ރައީސް ޔާމިންގެ ވެރިކަމުގައި ދެމެހެއްޓެނެވި ތަރައްގީއެއް ގެނެސްދެވިފައި ނެތް: އަހުމަދު އީސަ
26 ޖުލައި 2018 | ބުރާސްފަތި 04:06ނ. އަތޮޅުގައި ރައްޔިތުންނަށް މަންފާ ލިބޭ ގޮތަށް އެތޮޅުގެ މާޅެންދޫ ބަނދަރު ހެދުން ފިޔަވައި އިތުރު ކަމެއް މިސަރުކާރުން ނުކޮށްދޭ
ރައްޔިތުން މަޖިލީހުގެ ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ ވާހަކަ ދައްކަވަނީ -- ރާއްޖެއެމްވީ
ރައީސް ޔާމިންގެ ވެރިކަމުގައި ދެމެހެއްޓެނެވި ތަރައްގީއެއް ރައްޔިތުންނަށް ގެނެސްދީފައި ނުވާ ކަމަށް ކުރީގެ ރައްޔިތުން މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.
ރާއްޖެޓީވީގެ ދާއިރާގެ ޕޮރޮގްރާމްގައި ވާހަކަ ދައްކަވަމުން މެންބަރު އަހުމަދު އީސަ ވިދާޅުވީ ނ. އަތޮޅުގައި ރައްޔިތުންނަށް މަންފާ ލިބޭ ގޮތަށް ނ.އަތޮޅު މާޅެންދޫ ބަނދަރު ހެދުން ފިޔަވައި އެއްވެސް މަޝްރޫއެއް މިވެރިކަމުގައި ހިންގާފައި ނުވާ ކަމަށާއި، މިވެރިކަމުގައި ސިޔާސީ ގޮތުން ރައްޔިތުންނަށް އޮޅުވާލުމާއި ހީލަތްތެރި ރޭވުމުގެ ދަށުން ކުރާ ކަންތައްތައް ވަރަށް ގިނަ ކަމަށެވެ.
"ކެނދިކުޅެދޫއަކީ ބޮޑު ރަށެއް. އާބާދީއާ ދުރުގައި ސްކޫލުގައި ހުންނަނީ. ދެއަވަށުގެ ސްކޫލުކުދިން ސްކޫލަށްދާން ދެބަސް އޮވޭ. އެމްޑީޕީ ސަރުކާރުން ފެށިގެން ކެނދިކުޅެދޫގައި ދެބަސް ބޭނުން ކުރަމުން އަންނަނީ. ވެރިކަމަށް ވަޑައިގެން އެދެބަސް މާރާމާތުކުރާނެ ފުރުސަތު ނުދީ ބާއްވައިގެން ދެބަސް ހަލާކުވީ. ވަރަށް ކުޑަ ހަރަދަކުން މަރާމާތުކުރެވޭ ދެބަސް އެއީ. އެކަމަކު މަރާމާތު ނުކޮށް ސިޔާސީ ގޮތުން ރައްޔިތުންނަށް އޮޅުވާލައިގެން ހީލަތްތެރި ރޭވުމުގެ ދަށުން އޭއާރކޮންޑިޝަން ކުރީގެ އޮތް ސައިޒްގެ ދެބަސް ގެންދިޔައީ. ކުރީގެ ދެބަސް އޮތްގޮތަށް އޮއްވައި." އަހުމަދު އީސަ ވިދާޅުވިއެވެ.
އަހުމަދު އީސަ ވިދާޅުވީ އިހުލާސްތެރިކަމާއެކު ތަރައްގީ ގެންނަން މަސައްކަތް ކުރާ ވެރިއެއް ނަމަ މިމޭރުމުން މަސައްކަތް ނުކުރާނެ ކަމަށެވެ. އޭނަ ވިދާޅުވީ އިތުރު ދެބަސް ގެނައުމުގެ ބަދަލުގައި ކެނދިކުޅެދޫ ހޮސްޕިޓަލުން ސްކޭންގެ ޚިދުމަތް ތައާރަފް ކުރި ނަމަ އެކަމުގެ މަންފާ 5000 އަށް ވުރެ ގިނަ ރައްޔިތުންނަށް ކުރާނެ ކަމަށެވެ.
