ރައްޔިތުންގެ ތިޖޫރީގެ ތަޅުދަނޑި ރައީސް އަބްދުﷲ ޔާމީންއާ ހަވާލު ކުރުމަށް އިތުބާރު ނުކުރައްވާ ކަމަށް ކުރީގެ ޔޫތު މިނިސްޓަރު މުހައްމަދު މަލީހް ޖަމާލް ވިދާޅުވެއްޖެއެވެ.
ގުޅިފައިވާ ޕާޓީތަކުން ވ. އަތޮޅާއި މ. އަތޮޅަށް ކުރަމުންދާ ދަތުރުގައި މ. ދިއްގަރުގައި ބޭއްވި ޖަލްސާގައި ދައްކަވަމުން މަލީހު ވިދާޅުވީ ރައްޔިތުންގެ ތިޖޫރީގެ ތަޅުދަނޑި ރައީސް ޔާމީންއާ ހަވާލު ކުރެއްވުމަށް އިތުބާރު ނުކުރައްވާ ކަމަށާއި އެ އިތުބާރު ނުކުރައްވާ ސަބަބަކީ އެ މަނިކުފާނުގެ ގެކޮޅަށް ވެސް ހަރާން ފައިސާ ވަންނަ ކަމަށް ރައީސް އަބްދުﷲ ޔާމީން އަމިއްލަފުޅަށް ވިދާޅުވެފައިވާތީ ކަމަށެވެ.
ރައީސް ޔާމީންގެ ވެރިކަން ނިންމަން ޖެހެނީ އިންތިހާއަށް އަނިޔާވެރި ވެފައިވާތީ ކަމަށާއި ރައްޔިތުން މަޖިލީހަށް ދިއްގަރު ދާއިރާއިން ހޮވި ދެ މެމްބަރުންނަށް ޖަލުގައި ނުހައްޤުން އަނިޔާ ދެމުންދާ ކަމަށް މަލީހު ވިދާޅުވިއެވެ.
މަލީހު ވިދާޅުވީ ހުރިހާ އެންމެންވެސް ރައީސް ޔާމީން ބަލިކުރަން ވޯޓު ދޭން ޖެހޭނެ ކަމަށާއި ވޯޓު ދޭން ޖެހޭ ސަބަބަކީ ސިޔާސީ ލީޑަރުން ޖަލުގައި ބަންދުކޮށްގެން ގެންގުޅުއްވާތީ ކަމަށެވެ.
"ބަލި ކުރަން ޖެހެނީ ރައީސް ޔާމީން، ރައީސް މައުމޫން ޖަލުގައި ބަހައްޓަވާތީ، ފާރިސް މައުމޫން ޖަލުގައި ބަހައްޓަވާތީ، މި އޮތަޅުގެ ދަރިއެއް ކަމުގައިވާ ޝެއިހް އިމްރާން ޖަލުގައި ބަހައްޓަވާތީ، ޤާސިމް އިބްރާހީމް ޖަލުގައި ބަހައްޓަވާތީ އަދި ކުރީގެ ރައީސް މުހައްމަދު ނަޝީދު ވެސް ޖަލުގައި ބަހައްޓަވާތީ، އެތައް ރައްޔިތުން ޖަލުގައި ބަހައްޓަވާ ރައީސެއް އަޅުގަނޑުމެން ބޭނުމެއް ނޫން،" މަލީހް ވިދާޅުވިއެވެ.
ރައީސް ޔާމީން ބަލި ކުރައްވާނީ ބޮޑުތަނުންކަން ފާހަގަކުރައްވާ މަލީހު ވިދާޅުވީ ޕީޕީއެމްގެ ކުރީ ސަފަށް މިހާރު ނެރުއްވައިގެން އުޅުއްވާ ބައެއް ބޭފުޅުން ދައްކަވާ ވާހަކަތަކަށް ރައްޔިތުން ވޯޓްދޭން ބޭނުން ނުވާ ކަމަށެވެ.
"މިއަދު އަޅުގަނޑުމެންނަށް ރައީސް ޔާމީންގެ އަރިހުން ފެނިވަޑައިގަންނަވަނީ ތިމަންނައަކީ ކޯޓުތަކުގެ އުއްތަމަ ފަނޑިޔާރޭ ވިދާޅުވި ރީކޯ މޫސަ އާއި ޓިނު ވިއްކަން އުޅުއްވި އަބްދުއް ރަހީމްއާ ނިހާނުމެން ފަދަ ބޭފުޅުން، މި ބޭފުޅުންނަށް ތިބޭފުޅުން އިތުބާރު ކުރައްވާނެތޯ؟ އަޅުގަނޑުމެން ބޭނުމެއް ނުވޭ ނިހާންއާ އަބްދުއް ރާހީމްއާ ރީކޯ މޫސަމެންގެ ސިޔާސަތުތަކަށް ތާއިދުކޮށް އެއަށް ވޯޓު ދޭކަށް، އަޅުގަނޑުމެން ރައީސް ޔާމީން ބަލިކުރާނީ ބޮޑުތަނުން" މަލީހު ވިދާޅުވިއެވެ.
