މިނިވަން ދުވަހު ވައުދުވާންވީ ރައީސް ޔާމިންގެ ވަކިތަކުން ދިވެހި ރާއްޖެ ސަލާމަތްކުރުމަށް: އަބްދުﷲ އަމީން
ރިޔާސީ އިންތިޚާބަށް ވާދަކުރެެއްވުމަށްޓަކައި ގުޅިފައިވާ އިދިކޮޅު ސިޔާސީ ޕާޓީތަކުގެ ރިޔާސީ ކެންޑީޑޭޓް އާއި ރަނިން މޭޓް ގެ ފޯމް ވަނީ ބުރާސްފަތި ދުވަހު ހުށަހަޅާފައި
ދާދިފަހުން ބޭއްވި ޖުމްހޫރީ ޕާޓީގެ ކޮންގްރެސްގައި އަމީން ވޯޓް ލައްވަނީ
މިއަހަރުގެ މިނިވަން ދުވަހުގެ ތަހުނިޔާ ދިވެހި ރައްޔިތުންނަށް ފޮނުއްވާ ކަމަށާއި މިއަދު ވައުދުވާންވީ ޚުދުމުޚުތާރު ރައީސް އަބްދުﷲ ޔާމިންގެ ވަކިތަކުން ދިވެހި ރާއްޖެ ސަލާމަތް ކުރުމަށް ކަމަށް ޖުމްހޫރީ ޕާޓީގެ ޑެޕިއުޓީ ލީޑަރު އަބްދުﷲ އަމީން ވިދާޅުވެއްޖެއެވެ.
ބުރާފަތި ދުވަހު ކުރެއްވި ޓްވީޓެއްގައި އަމީން ވިދާޅުވީ ރައީސް އަބްދުﷲ ޔާމިން ކޮރަޕްޝަނާއި ނާއިންސާފުން މުޅި ގައުމު ހަލާކުކޮށް ހުއްޓުވާފައިވާ ކަަމަށާއި، މިކަމާ ދެކޮޅަށް ދިވެހި ރައްޔިތުން އެއްބައިވެ ދެކޮޅުވެ، ދިވެހީންގެ ގައުމު އަނބުރާ ދިވެހީން ހޯދަން ޖެހޭ ކަމަށެވެ.
އަމީން ބުރާސްފަތި ދުވަހު މިހެން ވިދާޅުވިއިރު، އަމީން ނިސްބަތްވެވަޑައިގަންނަވާ ޖުމްހޫރީ ޕާޓީ ހިމެނޭ ގޮތުން، ގުޅިފައިވާ އިދިކޮޅު ސިޔާސީ ޕާޓީތަކުން، އެޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) އާއި އެމަނިކުފާނުގެ ރަނިންމޭޓް ފައިސަލް ނަސީމް ވަނީ ރިޔާސީ އިންތިޚާބުގައި ވާދަކުރެއްވުމަށްޓަކައި އިލެކްޝަންސް ކޮމިޝަން (އީސީ) އަށް، ބުރާސްފަތި ދުވަހު ފޯމް ހުށަހަޅުއްވާފައެވެ.
ރައީސް އަބްދުﷲ ޔާމިންގެ ސަަރުކާރަށާއި އަދި ޚުދު އެމަނިކުފާނަށް ވަނީ ބޮޑެތި ކޮރަޕްޝަނުގެ ތުހުމަތާއި މަގާމުގެ ނާޖާއިޒު ފައިދާ ބޭނުން ކުރުމާއި، ވެރިކަމަށް ވަޑައިގަންނަވަން ވެވަޑައިގަތް ވައުދުތައް ނުފުއްދަވާކަމުގެ ފާޑުކިޔުން އަމާޒުވެފައެވެ. އަދި އިސްލާމް ދީން އައްޑަނައަކަށް ބޭނުންކޮށް ބޮޑެތި ޖަރީމާތައް ހިންގަވަން ނިވާފަތްގަނޑަކަށް އިސްލާމް ދީން ބޭނުން ކުރައްވާކަމުގެ ތުހުމަތުވެސް ވަނީ ކުރެވިފައެވެ.
