ލޮމްބޮކް: ބިންހެލުމުގައި މަރުވި މީހުންގެ އަދަދު 82 އަށް އަރައިފި
6 އޯގަސްޓު 2018 | ހޯމަ 04:34ބިންހެލުން އައިސްފައިވަނީ 7 މެގްނިޓިއުޑްގައި
5 އޯގަސްޓް 2018 ގައި އިންޑޮނީޝިއާގެ ލޮމްބޮކްއަށްއައި ބިންހެލުމުގައި ވެއްޓިފައިވާ އިމާރާތްތަކެއް
އިންޑޮނީޝިއާގެ ރަށެއްކަމަށްވާ ލޮމްބޮކްއަށް އާދީއްތަ ދުވަހުއައި ބާރުގަދަ ބިންހެލުމުގައި މަރުވި މީހުންގެ އަދަދު 82 އަށް އަރައިފިއެވެ.
އޮފިޝަލުން ވިދާޅުވާގޮތުގައި އެތައް ސަތޭކަ ބަޔަކު ޒަޚަމްވެފައިވާއިރު މަރުވި މީހުންގެ އަދު އަދިވެސް އިތުރުވާނެކަމަށް ބެލެވެއެވެ.
ބިމުގެ އެއްމެ 10 ކިލޯމީޓަރު އަޑިން އައި މި ބިންހެލުން އައިސްފައިވަނީ ރިކްޓަރ މިންގަނޑުން 7 ގެ ބާރުމިނުގައެވެ. ބިންހެލުމުގައި އެތައް އިމާރާތެއްވެއްޓި ކަރަންޓުގެ ޚިދުމަތްވަނީ ކެނޑިއެވެ.
ލޮމްބޮކްގެ އަވަށްޓެރި ބާލީގެ ވީޑިއޯ ފުޓޭޖަކުން ފެންނަ ގޮތުގައި އެރަށުގައިވެސް ގެތަކުން ނުކުމެ ހަޅޭއްލަވަމުން މީހުން ދުވާ މަންޒަރުފެނެއެވެ.
ސުނާމީގެ އިންޒާރެއް ނެރުނު ނަމަވެސް މަދު ގަޑިއިރުތަކެއްގެ ތެރޭގައި އިންޒާރުވަނީ އުވާލާފައެވެ.
ފަރުބަދައަށް އެރުމަށާއި ރީތި ގޮނޑުދޮށްތަކުގެ ސަބަބުން ޓޫރިސްޓުންގެ މެދުގައި މަގުބޫލު ލޮމްބޮކްއަށް އާދީއްތަ ދުވަހު ބާރުގަދަ ބިންހެލުމެއް އައިސްފައިވާއިރު އޭގެ ކުރީހަފްތާގެ އާދީއްތަ ދުވަހު ލޮމްބޮކްއަށް އައި ބިންހެލުމުގައި 16 މީހުން މަރުވެފައިވެއެވެ.
ދުނިޔޭގެ އެކި ކަންކޮޅުތަކުގެ ޓޫރިސްޓުން ޝައުގެވެރިވާ ލޮމްބޮކް އޮންނަނީ ޓޫރިސްޓް މަންޒިލެއް ކަމަށްވާ ބާލީގެ އިރުން 40 އަކަށް ކިލޯމީޓަރު ދުރުމިނުގައެވެ.
ބާލީއާއި ލޮމްބޮކްގެ އާބާދީ ގާތްގަނޑަކަށް ހަތަރު މިލިއަނަށްއަރާއިރު އަހަރެއްގެ ތެރޭގައި ދެ ރަށަށް ޒިޔާރަތްކުރާ މީހުންގެ އަދަދު އެތައް މިލިއަނަކަށް އަރައެވެ.
