފަހަރު ކައްޓެއް ނުޖެހޭނެ ކަމަށް ވިދާޅުވެ ރައީސް އަބްދުﷲ ޔާމީންގެ އޮޅުވާލުންތަކުން ސަލާމަތްވެ، އެމަނިކުފާނު ހުއްޓުވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ގުޅިފައިވާ ޕާޓީތަކުން ބުދަ ދުވަހުގެ ރޭ މ. ކުނޫޒްގައި ބޭއްވި ޖަލްސާގައި ވާހަކަ ދައްކަވަމުން ރައީސް ނަޝީދު ވަނީ، ރައީސް ޔާމީނަށް ބަހުގެ ހޫނު ހަމަލާތަކެއް އަމާޒުކުރައްވާފަ އެވެ. އެގޮތުން ރައީސް ނަޝީދު ސިފަކުރެއްވި ގޮތުގައި މިހާރުގެ އިލެކްޝަންސް ކޮމިޝަނަކީ ރައީސް ޔާމީންގެ "ގޮނޑިކޮއްކޮ" ކޮމިޝަނެކެވެ. އަދި ވޯޓުން ކުރައްވަން އުޅޭ "ވައްކަން" ވަރަށް ބޮޑަށް ރައްޔިތުންނަށް ސާފުވެފައިވާ ކަމަށާއި، ނަމަވެސް އިންތިހާބު އޮޅުވާލެއްވުމަށް ފުރުސަތު ނުދެއްވާނެ ކަމަށް ރައީސް ނަޝީދު ވިދާޅުވި އެވެ.
އެމަނިކުފާނު ވިދާޅުވިގޮތުގައި ހުރިހާ އޮޅުވާލުންތަކުން ސަލާމަތްވެ ކުރިއަށް އޮތް ރިޔާސީ އިންތިހާބުގައި ރައީސް ޔާމީން ބަލިކުރައްވާނެ އެވެ.
"ކާނަލް ނާޒިމްގެ ކޮޓަރިކޮޅުގައި ފިސްތޯލަ ބޭއްވުމާއި، އދ.ގެ ދަތިކުރެއްވުންތަކާއި ހިލާފަށް އުތުރުކޮރެއާއަށް ވަގަށް ތެޔޮ ވިއްކެވުމާއި، މަރުގެ އަދަބު ތަންފީޒްކުރައްވާނެ ކަމަށް ވިދާޅުވެ ސަލަފު ޖަމާއަތަށް އޮޅުވާލައްވަމުންގެންދަވާ އޮޅުވާލެއްވުމާއި، ޔޫރަޕްގެ އިއްތިހާދުން ފިޔަވަޅު އަޅާނެ ބޭފުޅުންގެ ތެރޭގައި ވިޔަފާރިވެރިން ނުހިމެނޭނެކަމަށް ވިދާޅުވެ ތިޔަ އޮޅުވާލާ އޮޅުވާލެއްވުންތައް. ތިޔަ ކުރައްވާ މަސައްކަތްތަކުގެ ހުރިހާ ހީލަތެއް، ދިވެހިރާއްޖޭގެ ރައްޔިތުންނަށްވަނީ މާބޮޑަށް، ދަންނަވަންތޯ، މާބޮޑަށް ސާފުވެފައި"
އިންތިހާބެއްގައި ރައްޔިތުންގެ އެންމެ ބޮޑު ތާއީދެއް އެއް ބޭފުޅަކަށް ލިބިވަޑައިގެެން ހުންނެވި ކުރީގެ ރައީސް ނަޝީދު އިތުރަށް ވިދާޅުވީ ރައީސް ޔާމީން ހުންނެވީ މާ ބޮޑަށް ބޭޒާރުވެ، ބަލިވެވަޑައިގެންފައި ކަމަށެވެ. އަދި އިލެކްޝަންސް ކޮމިޝަން މެދުވެރިކޮށް އިއުލާން ކުރެއްވުމަށް މަސައްކަތްކުރައްވަނީ ބޮޑު ދޮގެއްކަމަށާއި، ރައީސް ޔާމީން މަސައްކަތް ކުރައްވަނީ ރާއްޖޭގެ ދުސްތޫރަށް އަރާވަޑައިގެންނެވުމަށް ކަމަށް ރައީސް ނަޝީދު ތުހުމަތު ކުރެއްވި އެވެ.
ރައީސް ނަޝީދު އިޝާރަތް ކުރައްވާފައިވަނީ ރީ-ރަޖިސްޓްރޭޝަން ޕްރޮސެސްއަށެވެ. އަދި 95000 މީހުން ރީ-ރަޖިސްޓްރީ ނުވާނެކަން ފާހަގަ ކުރައްވާ ރައީސް ނަޝީދު ވިދާޅުވީ އިލެކްޝަންސް ކޮމިޝަނުން މަސައްކަތް ކުރަނީ އޮޅުވާލަން ކަމަށެވެ.
"2013 ވަނަ އަހަރު ރަށްވެހިވެފައިވާ ރަށް ނޫން ރަށެއްގައި ތިިބެ ވޯޓުދީފައިވަނީ 58000 ހާމީހުން. 60000 އެއް ހަމައެއް ނުވޭ. ރައީސް ޔާމީން، މަނިކުފާނުގެ ގުރާ އިލެކްޝަންސް ކޮމިޝަންލައްވާ ތިޔަ ވިދާޅުވަނީ، މިވަގުތު ރާއްޖޭގައި އެ މީހުންގެ އަމިއްލަ ގެދޮރުގައި ދިރިއުޅުމުގެ ފުރުސަތު ނެތް މީހުންގެ އަދަދު 90 އެތައް ހާހަކަށް އަރާ ކަމަށް. ރައީސް ޔާމީން. މަނިކުފާނު އަމިއްލަ ފުޅަށް، އަމިއްލަފުޅަށް ތިޔަ ވިދާޅުވަނީ، މަނިކުފާނުގެ ވެރިކަމުގެ 5 އަހަރުގެ ތެރޭގައި ގެދޮރު ނެތް މީހުން އަދަދު 45 އިންސައްތައަށް އިތުވެއްޖެ ކަމަށް"
