ރައީސް ޔާމީން އެންމެ ފަހުން މާލީ ބަޔާން ހުށަހެޅުއްވި އަހަރެއް ތަރުޖަމާނު ވިދާޅެއް ނުވި!
31 ޖުލައި 2018 | އަންގާރަ 11:00ރައީސް ވަނީ ވެރިކަމަށް ވަޑައިގެން މާލީ ބަޔާން ހުށަހަޅުއްވާފައި
ރައީސް އޮފީހުގެ ތަރުޖަމާން އިބްރާހީމް މުއާޒް އަލީ
ޤާނޫނު އަސާސީ ގައިވާ ގޮތަށް ރައީސް އަބްދުﷲ ޔާމީން އޮޑިޓަރ ޖެނެރަލަށް ހުށަހަޅުއްވަން ޖެހޭ މާލީ ބަޔާން އެންމެފަހުން ހުށަހެޅުއްވި އަހަރެއް، ރައީސް އޮފީހުގެ ތަރުޖަމާން އިބްރާހީމް މުއާޒް އަލީ ވިދާޅެއް ނުވިއެވެ.
ޤާނޫނު އަސާސީގެ 120 ވަނަ މާއްދާގައި ހާމަކުރަން އަންގާފައިވާ މުދަލާއި ފައިސާގެ މާލީ ބަޔާން ވޭތުވި ހަތަރު އަހަރު ރައީސް ޔާމީން ހުށައަޅުއްވާފައި ނުވާ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހްމަދު މަހްލޫފް ވަނީ ވިދާޅުވެފައެވެ.
ރައީސް ޔާމީން އެންމެ ފަހުން މާލީ ބަޔާން ހުށަހެޅުއްވި އަހަރު މުއާޒު ވިދާޅުނުވިޔަސް، މަހްލޫފް ކުރެއްވި ތުހްމަތު ވަނީ ދޮގުކުރައްވައިފަ އެވެ.
ވޭތުވެދިޔަ ހަތަރު އަހަރު ރައީސް ޔާމީން މާލީ ބަޔާން ހުށަހަޅުއްވާފައި ނުވާ ކަމަށް މަހްލޫފު ކުރެއްވި ޓްވީޓާ ގުޅިގެން މީޑިއާތަކުން ރައީސް އޮފީހުގައި ސުވާލުތައް ކުރަން ފެށުމުން. އަންގާރަ ދުވަހުގެ މެންދުރު މުއާޒު ކުރެއްވި ޓްވީޓެއްގައި ވިދާޅުވެފައިވަނީ ރައީސް ޔާމީންގެ މާލީ ބަޔާން ހުށަނާޅުއްވާކަމަށް ދައްކާ ވާހަކައަކީ ދޮގެއް ކަމަށާއި ރައީސުލްޖުމްހޫރިއްޔާ ވަނީ ރައީސްކަމާ ހަވާލުވެވަޑައިގަތުމަށްފަހު މާލީބަޔާން ހުށަހަޅުއްވާފައި ކަމަށެވެ.
މުއާޒް ކުރެއްވި އެހެން ޓްވީޓެއްގައި ވިދާޅުވެފައިވަނީ އޭގެފަހުން މާލީ ބަޔާން ހުށަހަޅާނެ ގޮތް އިސްލާހް ކުރައްވައި އޮޑިޓަރ ޖެނެރަލް ވަނީ މާލީބަޔާން ހުށަހަޅާނެ ފޯމެޓެއް ރައީސްއާ ދާދިފަހުން ހިއްސާ ކުރައްވާފައި ކަމަށެވެ. އެ ފޯމެޓާ އެއްގޮތަށް ވަރަށް އަވަހަށް މާލީ ބަޔާން ހުށަހަޅުއްވާނެ ކަމަށް މުއާޒު ވިދާޅުވި އެވެ.
ރައީސް ޔާމީންގެ މައްޗަށް ހިޔާނާތާއި ރިޝްވަތުގެ ތުހްމަތުކުރެވޭއިރު، ކުރީގެ ނައިބު ރައީސް އަހްމަދު އަދީބު ދާދި ފަހުން ކްރިމިނަލް ކޯޓްގެ ޝަރީއަތުގެ މަޖިލީހުގައި ވިދާޅުވެފައިވަނީ އެމްއެމްޕީއާރުސީގެ ޑޮލަރު ގުނުއްވުމާއި މާރުކުރެއްވުން ކުރިއަށް ގެންދިޔައީ ރައީސް ޔާމީން ކަމަށެވެ.
އަދީބުގެ އެ ތުހްމަތު މިހާތަނަށް ރައީސް އޮފީހުން އަދި ނުކުރައްވަ އެވެ،
