ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން ހުވަދު އަތޮޅުގެ ހަ ރަށަކަށް ކުރައްވާ ދަތުރުފުޅެއް އަންގާރަ ދުވަހު ފައްޓަވައިފިއެވެ.

ރައީސް އޮފީހުން ބުނީ ރައީސް ޔާމީންގެ މި ދަތުރުފުޅުގައި ގދ. މަޑަވެއްޔާއި، ގދ. ފަރެސްމާތޮޑާ އަދި ގދ. ގައްދޫއަށް ވަޑައިގެން އެރަށްރަށުގެ ގޮނޑުދޮށް ހިމާޔަތްކުރުމުގެ މަޝްރޫޢުތަކުގެ ނިމުން ފާހަގަ ކުރެއްވުމާއި، އެ ރަށްރަށުގައި ތަރައްޤީކުރައްވާފައިވާ ބަނދަރުތައް ހުޅުއްވައިދެއްވުމަށް ހަމަޖެހިފައިވާ ކަމަށެވެ.

މީގެއިތުރުން ގދ. ގައްދޫގައި ޤާއިމްކޮށްފައިވާ ނަރުދަމާ ނިޒާމްގެ ޚިދުމަތް ރަސްމީކޮށް ފައްޓަވައި ދެއްވުމަށާއި، އެރަށުގައި ހަދާފައިވާ ހައުސިންގ ޔުނިޓްތައް ހުޅުއްވައިދެއްވުމަށް ވެސް ހަމަޖެހިފައިވާ ކަމަށް ރައީސް އޮފީހުން ބުނެއެވެ.

ރައީސް ޔާމީންގެ މި ދަތުރުފުޅުގައި ގއ. ކޮނޑޭއަށް ވަޑައިގެން އެރަށު ބަނދަރު ހުއްޅުއްވައި ދެއްވުމަށާއި، ގއ. ކޮލަމާފުއްޓަށް ވަޑައިގެން އެރަށުގައި ޤާއިމްކޮށްފައިވާ ނަރުދަމާ ނިޒާމްގެ ޚިދުމަތް ރަސްމީކޮށް ފައްޓަވައިދެއްވައި، އެރަށުގައި ޤާއިމްކޮށްފައިވާ ފެނުގެ ޚިދުމަތް އިފްތިތާޙްކޮށްދެއްވުމަށް ހަމަޖެހިފައިވާ ކަމަށް ވެސް ރައީސް އޮފީހުން ބުނެއެވެ.

ރައީސް އޮފީހުން ބުނީ ގއ. ވިލިނގިއްޔަށް ވަޑައިގެން އެރަށުގެ މަގުހެދުމުގެ މަސައްކަތުގެ ނިމުން ފާހަގަކުރެއްވުމާއި، ވިލިނގިލީގައި ހަދާފައިވާ ހައުސިންގ ޔުނިޓްތައް ހުޅުއްވައި ދެއްވުމަށް ވެސް ހަމަޖެހިފައިވާ ކަމަށެވެ.

މީގެއިތުރުން ރައީސް ޔާމީންގެ މިދަތުރުފުޅުގައި ގއ. ކޫއްޑޫއަށް ވަޑައިގެން ކޫއްޑޫގައި ތަރައްޤީކޮށްފައިވާ މަސްވެރިންގެ މެރީނާ ހުޅުއްވައިދެއްވުމަށް ވެސް ހަމަޖެހިފައިވާ ކަމަށް ރައީސް އޮފީހުން ބުނެއެވެ.

ރައީސް ޔާމީންގެ މިދަތުރުފުޅާ ގުޅިގެން ބައެއް ރަށްރަށުގައި ދަމާފައިވާ އެމްޑީޕީގެ ދިދަތަކާއި ބެނާ އަދި ޕޯސްޓަރުފަދަ ތަކެތި ނެގަމުންދާ ކަމަށް ވެއެވެ. ރައީސް ޔާމީން ވަޑައިގަންނަވާ ހުވަދޫ ބައެއް ރަށްތަކަކީ މީގެ ކުރިން އެމަނިކުފާނުގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ވަޑައިގެންނެވި ރަށްތަކެވެ.

އެގޮތުން ގއ ކޮލަމާފުއްޓަށް ރައީސް ޔާމީން ވަޑައިގަންނަވާތީ އެރަށު ޕީޕީއެމް ޖަގަހަ ކުރިމަތީގައި ހުންނަ އެމްޑީޕީގެ އޮފީސް ކުރިމަތީގައި ދަމާފައިވާ ދިދަފޮތި ތަކާއި ބެނާރތައް ނެގުމަށް ކޯޓު އަމުރެއްގެ ދަށުން ފުލުހުން ވަނީ ނަގާފަ އެވެ.