ވެނެޒުއޭލާގެ ގާނޫނު ހަދާ މަޖިލީހަށް ބަޔަކު ވަދެ ހަމަނުޖެހުން ހިންގައިފި
ގާނޫނު ހަދާ މަޖިލީހަށް ވަދެގަނެ ހަމަނުޖެހުން ހިންގީ ސަރުކާރަށް ތާއިދު ކުރާ ބަޔަކު
ގާނޫނު ހަދާ މަޖިލީހުގެ މެމްބަރަކު ފަރުވާ އަށް ގެންދަނީ
ވެނެޒުއޭލާގެ އިދިކޮޅު ފަރާތްތަކުގެ ކޮންޓްރޯލް އޮންނަ އެގައުމުގެ ގާނޫނު ހަދާ މަޖިލީހުގެ ތެރެއަށް ސަރުކާރަށް ތާއިދު ކުރާ ބަޔަކު ވަދެ ހަމަނުޖެހުން ހިންގައިފިއެވެ.
ސަތޭކަ ވަރަކަށް މީހުން ވަދެ ހިންގި ހަމަނުޖެހުންތަކުގައި، ގާނޫނު ހަދާ މަޖިލީހުގެ މެމްބަރުންގެ ގައިކޮޅަށް އަތްލާ، އަނިޔާ ކުރިއިރު މިކަން ހިނގީ އެގައުމުގެ މިނިވަން ދުވަސް ފާހަގަ ކުރުމަށް ބޭއްވި ހާއްސަ ސެޝަނަށް ފަހުގައެވެ.
ބުދަ ދުވަހު ގާނޫނު ހަދާ މަޖިލީހުގެ ތެރެއަށް ވަދެގަތް މީހުން ވައިން އިރު ގާނޫނު ހަދާ މަޖިލީހުގެ ބޭރުގައި މިލިޓްރީ ޕޮލިސް ގާޑް ކުރަން ވެސް ތިއްބެވެ. ހަަމަލާ ދޭން ވައިން މީހުން ވަނީ ދަނޑިގަނޑު އަދި ހޮޅި ފަދަ ތަކެތި ހިފައިގެންނެވެ.
ހަމަނުޖެހުން ހިނގިއިރު އެތެރޭގައި ބޭރަށް ނުނިކުމެވި ތިބި މީހުންގެ ތެރޭގައި ނޫސްވެރިންނާއި، ސްކޫލް ކުދިންނާއި އަދި އެހެނިހެން، ބޭރުން އައިސް ތިބި މީހުން ހިމެނެއެވެ. ފަސްވަރަކަށް ގާނޫނު ހަދާ މަޖިލީހުގެ މެމްބަރުން ޒަޚަމްވިއެވެ. އަދި ނޫސްވެރިންތަކެއް ވެސް ޒަޚަމްވި ކަމަށް ރިޕޯޓުތައް ބުނެއެވެ.
ވެނެޒުއޭލާގެ ސަރުކާރުން ހާދިސާ ތަހުގީގު ކުރާނެ ކަމަށް ވައުދުވެފައި ވާއިރު އިގްތިސާދީ ގޮތުން ފުން ވަޅުގަނޑެއްގެ ތެރޭގައި ވެނެޒުވޭލާގައި ދަނީ ބޮޑެތި މުޒާހަރާތަކެއް ވެސް ބާއްވަމުންނެވެ.
ދާދި ފަހުން ވަނީ ވަގަށް ނަގާފައިވާ ފުލުހުންގެ ހެލިކޮޕްޓަރަކުން ވެނެޒުއޭލާގެ ސްޕްރީމް ކޯޓަށް ވެސް ހަަމަލާ ދީފައެވެ. އޮފިޝަލުން ބުނެފައިވަނީ ސްްޕްރީމް ކޯޓުގެ އިމާރާތަށް ހަމަލާ ދިނީ އަތު ބޮން ބޭނުންކޮށްގެން ކަމަށާއި އެގޮތުން ހަމަލާ ދިނީ ހެލިކޮޕްޓަރުން ހަތަރު ބޮން އެއްލައިގެން ކަމަށެވެ. މީގެ އިތުރުން ވެނެޒުއޭލާގެ އިންޓީރިއާ މިނިސްޓްރީގެ އިމާރާތަށް ވެސް ހެލިކޮޕްޓަރުން ދާދި ފަހުން ބަޑި ޖަހާފައި ވެއެވެ.
