ދުވާލަކު ދެތިން ހަތަރު ފަހަރު ރައީސް ނަޝީދާއި ފޯނުން ވާހަކަ ދައްކަން: އިބޫ
ރައީސް ނަޝީދާއި އިބޫއަކީ ކުޑައިރުގެ އެކުވެރިން
ރައީސް ނަޝީދު އަދި އިބޫ - ދެބޭފުޅުންގެ ގުޅުން ހީނަރުވެފައިވާ ކަމަށް ބައެއް ފަރާތްތަކުން ބުނޭ
ބުރަކޮށް އުޅުއްވި ނަމަވެސް ދުވާލަކު ދެތިން ހަތަރު ފަހަރު ކުރީގެ ރައީސް މުހައްމަދު ނަޝީދާއި ވާހަކަ ދައްކަވާ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން ރިޔާސީ އިންތިހާބަށް ނެރޭ އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ވިދާޅުވެއްޖެއެވެ.
ރާއްޖެޓީވީއިން ގެނެސްދޭ "އިބޫ" ޕްރޮގްރާމްގެ މިހަފްތާގެ އެޕިސޯޑަށް ދެއްވި އިންޓަވިއުގައި ރައީސް ނަޝީދާއި އޮންނަ ގުޅުމާއި ގުޅޭގޮތުން އިބޫއާއި ސުވާލު ކުރެއްވުމުން ވިދާޅުވީ ރައީސް ނަޝީދާއި ބައްދަލުވެވަޑައިގަތީ ސިޔާސީ ކަންތައްތަކުގެ ތެރެއިން ނޫން ކަމަށެވެ. ރައީސް ނަޝީދަކީ ކުޑައިރުގެ ރަހުމަތްތެރިއެއް ކަމަށާއި ދެބޭފުޅުންގެ މެދުގައި މައްސަލައެއް ޖެހިވަޑައިގަންނަވާނެ ކަމަށް ގަބޫލުނުކުރެއްވޭ ކަމަށް އިބޫ ވިދާޅުވިއެވެ.
އިބޫ ވިދާޅުވީ އެކަން އެގޮތަށް ބަދަލުނުވެ އޮންނާނެ ކަމަށާއި ބުރަކޮށް އުޅޭއިރުވެސް ކޮންމެ ދުވަހަކު ދެތިން ހަތަރު ފަހަރު ރައީސް ނަޝީދާއި ވާހަކަ ދައްކަވާ ކަމަށެވެ. ކުރިޔަށް ރޭވިފައި ހުންނަ ކަންކަމާއި ގުޅޭގޮތުން ރައީސް ނަޝީދާއި ވާހަކަ ދައްކަވާ ކަމަށާއި ރައީސް ނަޝީދާއި އެމަނިކުފާނައި ދެމެދު އެއްވެސް ކަހަލަ މައްސަލައެއް ނެތް ކަމަށް އިބޫ ވިދާޅުވިއެވެ.
"މިކޮޅަށް އައުމުގެ ކުރިން ވެސް މިއައީ ކުރިޔަށް ހުރި މަސައްކަތްތަކާއި ބެހޭގޮތުން ފޯނުން ވާހަކަ ދައްކާފައި. ދުވާލަކު ދެތިން ހަތަރު ފަހަރު އަޅުގަނޑުމެން ބުރަކޮށް އުޅޭ އިރުގައި ވެސް ވާހަކަ ދައްކަން. ކުރިޔަށް އަޅުގަނޑުމެން ރޭވިފައި ހުރި ކަންތަކާއި ބެހޭގޮތުން މަޝްވަރާކޮށް މިގެންދަނީ ކަންތައްތައް ނިންމަމުން." ކޮންމެ ހުކުރު ދުވަހެއްގެ ރޭ ރާއްޖެޓީވީއިން ގެނެސްދޭ ޕްރޮގްރާމްގައި ވާހަކަ ދައްކަވަމުން އިބޫ ވިދާޅުވިއެވެ.
ރައީސް ނަޝީދާއި އިބޫއާއި ދެމެދު އޮންނަ ގުޅުން ހީނަރުވެފައިވާ ކަމަށް ސަރުކާރަށް ތާއިދުކުރާ ފަރާތްތަކުން ބުނަމުންދާ ދަނޑިވަޅެއްގައި އިބޫ ދެއްވި މި ޖަވާބާއެކު އެދެބޭފުޅުންގެ މެދުގައި ވެސް އެއްވެސް މައްސަލައެއް ނެތްކަން ވަނީ ހާމަވެގެންގޮސްފައެވެ.
