ބޭރަށް ހިންގުން ޖެހިގެން އެންމެ ގިނައިން ރިޕޯޓު ކޮށްފައި ވަނީ މިދިޔަ ހަފްތާ ތެރޭގައި: އެޗްޕީއޭ
28 ޖުލައި 2018 | ހޮނިހިރު 04:12މިމަހު ބޭރަށް ހިންގުން ޖެހިގެން އެންމެ ގިނައިން ރިޕޯޓުކޮށްފައި ވަނީ މާލެ އާއި ރ. އަތޮޅުން
އައިޖީއެމްއެޗް ބޭރުގައި މީހުންތަކެއް މަޑުކޮށްލައިގެން
މިއަހަރުގެ މިހާތަނަށް ބޭރަށް ހިންގުން ޖެހިގެން އެންމެ ގިނައިން ރިޕޯޓް ކޮށްފައި ވަނީ ވޭތުވެދިޔަ ހަފްތާގެ ތެރޭގައި ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ. އިން ނެރިފައިވާ ތަފާސް ހިސާބުތަކުން ދައްކާ ގޮތުން ނިމިގެން ދިޔަ ހަފްތާގެ ތެރޭގައި 1561 މީހުންނަށް ބޭރަށް ހިންގުން ޖެހިގެން ރިޕޯޓުކޮށްފައިވާ ކަމަށާއި، ވޭތުވެދިޔަ އަހަރުތަކުގެ މިދުވަސްވަރާ އަޅާ ބަލާއިރު ބޭރަށް ހިންގުން ޖެހިގެން ރިޕޯޓުކޮށްފައިވާ މިންވަރު މިއަހަރު އިތުރު ކަމަށެވެ.
އެޗްޕީއޭ. އިން ބުނީ މިއަހަރުގެ ޖުލައި މަހުގައި ބޭރަށް ހިންގުން ޖެހިގެން އެންމެ ގިނައިން ރިޕޯޓުކޮށްފައި ވަނީ މާލެ ސަރަހައްދުންނާއި ރ. އަތޮޅުން ކަމަށެވެ.
މިއަހަރުގެ ޖެނުއަރީ މަހު ބޭރަށް ހިންގުން ޖެހިގެން 3110 މީހުން ރިޕޯޓުކޮށްފައިވާއިރު، ފެބްރުއަރީ މަހު 3197 މީހުން، އަދި މާރިޗު މަހު 2735 މީހުން ވަނީ ރިޕޯޓު ކޮށްފައެވެ. އޭޕްރީލް މަހު 2362 މީހުން، މެއި މަހު 2662 މީހުން، ޖޫން މަހު 3049 މީހުން އަދި ޖުލައި މަހު 3454 މީހުންނަށް ބޭރަށް ހިންގުން ޖެހިގެން ރިޕޯޓުކޮށްފަައިވެއެވެ.
އެޗްޕީއޭ. އިން ބުނީ މިއަހަރުގެ ކުރީ ކޮޅު ބޭރަށް ހިންގުން ޖެހިގެން ރިޕޯރޓްކޮށްފައިވާ މިންވަރު އިތުރު ނަމަވެސް މާރިޗް މަހުން ފެށިގެން އޭޕްރީލް މަހުގެ ނިޔަލަށް މިއަދަދު ދަށްވެފައިވާ ކަމަށެވެ. ނަމަވެސް މެއި މަހުން ފެށިގެން ޖުލައި މަހުގެ މިހާތަނަށް ބޭރަށް ހިންގުން ޖެހިގެން އެންމެ ގިނައިން ރިޕޯޓު ކޮށްފައިވަނީ ޖުލައި މަހު ކަމަށް ވެސް އެޗްޕީއޭ. އިން މައުލޫމާތުދެއެވެ.
