ވެނެޒުއޭލާގެ އާ ގާނޫނު ހަދާ މަޖިލިސް އިފްތިތާހް ކުރުން ހުއްޓުވުމަށް ކޯޓަށް!

ވެނެޒުއޭލާގެ ގާނޫނު އަސާސީ އަލުން އެކުލަވާލުމަށްޓަކައި އަލަށް އިންތިޚާބު ކުރި ގާނޫނު ހަދާ މަޖިލިސް އިފްތިތާހްކުރުން ހުއްޓުވުމަށް އެދި އެގައުމުގެ ޕްރޮސިކިއުޓަރުގެ އޮފީހުން ކޯޓަށް ހުށަހަޅައިފިއެވެ.

ހުކުރު ދުވަހު ބާއްވާ އާ މަޖިލިސް އިފްތިތާހް ކުރުމުގެ ރަސްމިއްޔާތު ހުއްޓުވުމަށް އެދި ކޯޓަށް ހުށަހެޅީ އިންތިޚާބުގައި މަކަރު ހެދި ކަމަށް ބުނެއެވެ. ވެނެޒުއޭލާގެ ޗީފް ޕްރޮސިކިއުޓަރު ދަނީ އިންތިޚާބުގައި މަކަރު ހެދި ކަމަށް ކުރެވޭ ތުހުމަތު ތަހުގީގު ކުރަމުންނެވެ. ރައީސް ނިކޮލަސް މަޑޫރޯ ވަނީ އިންތިޚާބުގައި މަކަރުު ހެދި ކަމަށް ކުރެވޭ ތުހުމަތު ދޮގުކުރައްވާފައެވެ.

އާ މަޖިލިސްގެ އިންތިޚާބަށް ވޯޓިން ސިސްޓަމް ފޯރުކޮށްދިން ފާމަކުން ވެސް ވަނީ އިންތިޚާބުގެ ނަތީޖާ އޮޅުވާލި ކަމަށް ތުހުމަތުކޮށްފައެވެ. ގާނޫނު ހަދާ އާ މަޖިލީހުގެ އިންތިޚާބު ބޭއްވި ސަބަބުތަކެއް އެބަހުއްޓެވެ.

ރައީސް މަޑޫރޯ ގައުމުގައި ހަމަނުޖެހުން ހިނގާ ކަމަށް ގަބޫލުފުޅު ކުރައްވައެވެ. ސަރުކާރުގެ އެކި ވުޒާރާތަކުގެ މެދުގައި ގުޅުމާއި އެއްބާރުލުން އޮންނަން ޖެހޭ ވަރަށް ނެތްކަންވެސް ގަބޫލުފުޅު ކުރައްވައެވެ. ގައުމުގެ ހަމަޖެހުން ގާއިމު ކުރައްވައި އަދި ދައުލަތުގެ ވުޒާރާތަކުގެ މެދުގައި އެއްބައިވަންތަކަން ގާއިމު ކުރުމަށްޓަކައި މަޑޫރޯ ވިދާޅުވަމުން ގެންދެވީ އަލުން ގާނޫނު އަސާސީ އެކުލަވާލުމަށް ބޭނުންވާ ކަމަށެވެ. އެކަމަށްޓަކައި ގާނޫނު އަސާސީ އެކުލަވާލުމަށް ގާނުނު ހަދާ މަޖިލީހެއް ބޭނުންވާ ކަަމަށެވެ.

ވެނެޒުއޭލާގެ ނެޝަނަލް އިލެކްޓޯރަލް ކައުންސިލުން ބުނެފައި ވަނީ ރައީސް ނިކޮލަސް މަޑޫރޯގެ ވެރިކަންކުރާ ސޯޝަލިސްޓް ޕާޓީއަށް ގާނޫނު އަސާސީ އެކުލަވާލާ މަޖިލީހެއް ވުޖޫދަށް ގެނައުމަށް އަށް މިލިއަނަށް ވުރެ ގިނަ މީހުން އާނބަސް ދީފައިވާ ކަމަށެވެ. ކައުންސިލުގެ ރައީސް ޓިބިސޭ ލުސެނާ އިއުލާން ކުރައްވާފައި ވަނީ ވޯޓު ލާން ނިކުތް މީހުންގެ އަދަދަކީ 41.53 އިން ސައްތަ ކަމަށެވެ. އިންތިޚާބުގެ ނަތީޖާ އާއި ގުޅޭ ގޮތުން ރައީސް މަޑޫރޯ ވިދާޅުވެފައި ވަނީ އިންތިޚާބަކީ އިންގިލާބަށް ލިބުނު ކާމިޔާބެއް ކަމަށެވެ. އިދިކޮޅު ފަރާތްތަކުން ބުނެފައި ވަނީ ވޯޓުލާން ނިކުމެފައި ވަނީ ދެތިން މިލިއަނެއްހާ މީހުން ކަމަށެވެ. މިނިވަން އިތުބާރު ކުރެވޭ ދިރާސާއެއްގައި ބުނެފައި ވަނީ ވޯޓުލާން ނިކުމެފައި ވަނީ 3.6 މިލިއަނެއްހާ މީހުން ކަމަށެވެ.

ވެނެޒުއޭލާގެ ސިޔާސީ މަސްރަހު ހަަލަބޮލިވެފައިވާ އިރު ރައްޔިތުން ބޭއްވި ތަފާތު މުޒާހަރާތަކުގައި މިދިޔަ އޭޕްރިލްއިން ފެށިގެން އެ ގައުމުގައި މަދުވެގެން 122 މީހުން މަރުވެ އަދި 2000 އާ ގާތްކުރާ އަދަދަކަަށް މީހުން މަރުވެފައިވެއެވެ.