ރައީސް އަބްދުﷲ ޔާމިންގެ ކެނޑިޑެސީ ސައްހަ ނުވާނެ ކަމަށް ރައީސް މައުމޫން އަބްދުއްޤަޔޫމްގެ ރިފޯމް މޫވްމެންޓްގެ މެމްބަރު އަދި ޕީޕީއެމް ކައުންސިލްގެ ކުރީގެ މެމްބަރު އާމިނަތު ނާދިރާ ވިދާޅުވެއްޖެ އެވެ.

ރާއްޖެޓީވީގެ "ރިޔާސީ ރޭސް" ޕްރޮގްރާމަށް ދެއްވި ޚާއްސަ އިންޓަވިއުއެއްގައި ނާދިރާ ވިދާޅުވީ ޕީޕީއެމްގެ އަސާސީ ގަވާއިދުގައިވާ ގޮތުން ޕާޓީގެ ކައުންސިލަށް، ޕާޓީގެ ރިޔާސީ ޓިކެޓް ދޭނެ މީހެއް ނުނިންމޭނެ ކަމަށާއި، އެކަން ކުރަންޖެހޭނީ ގައުމީ ޖަލްސާއަކުން ކަމަށެވެ. ރައީސް ޔާމިންއަކީ ޕީޕީއެމްގެ މުސްތަޝާރު ކަމަށާއި، މުސްތަޝާރަކީ ޕާޓީގެ އަސާސީ ގަވައިދުން އެއްވެސް ދައުރެއް އޮތް ބޭފުޅެއް ނޫންކަން ނާދިރާ ފާހަގަކުރެއްވި އެވެ.

ނާދިރާ ވިދާޅުވީ ރިޔާސީ އިންތިޚާބުގައި ވާދަކުރަން ބޭނުންވާ ފަރާތްތަކަށް ފުރުސަތު ދިނުމަށް ޕާޓީ ތެރެއިން އެކަމަށް ފުރުސަތު ހުޅުވާލަންޖެހޭ ކަމަށާއި، ނަމަވެސް އެކަން ވެސް ކޮށްފައިނުވާ ކަމަށެވެ.

"ޔާމީން އެދިގެން ޔާމީން ކައުންސިލެއް ބާއްވައިގެން އެކައުންސިލްގައި ދެންތިބި މީހުންލައްވައި ސޮއިކުރުވައިގެން ތިމަންނަ އޭ ރިޔާސީ ޓިކެޓް ބޭނުމީ. އެހެން ކިޔާފަ އެމީހުން ލައްވާ އޭނައަށް ރިޔާސީ ޓިކެޓްދީ. މިހުރިހާ ގަނޑެއް މިގަނެވުނީ. މިއީ އަސާސީ ގަވާއިދު ދަންނަ އެއްޗެއް ނޫން." ނާދިރާ ވިދާޅުވިއެވެ.

ނާދިރާ ވިދާޅުވީ ރައީސް ޔާމިންގެ ކެނޑިޑެސީ ފޯމް ސައްހަކަމަށް އިލެކްޝަން ކޮމިޝަނުން ނިންމަންޖެހޭނީ ވަރަށް ވިސްނާފައި ކަމަށާއި، ރައީސް ޔާމިނަށް ކެނޑިޑެސީ ފޯމް ދީފައިވަނީ ޕީޕީއެމްގެ އަސާސީ ގަވާއިދާ އެއްގޮތައްތޯ އެކޮމިޝަނުން ކަށަވަރު ކުރަންޖޭހޭ ކަމަށެވެ. އެއްވެސް ނުފޫޒެއްނެތި އެ މައްސަލަ އިލެކްޝަން ކޮމިޝަނުން ބަލާނަމަ ރައީސް ޔާމިންގެ ކެނޑިޑެސީ ބާތިލްވާނެ ކަމަށް ނާދިރާ ވިދާޅުވިއެވެ.

އަންނަ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ޕީޕީއެމްގެ ފަރާތުން ވާދަކުރެއްވުމަށް ރައީސް ޔާމީން އަދި ރަނިންމޭޓު ޑރ. މުހައްމަދު ޝަހީމް އަލީ ސައީދުގެ ކެނޑިޑެސީ ފޯމް އިލެކްޝަންސް ކޮމިޝަނަށް ހުށަހަޅީ ބުރާސްފަތި ދުވަހުއެވެ.

ރައީސް ޔާމީންގެ ކެންޑިޑެސީ ފޯމް އިލެކްޝަންސް ކޮމިޝަނުގެ ރައީސް އަހުމަދު ޝަރީފާ ޙަވާލުކޮށްދެއްވީ ޕީޕީއެމްގެ ނާއިބު ރައީސް އަދި ޓޫރިޒަމް މިނިސްޓަރު މޫސާ ޒަމީރެވެ. ރައީސް ޔާމީންގެ ކެންޑިޑެސީ ފޯމާ ހަވާލުވެވަޑައިގަތުމަށް ފަހު، އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ، ކެންޑިޑެސީ ބަލައިގަތުމާ މެދު، ކުރިއަށް އޮތް 48 ގަޑިއިރުގެ ތެރޭގައި އެ ކޮމިޝަނުން ގޮތެއް ނިންމާނެ ކަމަށެވެ.

ރައީސް ޔާމީން ކެންޑިޑެސީ ފޯމު ހުށަހެޅުމާއެކު މިއިންތިޚާބުގައި ވާދަކުރެއްވުމަށް ފޯމު ހުށަހެޅި ކެންޑިޑޭޓުންގެ އަދަދު ތިނަކަށް އެރީއެވެ. އަދި އިންތިޚާބުގައި ވާދަކުރައްވާނެކަން އިތުރު ދެ ފަރާތްތަކުން ވަނީ އިއުލާންކުރައްވާފައެވެ.