ޕީޕީއެމްގެ ރިޔާސީ ޓިކެޓް ރަސްމީކޮށް، ރައީސް ޔާމީނާއި ހަވާލުކުރައްވައިފި
އެ ޓިކެޓް ރައީސް ޔާމީންއަށް ހަވާލުކޮށްދެއްވީ ޕީޕީއެމްގެ ނައިބު ލީޑަރުންނާއި ޕީޕީއެމްގެ ޕީޖީ ލީޑަރު އަހުމަދު ނިހާން ހުސެން މަނިކު
ރައީސް އަބްދުﷲ ޔާމީނާއި، ރިޔާސީ ޓިކެޓް ހަވާލުކުރައްވަނީ
ޕީޕީއެމްގެ ރިޔާސީ ޓިކެޓް ރަސްމީކޮށް، ރައީސް އަބްދުﷲ ޔާމީނާއި ހަވާލުކުރައްވައިފި އެވެ.
އެ ޓިކެޓް ރައީސް ޔާމީންއަށް ހަވާލުކޮށްދެއްވީ ޕީޕީއެމްގެ ނައިބު ލީޑަރުންނާއި ޕީޕީއެމްގެ ޕީޖީ ލީޑަރު އަހުމަދު ނިހާން ހުސެން މަނިކު އެވެ.
އޭގެއިތުރުން ރައީސް ޔާމީންގެ ރަނިންގމޭޓް ޑރ. މުހައްމަދު ޝަހީމް އަލީ ސައީދަށްވެސް ޓިކެޓް ވަނީ ހަވާލުކުރައްވާފަ އެވެ. އެ ޓިކެޓް ވެސް ހަވާލުކޮށްދެއްވީ ޕީޕިއެމްގެ ނައިބު ލީޑަރުން ކަމަށްވާ، ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އާއި ޓޫރިޒަމް މިނިސްޓަރު މޫސާ ޒަމީރު އަދި ޕީޕީއެމްގެ ޕީޖީ ލީޑަރު އަހުމަދު ނިހާން ހުސެން މަނިކު އެވެ.
ރިޔާސީ ޓިކެޓާއި ހަވާލުވެވަޑައިގެންނެވުމަށްފަހު، ރައީސް އަބްދުﷲ ޔާމީނާއި ޑރ. މުހައްމަދު ޝަހީމް -- ފޮޓޯ: ރާއްޖެ.އެމްވީ
ޖަލްސާގައި ޑރ. މުހައްމަދު ޝަހީމް ވަނީ ޕީޕީއެމަށް ސޮއިވެސް ކުރައްވާފަ އެވެ. ޝަހީމްގެ ފޯމާއި ހަވާލުވެވަޑައިގެންނެވީ ރައީސް އަބްދުﷲ ޔާމީން އެވެ.
ޑރ. ޝަހީމާއި، ރަނިންގމޭޓްގެ ރަސްމީ ލިޔުން ހަވާލުކުރައްވަނީ -- ފޮޓޯ: ރާއްޖެ.އެމްވީ
ރައީސް ޔާމީނަށް ރިޔާސީ ޓިކެޓު ދިނުމަށް ނިންމި، ޕީޕީއެމްގެ ކައުންސިލް ބައްދަލުވުމެއްގައި ބައިވެރިވެވަޑައިގެންނެވި މެމްބަރުންގެ އަޤުލަބިއްޔަތުންނެވެ. އެގޮތަށް ނިންމިިއިރު، ޕީޕީއެމްގެ އަސާސީ ގަވާއިދުގައި ބުނެފައިވަނީ ރިޔާސީ ޓިކެޓަށް ކުރިމަތިލުމުގެ ފުރުސަތު އާންމުކޮށް ހުޅުވާލަންވާނެކަމަށެވެ. އަދި ރައީސުލްޖުމްހޫރިއްޔާގެ މަޤާމުގައި ހުންނެވި ބޭފުޅާކު ޓިކެޓަށް ވާދަކުރައްވާނަމަ އެ ބޭފުޅަކަށް ޓިކެޓް ދިނުމާއިމެދު ގޮތެއް ނިންމާނީ އެ ޕާޓީގެ ކޮންގްރެސްއިން ކަމަށެވެ. އެހެންކަމުން ރައީސް ޔާމީނަށް ޓިކެޓް ދިނުމަށް ނިންމާފައިވަނީ ޕީޕީއެމްގެ އަސާސީ ގަވާއިިދާއި ހިލާފަށްކަމަށް ޕީޕީއެމްގައި ކުރިން އިސްކޮށް އުޅުއްވި ގިނަ ބޭފުޅުން ވިދާޅުވެއެވެ.
އެ ޕާޓީގެ ހިންގުން ރައީސް ޔާމީން ނެންގެވީ ސިވިލް ކޯޓުން ކުރި ހުކުމަކަށް ފަހު އެވެ.
މިހާތަނަށް ރިޔާސީ އިންތިހާބުގައި ވާދަކުރެއްވުމަށް އިލެކްޝަންސް ކޮމިޝަނަށް ފޯމް ހުށައަޅުއްވާފައިވަނީ އެމްޑީޕީގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހު (އިބޫ) އާއި އެމަނިކުފާނުގެ ރަނިންގމޭޓް ފައިސަލް ނަސީމް އެކަނި އެވެ.
