ނ. އަތޮޅު ޤުރުއާން މުބާރާތް 2018 ނިންމައި ވަނަ ހޮވައިފި
ނ.އަތޮޅު ރައްޔިތުންގެ ހިތްތަކުގައި ކީރިތި ޤުރުއާނަށް ލޯބިޖެއްސުމުގެ މަގުސަދުގައި ކޮންމެ އަހަރަކު އެއްފަހަރު ކުރިއަށް ގެންދާ މުބާރާތެއް
ނ. އަތޮޅު ޤުރުއާން މުބާރާތް ނިންމުމުގެ ރަސްމިއްޔާތުގެ ތެރެއިން: ފޮޓޯ: ކައުންސިލް
ނ. އަތޮޅު ކައުންސިލުން ކޮންމެ އަހަރަކުވެސް ބާއްވަމުން އަންނަ "ނ.އަތޮޅު ޤުރުއާން މުބާރާތް 2018" ނިންމައި ވަނަ ހޮވައިފިއެވެ.
މަނަދޫ ކައުންސިލުން ބުނީ މި މުބާރާތަކީ ނ. އަތޮޅު ރައްޔަތުންގެ ހިތްތަކުގައި ކީރިތި ޤުރުއާނަށް ލޯބިޖެއްސުމާއި، ކީރިތި ޤުރުއާން ކިޔެވުމުގެ ފަންނާއި، ހުނަރު އާލާކޮށްދިރުވުމާއި، ގައުމީ އަދި ބައިނަލްއަގުވާމީ މުބާރާތްތަކުގައި ވާދަކުރެވޭފަދަ ދަރިވަރުން އުފެއްދުމުގެ މަގުސަދުގައި ނ. އަތޮޅުގެ ހުރިހާ ސްކޫލްތަކަށާއި، ޤުރުއާން ކްލާސްތަކަށް ހުޅުވާލައިގެން ކުރިއަށްގެންދިޔަ މުބާރާތެއް ކަމަށެވެ.
މިމަހު 2 ން 4 ށް މަނަދޫގައި ކުރިއަށް ގެންދިޔަ މި ޤުރުއާން މުބާރާތުގައި ނުވަ ރަށަކުން 8 އުމުރުފުރައިން 114 ދަރިވަރުން ބައިވެރިވެފައިވާ ކަމަށް ކައުންސިލުން ބުންޏެވެ.
މިމުބާރާތް ނިންމުމުގެ ރަސްމިއްޔާތުގެ ޝަރަފްވެރިކޮށްދެއްވީ ދިވެހިރާއްޖޭގެ ޤައުމީ ޔުނިވާސިޓީގެ ލޯ އެންޑް އިސްލާމިކް ސްޓަޑީޒްގެ ސީނިއަރ ލެކްޗަރަރ ޑރ. މުހައްމަދު އިޔާޒް އަބްދުއްލަތީފްއެވެ. މިމުބާރާތުގެ ހާއްސަ މެހްމާނުންގެ ގޮތުގައި ދިވެހިރާއްޖޭގެ އެންމެ އަލިގަދަތަރި ޖޫނިއަރގެ ފަޚުރުވެރި 1 ވަނަ އަދި 2 ވަނަ ހޯދާފައިވާ ނ.އަތޮޅުގެ ދެ ދަރިވަރުން ކަމަށްވާ އަލްހާފިޡު ނާދިޙް ޢަބުދުލްހަމީދާއި މުޙައްމަދު ޝާޢީ މުބާރިކް ވަނީ ބައިވެރިވެފައިވެއެވެ.
މިމުބާރާތް ނިންމުމުގެ ރަސްމިއްޔާތުގެ ޝަރަފްވެރިކޮށްދެއްވީ ޑރ އިޔާޒު
ކައުންސިލުން ބުނީ މިދެދަރިވަރުންނަށް އަތޮޅަށް ރީތިނަން ހޯދައިދީފައިވާތީ އެކަމުގެ އަގު ވަޒަންކުރުމުގެ ގޮތުން ނ.އަތޮޅު ކައުންސިލުން ފަރާތުން ހަނދާނީ އަށްޑަނައެއް އަރުވާފައިވާ ކަމަށެވެ.
މި މުބާރާތުގެ ބަލައިގެން ކިޔެވުމުގެ ގޮފީގެ 1 ވަނަ ހާސިލްކޮށްފައިވަނީ ހޮޅުދޫ ފާތިމަތު ރަހާ ޒުހުރީއެވެ. 2ވަނަ އާމިނަތު ޝިބާ އަހުމަދު، އަދި 3 ވަނަ ހާސިލްކޮށްފައިވަނީ މަނަދޫއަށް އުފަން ފާތިމަތު ލުބާނާ ޢަބުދުއްރަހުމާނެވެ.
މުބާރާތުގެ ނުބަލާ ކިޔެމުގެ ގޮފީގެ 1 ވަނަ ހޮޅުދޫ ސައިމް ބިންތު އައްބާސް ހާސިލްކޮށްފައިވާއިރު 2 ވަނަ ހާސިލްކޮށްފައިވަނީ މާފަރު ލަމްސާ މުހައްމަދެވެ. އަދި 3 ވަނަ ހާސިލްކޮށްފައިވަނީ ހޮޅުދޫ މުހައްމަދު ޒީކް ސިރާޖެވެ.
މުބާރާތުގެ 1 ވަނަ ރަށަކަށް ނ. ހޮޅުދޫ ހޮވިފައިވާއިރު 2 ވަނަ ރަށަކަށް ހޮވިފައިވަނީ ނ. މާފަރެވެ. އަދި 3 ވަނަރަށަކަށް ހޮވިފައިވަނީ ނ. ހެނބަދޫއެވެ.
މީގެ އިތުރުން އުމުރުފުރާތަކުގެ ވަނަތައްވެސް ވަނީ ހޮވާފައެވެ. މުބާރާތުގެ 1ވަނަ، 2ވަނަ އަދި 3ވަނައަށް ހޮވުނު ރަށްރަށަށް އެވޯރޑްދީފައިވާ ކަމަށް ވެސް ކައުންސިލުން މައުލޫމާތުދެއެވެ.
މިޤުރުއާން މުބާރާތުގެ ބަލައިގެން ކިޔެވުމުގެ ގޮފީގެ 1ވަނަ އަށް އަސްކޮއި އިންވެސްޓްމަންޓްގެ ފަރާތުން އުމުރާ ދަތުރެއް އަދި ނުބަލާކިޔެވުމުގެ ގޮފީގެ 1 ވަނައަށް ފިއުލް އެކްސްޕްރެސް މޯލްޑިވްސްގެ ފަރާތުން ވަނީ އުމުރާދަތުރެއް ދީފައެވެ.