"ދެބަސް ގެންނަން ހަރަދު ކުރެއްވި 2 ނުވަތަ 3 މިލިއަން ރުފިޔާ ހަރަދު ކުރައްވައިގެން މާބަނޑު އަންހެން ބޭފުޅުން ސްކޭން ކޮށްލެވޭ ވަރުގެ ސިއްހީ ޚިދުމަތެއް ކެނދުކުޅެދޫ ހޮސްޕިޓަލްގައި ތައާރަފްކުރެވުނު ނަމަ އެކަމުގެ މަންފާ ހެބަދޫ މީހުންނަށްށާއި، ކުޑަފަރީ މީހުންނަށްށާއި، މާޅެންދޫ މީހުންނާއި ، ލަންދޫ މީހުންނަށް އެކަމުގެ ފައިދާ ކުރާނެ. މިސަރުކާރުގެ އިހްލާސްތެރިކަމެއް ނެތް. ކުރީ ސަރުކާރުކޮށްފައި އޮތް ކަމެއް ވީނަ ހަލާކުކޮށްލަނީ މިސަރުކާރުން" އަހުމަދު އީސަ ވިދާޅުވިއެވެ.
މީގެ އިތުރުން އަހުމަދު އީސަ ވިދާޅުވީ ސްކޫލުގައި އަޅަން ފެށި ކްލާސްރޫމްތައް އަޅައި ނުނިމޭނެ ކަމަށާއި، ޖޫނިއާރ ކޮލެޖްގެ ނަމުގައި އަޅާފައި ހުރީ ވިހި ފޫޓްގެ ކުޑަ ކްލާސް ރޫމެއް ކަމަށެވެ. ނަމަވެސް އެއީ ޖޫނިއާރ ކޮލެޖް އަޅަން ޕްލޭން ކުރި ގޮތް ނޫން ކަމަށް ވެސް އަހުމަދު އީސަ ވިދާޅުވިއެވެ.
ނ.އަތޮޅުގެ މިލަދޫގެ ތަރައްގީގެ މަޝްރޫއުތަކަށް އަލިއަޅުއްވައިލައްވަމުން އެއަތޮޅުގެ އިސްލާހީ މަސައްކަތުގައި އިސްކޮށް ހަރަކާތްތެރިވާ އަބުދުއްސައްތާރު މުހައްމަދު ވިދާޅުވީ ތަރައްގީގެ ގިނަ މަޝްރޫއުތައް ހިންގައިދޭނެ ކަމަށް މިސަރުކާރުން ވައުދު ވެފައިވާ ކަމަށާއި، ނަމަވެސް އެއްވެސް މަޝްރޫއެއް ހިންގާފައި ނުވާ ކަމަށެވެ.
ދާއިރާގެ ޕްރޮގްރާމްގައި ވާހަކަދައްކަވަނީ
އަބްދުއްސައްތާރު ވިދާޅުވީ ރައްޔިތުންނަށް ލިބެންޖެހޭ އެންމެ އަސާސީ ޚިދުމަތްތައް ނުލިބޭ ކަމަށާއި، މިލަދޫގެ ސިއްހީ މަރުކަޒުގެ ހާލަތު ވަރަށް ދަށް ކަމަށެވެ. އެގޮތުން ސިއްހީ މަރުކަޒަށް ވަންނަ ދޮރު ހަލާކުވެފައިވާ ކަމަށާއި، ލެބޯޓަރީގެ ޚިދުމަތް ނުލިބޭ ކަމަށް އޭނަ ވިދާޅުވިއެވެ.
"މިލަދޫ ކައުންސިލްގެ އިދާރާ އަދާފައި ހުންނަތާ 7 އަހަރު މިއީ. މަޖިލީހުގެ 4 މެންބަރުން ތިއްބަވައިގެން ނ. އަތޮޅަށް ނިސްބަތްވާ ރައީސެއް އިންވާގެން ކައުންސިލް އިދާރާ އަނދައިގެން ގޮސް ގެއެއްގެ ކޮޓަރިއެއްގައި ކައުންސިލް އިދާރާ ހިންގަން ވީމަ ދެން ލަދު ގަންނަންޖެހޭ ކަމެއް" އަބްދުއްސައްތާރު ވިދާޅުވިއެވެ.
އަބްދުއްސައްތާރު ވިދާޅުވީ ރައީސް ޔާމިންގެ ސަރުކާރުން ތަރައްގީގެ ވާހަކަ ދައްކާއިރު ނ.އަތޮޅަށް ތަރައްގީ ގެނެވިފައި ނުވާ ކަމަށާއި، މާލޭގައި ބޮޑެތި ބިލްޑިންގ ތަކާއި، ފާލަން އެޅި ނަމަވެސް އެކަމުގެ ފައިދާ ނ.އަތޮޅަށް ނުކުރާނެ ކަމަށެވެ.
