ރައީސް ޔާމީންގެ ކެނޑިޑެސީ ފޯމް އިލެކްޝަންސް އިން ބަލައިގަނެފި
ކެނޑިޑެސީ ބަލައިގަތްކަން އެންގީ ހުކުރު ދުވަހު
ރައީސް ޔާމީންގެ ކެނޑިޑެސީ ފޯމު އިލެކްޝަންސް ކޮމިޝަނުގެ ރައީސާއި ޙަވާލުކުރައްވަނީ
އަންނަ ސެޕްޓެމްބަރު ބާއްވާ ރިޔާސީ އިންތިޚާބުގައި ޕީޕީއެމްގެ ފަރާތުން ވާދަކުރައްވާ ރައީސް އަބްދުﷲ ޔާމީން އަބްދުލްޤައްޔޫމްގެ ކެންޑިޑެސީ އިލެކްޝަންސް ކޮމިޝަން (އީސީ) އިން ބަލައިގެނެފިއެވެ.
ދެވަނަ ދައުރަކަށް އިންތިޚާބުގައި ވާދަކުރައްވާ ރައީސް ޔާމީންގެ ކެންޑިޑެސީ ބަލައިގެންކަން އިލެކްޝަންސް ކޮމިޝަނުން އަންގާފައިވަނީ ހުކުރު ދުވަހުއެވެ. އެމަނިކުފާނުގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށަހަޅުއްވާފައިވަނީ ބުރާސްފަތި ދުވަހުއެވެ.
ބުރާސްފަތި ދުވަހު އިލެކްޝަންސް ކޮމިޝަނުގައި އޮތް ރަސްމިއްޔާތެއްގައި ރައީސް ޔާމީންގެ ކެންޑިޑެސީ ފޯމް އިލެކްޝަންސް ކޮމިޝަނުގެ ރައީސް އަހުމަދު ޝަރީފާ ޙަވާލުކޮށްދެއްވީ ޕީޕީއެމްގެ ނާއިބު ރައީސް އަދި ޓޫރިޒަމް މިނިސްޓަރު މޫސާ ޒަމީރެވެ.
އެ ރަސްމިއްޔާތުގައި ރައީސް ޔާމީން އަދި އެމަނިކުފާނުގެ ރަނިންމޭޓު މުޙައްމަދު ޝަހީމް އަލީ ސައީދު ބައިވެރިވެވަޑައިގަންނަވާފައެއް ނުވެއެވެ.
ރައީސް ޔާމީންގެ ފޯމު ހުށަހެޅުއްވުމަށް ފަހު ނޫސްވެރިންނާ ވާހަކަ ދައްކަވަމުން ޕީޕީއެމްގެ ނާއިބު ރައީސް މޫސާ ޒަމީރު ވިދާޅުވީ، ކެންޑިޑެސީ ފޯމު ހުށަހެޅުއްވުމަށް ރައީސް ޔާމީނަށް ވަޑައިނުގެންނެވުނީ ރަސްމީ ދަތުރުފުޅެއްގައި މާލޭން ބޭރުގައި އުޅުއްވާތީ ކަމަށެވެ.
ރައީސް ޔާމީންގެ ކެނޑިޑެސީ އީސީ އިން ބަލައިގަތުމުން އަންނަ ރިޔާސީ އިންތިޚާބުގައި ވާދަކުރައްވާނީ ރިޔާސީ އިންތިހާބުގައި ވާދަކުރައްވާނީ ރައީސް އަބްދުﷲ ޔާމީނާއި އިދިކޮޅު ކޯލިޝަންގެ ކެނޑިޑޭޓް އިބްރާހިމް މުހައްމަދު ސޯލިހު (އިބޫ) އެވެ.
ރިޔާސީ އިންތިޚާބުގައ ވާދަކުރުމަށް ހަތް ފަރާތްތަކުން ފޯމު ނަންގަވާފައިވެއެވެ. ނަމަވެސް އިންތިޚާބުގައި ވާދަކުރައްވަން ފޯމު ހުށަހަޅުއްވާފައިވަނީ ތިން ފަރާތަކުންނެވެ. އޭގެ ތެރެއިން އަމިއްލަ ގޮތުން ވާދަކުރެއްވުމަށް ހުށަހެޅުއްވި ހުސައިން ނަސީރުގެ ފޯމު އިލެކްޝަންސް ކޮމިޝަނުންވަނީ ބާތިލް ކޮށްފަ އެވެ.
އިންތިހާބުގައި ވާދަ ކުރައްވާނެ ކަން އިއުލާން ކުރެއްވި ނަމަވެސް ކުރީގެ ހޯމް މިނިސްޓަރު އުމަރު ނަސީރާއި އެލްޖީއޭގެ ކުރީގެ ނައިބު ރައީސް ޝުޖާއު ހުސައިން ވަނީ އިންތިހާބުގައި ވާދަ ނުކުރެއްވުމަށް ނިންމަވާފަ އެވެ.
