އިންޑޮނޭޝިއާގެ ރަށެއް ކަމަށްވާ ލޮމްބޮކް އަށް އާދީއްތަ ދުވަހު 6.9 މެގްނިޓިއުޑްގައި އައި ބިންހެލުމުގައި މަރުވި މީހުންގެ އަދަދު ގާންގަނޑަކަށް 100 އަށް އަރައިފި ކަމަށާއި އަދި 10،000 އަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާ ކަމަށް ރިޕޯޓުތައް ބުނެފިއެވެ. 

މަންޒަރު ދުށް މީހުންނާ ހަވާލާދީ ރިޕޯޓުތައް ބުނާ ގޮތުން ލޮމްބޮކް އަށް އައި ބާރުގަދަ ބިންހެލުމާ ގުޅިގެން އެތައް ހާސް އިމާރާތެއް ހަލާކުވެ، މުވާސާލަތީ އަދި ކަރަންޓުގެ ޚިދުމަތަށް ވަނީ ބުރޫއަރާފައެވެ. އަދި ބިންހެލުން އައި ލޮމްބޮކްއާ ގާތުގައި އޮންނަ ގިލި އައިލެންޑްސްގައި ތިބި 1000 ފަތުރުވެރިއަކު ވެސް ވަނީ ރައްކާތެރި އެހެން ސަރަހައްދަކަށް ބަދަލުކޮށްފައެވެ. 

ފަރުބަދައަށް އެރުމަށާއި ރީތި ގޮނޑުދޮށްތަކުގެ ސަބަބުން ޓޫރިސްޓުންގެ މެދުގައި މަގުބޫލު ލޮމްބޮކްއަށް އާދީއްތަ ދުވަހު ބާރު ގަދަ ބިންހެލުމެއް އައިސްފައިވާ އިރު، އޭގެ ކުރީ ހަފްތާގެ އާދީއްތަ ދުވަހު ލޮމްބޮކްއަށް އައި ބިންހެލުމުގައި 16 މީހުން މަރުވެފައި ވެއެވެ.

ދުނިޔޭގެ އެކި ކަންކޮޅުތަކުގެ ޓޫރިސްޓުން ޝައުގެވެރިވާ ލޮމްބޮކް އޮންނަނީ ޓޫރިސްޓް މަންޒިލެއް ކަމަށްވާ ބާލީގެ އިރުން 40 ވަރަކަށް ކިލޯމީޓަރު ދުރުގައެވެ.

ބާލީ އާއި ލޮމްބޮކްގެ އާބާދީ ގާތްގަނޑަކަށް ހަތަރު މިލިއަނަށް އަރާ އިރު، އަހަރެއްގެ ތެރޭގައި ދެ ރަށަށް ޒިޔާރަތްކުރާ މީހުންގެ އަދަދު އެތައް މިލިއަނަކަށް އަރައެވެ.