އިބޫގެ ކެމްޕެއިން ފޯރިގަދަކޮށް މާލޭގައި ޕޯސްޓަރުތައް ތަތްކުރަން ފަށައިފި
3 އޯގަސްޓު 2018 | ހުކުރު 13:52ޕޯސްޓަރުތަކުގައި ލީޑަރުންގެ ފޮޓޯ ހިމެނޭ
އިބޫ މާލޭގައި މިއަދު ކެމްޕެއިން ޕޯސްޓަރުތަކެއް ތަތްކުރައްވަނީީ:- ކެމްޕެއިންގެ ފޯރި ވަނީ ގަދަކޮށްފައި
އިދިކޮޅު ކޯލިޝަނުގެ ކެންޑިޑޭޓް އިބްރާހިމް މުހައްމަދު ސޯލިހުގެ ކެމްޕެއިންގެ ފޯރި މާލޭގައި އިތުރުކޮށް ޕޯސްޓަރުތައް ތަތްކުރަން ފަށައިފި އެވެ.
އިބޫގެ ކެމްޕެއިން ޕޯސްޓަރުތައް މާލޭގައި އެކި ސަރައްދުގައި ތަތްކުރުމުގެ ހަރަކާތް ހުކުރު ދުވަހުގެ ހަވީރު ފައްޓަވައި ދެއްވީ އިބޫ އަދި އެމަނިކުފާނުގެ ރަނިންގމޭޓް ފައިސަލް ނަސީމެވެ. މި ހަރަކާތް ފައްޓަވައި ދެއްވަމުން އިބޫ ވިދާޅުވީ ޕޯސްޓަރު ތަތްކުރުމުގެ ހަރަކާތަކީ ކެމްޕެއިންގެ ވަރަށް މުހިންމު ހަރަކާތެއް ކަމަށެވެ. އަދި ވިދާޅުވީ މާލެއިން ވެސް އަދި ރާއްޖޭގެ އެހެން ހުރިހާ ހިސާބަކުން ވެސް ފެންނަނީ މިހާރުގެ ސަރުކާރު ބަދަލު ކުރަން ބޭނުންވެފައިވާ މިންވަރު ކަމަށެވެ.
"އިރާދަކުރެއްވިއްޔާ މަންޒަރު ފެންނަނީ ވަރަށް ސާފުކޮން. ރާއްޖޭގެ އެކި ކަންކޮޅުތަކުން މިކަން ނިންމުމަށް ބޭނުންވެފައި ތިބި އެތައް ބަޔަކު އެބަ ތިބި. އަޅުގަނޑުމެން މި ކުރާ ދަތުރުތަކުގައި އެކަން ވަރަށް ސާފުކޮށް އެބަ ފެނިގެންދޭ. އަދި އެހެންމެ މާލެއިން ވެސް އަޅުގަނޑުމެނަށް ފެންނަނީ އެ ރޫހުގައި ތިބިތަން." އިބޫ ވިދާޅުވި އެވެ.
މީގެ އިތުރުން ކެމްޕެއިން ޕޯސްޓަރު ތަތްކުރުމުގެ އިތުރުންވެސް ކެމްޕެއިންގެ ހަރަކާތްތައް ކުރިއަށް ގެންދަވާނެ ކަމަށެވެ.
މިއަދު ކެމްޕެއިން ޕޯސްޓަރު ހަރު ކުރުމަށް ކުރިއަށް ގެންދިޔަ ހަރަކާތުގައި ޕޯސްޓަރުތައް ހިފައިގެން
ކެމްޕެއިން ޕޯސްޓަރު ތަތްކުރުމުގެ ހަރަކާތް ކުރިއަށް ގެންގޮސްފައިވަނީ އިބޫ އާއި ފައިސަލް ވަކިވަކިން މާލޭގެ ދެ ސަރައްދެއްގައި އެވެ. މި ހަރަކާތުގައި އިދިކޮޅު ކޯލިޝަނަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ މެމްބަރުންނާއި ޕާޓީތަކުގެ އިސް ބޭފުޅުންނާއި މާލޭ ސިޓީ ކައުންސިލްގެ މެމްބަރުން ބައިވެރިވެވަޑައިގެންނެވި އެވެ.
ކެމްޕެއިން ޕޯސްޓަރުތަކުގައި ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ބާނީ ގާސިމް އިބްރާހިމާއި ކުރީގެ ރައީސް މައުމޫނު އަބްދުލްގައްޔޫމްގެ އިތުރުން އަދާލަތު ޕާޓީގެ ލީޑަރު ޝެއިހް އިމްރާން އަބްދުﷲ ގެ ފޮޓޯ ހިމެނެ އެވެ.
މާލޭގައި އިދިކޮޅު ކޯލިޝަނުން ކެމްޕެއިން ހަރަކާތްތައް ފަށާއިފައިވާއިރު ނިމިގެން ދިޔަ އިންތިހާބުތަކުގައި މާލޭގެ އަގުލަބިއްޔަތު ލިބިފައިވަނީ އެމްޑީޕީ އަށެވެ. މާލޭގައި ޕޯސްޓަރު ތަތްކުރުމުގެ ހަރަކާތް ފެށިއިރު މާލޭގެ އެކި ގެތަކަށް އިބޫ ވަނީ ޒިޔާރަތް ކުރައްވާފަ އެވެ. އަދި މާލޭގައި ކޯލިޝަނުގެ ކެމްޕެއިން ޖަގަހަތައް ވެސް ވަނީ ހުޅުވާފަ އެވެ.
