ގޮއްވާލެވޭ ޑްރޯންއެއް ބޭނުން ކޮށްގެން އަވަހާރަ ކޮށްލުމަށް ދޭން އުޅުނު ހަމަލާއަކުން ސަލާމަތްވެވަޑައިގެންފި ކަމަށް ވެނެޒުއޭލާގެ ރައީސް ނިކޮލަސް މަޑޫރޯ ވިދާޅުވެއްޖެއެވެ.
ކުރިމަތިވެ ވަޑައިގެންނެވި ކަމަށް ބެލެވޭ ހަމަލާ ކުރިމަތިވެވަޑައިގެންފައި ވަނީ އަސްކަރިއްޔާއަށް 81 އަހަރު ފުރުން ފާހަގަ ކުރުމަށް ވެރިރަށް ކަރާކަސްގައި އަސްކަރިއްޔާއިން ބޭއްވި ހަރަކާތެއްގައި ވާހަކަ ދައްކަވަމުންގެންދަވަނިކޮށެވެ.
ވަގުތުން ދެއްކި ވީޑިއޯ ފުޓޭޖުން ފެންނަ ގޮތުގައި ހައިރާންވެ ވަޑައިގެން މަޑޫރޯ ކުއްލިގޮތަކަށް މައްޗަށް ބައްލަވަން ހުންނެވިއިރު ސިފައިން ކޮޅުކޮޅު މައްޗަށް ދުވާ މަންޒަރު ފެނެއެވެ.
މަޑޫރޯވަނީ އެ ހަމަލާގެ ފަހަތުގައިވަނީ ކޮލަމްބިއާ ކަމަށް ތުހުމަތު ކުރައްވާފައެވެ.
ނަމަވެސް އެއީ އެއްވެސް އަސާސެއް ނެތް ތުހުމަތެއް ކަމަށް ބުނެ އެ ވާހަކަ ދޮގު ކޮށްފައެވެ.
މަޑޫރޯ ވިދާޅުވީ މި ހަމަލާގެ ފަހަތުގައި ހުންނެވީ ކޮލަމްބިއާގެ ރައީސް ހުއާން މެނުއެލް ސަންތޯސް ކަމާއިމެދު "އެއްވެސް ޝައްކެއް ނެތް" ކަމަށެވެ.
ސިފައިންގެ ހަތް މީހުން ޒަޚަމްވެފައިވާއިރު،ހަމަލާއަށް ފަހު އެތައް ބަޔަކު ހައްޔަރުކޮށްފައިވާ ކަމަށް އެގައުމުގެ އިދާރާތަކުން ބުނެއެވެ.
ކޮމިއުނިކޭޝަން މިނިސްޓަރ ޖޯޖް ރޮޑްރިގޭޒް ވިދާޅުވީ ގޮވާތަކެތި ބަރުކޮށްފައިވާ ދެ ޑްރޯންއެއް ރައީސް މަޑޫރޯ ވާހަކަ ދެއްކެވުމަށް ހުންނެވުމަށް ހަމަޖައްސާފައިވާ ސްޓޭންޑް ކައިރިން ދަތުރުކޮށްފައިވާ ކަމަށެވެ.
އޭގެ ފަހުން ގައުމާ މުޚާތަބު ކުރައްވައި މަޑޫރޯ ވިދާޅުވީ "އުދުހިފައި ދިޔަ އެތި ގޮވީ އަޅުގަނޑުގެ ކައިރިން،ބާރުގަދަ ގޮވުމެއް. ސިކުންތުކޮޅެއްފަހުން ދެވަނަ ގޮވުމެއް ގޮއްވާލި"
ސޯޝަލް މީޑިއާގައި ދައުރުވެފައި ހުރި ފޮޓޯތަކުން ފެންނަ ގޮތުގައި ބުލެޓް ޕްރޫފް ޝީލްޑް އަޅައިގެންތިބި ބޮޑީގާޑުން މަޑޫރޯއަށް ރައްކާތެރިކަންދޭ މަންޒަރުފެނެއެވެ.
