ސިޔާސީ ޕާޓީއެއް އުފައްދަން ހަސީނަށް ހުއްދަދީފި
މޯލްޑިވްސް ލޭބަރ އެންޑް ސޯސަލް ޑިމޮކްރެޓިކް ޕާޓީގެ ނަމުގައި
އަބްދުﷲ ހަސީނު
ސިޔާސީ ޕާޓީއެއް އުފެއްދުމުގެ ހުއްދަ ގާނޫނީ ވަކީލު އަބްދުﷲ ހަސީނަށް އިލެކްޝަންސް ކޮމިޝަނުން ދީފިއެވެ.
އިލެކްޝަންސް ކޮމިޝަނުން ބުނީ މޯލްޑިވްސް ލޭބަރ އެންޑް ސޯސަލް ޑިމޮކްރެޓިކް ޕާޓީގެ ނަމުގައި ސިޔާސީ ޕާޓީއެއް އުފެއްދުމަށްޓަކައި ކުރަންޖެހޭ ކަންކަން ކުރުމުގެ ހުއްދަ އެކޮމިޝަނުން ދީފައިވާ ކަމަށެވެ.
ސިޔާސީ ޕާޓީއެއް އުފައްދަން ހަސީން އިލެކްޝަންސް ކޮމިޝަނަށް ހުށަހަޅަފައިވަނީ މިދިއަ ޖުލައި މަހުގެ 25 ވަނަ ދުވަހު އެވެ.
މިދިއަ ޖުލައި މަހު އެމްޑީޕީން ވަކިވެ ވަޑައިގެންނެވި ހަސީން ވިދާޅުވެފައި ވަނީ ސިޔާސީ އާ ޕާޓީއެއް އުފެއްދެވުމަށް ނިންމެވީ އެމްޑީޕީއާ އެއްވެސް މައްސަލައެއް ޖެހިގެން ނޫން ކަމަށެވެ.
މިހާތަނަށް ސިޔާސީ ދާއިރާގައި ހަމައެކަނި އެމްޑީޕީގެ ހަރާތްތަކުގެ އިސް ސަފުން ފެނިފައިވާ ހަސީން ވިދާޅުވެފައި ވަނީ މިއީ އެއްވެސް ސިޔާސީ ޕާޓީ އަކާއި އިދިކޮޅަށް ވެސް އަދި އެއްކޮޅަށް ވެސް އުފައްދާ ޕާޓީއެއް ނޫން ކަމަށެވެ.
ޕާޓީއެއް އުފެއްދުމުގެ މަގުސަދަކީ މަސައްކަތްތެރިންގެ ހައްގުތަކާއި އިޖުތިމާއީ އަދާލަތު ގާއިމުކުރުމަށް ފުޅާ ދާއިރާއެއްގައި މަސައްކަތް ކުރުން ކަމަށް އޭނާ ވިދާޅުވެފައި ވެއެވެ.
ޕާޓީ އުފެއްދުމާ ގުޅޭ ގޮތުން އީސީ އިން ހުއްދަ ދިނުމާއެކު އިތުރު ތަފްސީލްތައް ހާމަ ކުރައްވާނެ ކަމަށް ހަސީން ވިދާޅުވެފައި ވެއެވެ.
މިއަހަރުގެ އޭޕްރީލް މަހުގެ ތެރޭގައި ވެސް ސިޔާސީ ދެ ޕާޓީއެއް އުފައްދަން އީސީއަށް ހުށަހަޅި އެވެ. ނަމަވެސް ބައެއް ޝަރުތުތައް ފުރިހަމަ ނުވާ ކަމަށް ބުނެ އެ ދެ ޕާޓީ އުފެއްދުމުގެ ހުއްދަ އިލެކްޝަންސް އިން ދީފައެއް ނުވެއެވެ.
