އަޅުގަނޑުމެންގެ ސަރުކާރެއްގައި ބޭކާރު ގޮތުގައި ފައިސާ ބޭނުމެއް ނުކުރާނަން: ފައިސަލް
5 އޯގަސްޓު 2018 | އާދީއްތަ 07:49ހަމަ ހަމަ ކަމާއެކު ކަންކަން ކޮށްދޭނަން
އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހްގެ ރަނިންމޭޓް ފައިސަލް ނަސީމް ވ. ތިނަދޫގައި ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަނީ
ވ. ތިނަދޫ: ގުޅިފައިވާ ސިޔާސީ ޕާޓީތަކުން އެކުލަވާލާ ސަރުކާރެއްގައި ދައުލަތުގެ ފައިސާ ބޭކާރު ނުކުރާނެ ކަމަށް އިދިކޮޅު ކޯލިޝަނުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހްގެ ރަނިންމޭޓް ފައިސަލް ނަސީމް ވިދާޅުވެއްޖެއެވެ.
އާދިއްތަ ދުވަހު ވ.ތިނަދޫއަށް ވަޑައިގެން ފައިސަލް ވިދާޅުވީ މި ސަރުކާރުން މާލޭގައި ދައުލަތުގެ ފައިސާ ބޭނުން ކޮށްގެން ކުރާ މަސައްކަތްތައް ދެތިން ފަހަރު ކުރަމުން ގޮސް އެ ފައިސާ އިސްރާފު ކުރަމުންދާ ކަމަށެވެ. ލޯކަލް ޓޫރިޒަމް ފުޅާވަމުން އަންނަ ތިނަދޫގައި އެންމެ އަސާސީ ޚިދުމަތްތައް ލިބެމުން ނުދާކަން ފައިސަލް ފާހަގަ ކުރެއްވިއެވެ.
އެގޮތުން ރަނގަޅު ސިއްހީ ޚިދުމަތެއް ނުދެވޭއިރު ނަރުދަމާގެ ޚިދުމަތްވެސް ތިނަދޫގައި ނެތްކަން ފައިސަލް ފާހަގަ ކުރެއްވިއެވެ. މީގެ އިތުރުން ފައިސަލް ވިދާޅުވީ، ގުޅިފައިވާ ޕާޓީތަކުން އެކުލަވާލާ ސަރުކާރުގައި ކަންކަން ނުފުދިގެން "ފަހަތަކުން ދުވާކަށް ރައްޔިތުނަކަށް ނުޖޭހެނެ" ކަމަށެވެ. އަދި އޭރުން ސަރުކާރުން ކަންކަން ކުރަމުންދާނީ ވަކި ތަރުތީބަކުން އިސްކަން ދޭން ޖެހޭ ރަށްތަކަށް އިސްކަން ދީގެން އެއްވެސް ރަށެއްގެ މެދުގައި ތަފާތުކުރުމެއް ނެތި ކަމަށްވެސް ފައިސަލް ވިދާޅުވިއެވެ.
"ދައުލަތުގެ ބަޖެޓު ބޭނުން ހިފާނީ ރައްޔިތުންނަށްޓަކައި ކަމުގެ ޔަގީންކަން ހުރިހާ ރައްޔިތުންނަށް އަރުވަން. އަޅުގަނޑުމެން ބޭކާރުގެ ގޮތުގައި ފައިސާ ބޭނުން ނުކުރާނަން،" ފައިސަލް ވިދާޅުވިއެވެ.
ވ.އަތޮޅުގެ ރަށްތަކުން ފެންނަ ރީތި މަންޒަރަކީ ގުދުރަތީ ރީތިކަން ބޭރުގެ ފަތުވެރިންނަށް ވިއްކައިގެން ފައިސާ ހޯދާތަން ކަމަށް ފައިސަލް ވިދާޅުވިއެވެ. އަދި ވިދާޅުވީ ތިނަދޫ ވެގެންދާނީ ރާއްޖޭގެ އިގުތިސާދަށް ވަރަށް ބޮޑު ފައިދާއެއް ލިބިގެންދާ ރަށަކަށް ކަމަށެވެ. އެހެން ނަމަވެސް ސްކޫލެއް ނެތް ތިނަދޫގައި އެކަށީގެންވާ މިސްކިތެއް ވެސް އަދި ނަރުދަމާގެ ނިޒާމެއް ވެސް މިހާރު ނެތްކަން ފައިސަލް ފާހަގަ ކުރެއްވިއެވެ.
