ޚުޝީ ބޭނުންވަނީ ވެސް ދައްތަ ގޮތަށް އެކްޓަރަކަށް ވާން
25 ޖުލައި 2018 | ބުދަ 06:52ޖާންވީގެ ފުރަތަމަ ފިލްމަކީ ދަޅަކް
ޚުޝީ(ކ) އަދި ޖާންވީ
މިއަހަރުގެ ފެބްރުއަރީ މަހުގެ ތެރޭގައި މަރުވި މަޝްހޫރު ފިލްމީ ތަރި ސްރީދޭވީ އާއި ބޯނީ ކަޕޫރުގެ ދޮށީ ދަރި ޖާންވީ ކަޕޫރުގެ އެންމެ ފުރަތަމަ ފިލްމު ދަޅަކް މިހާރު ވަނީ ސިނަމާތަކަށް އައިސްފައެވެ.
މި ފިލްމު ޕްރޮމޯޓު ކުރުމަށް އެކި މަސައްކަތް ކުރެވެމުންދާއިރު ޖާންވީގެ ކޮއްކޮ ޚުޝީ ކަޕޫރު އަދި ބައްޕަ ބޯނީ ކަޕޫރު ވެސް ދަނީ ޖާންވީއަށް ސަޕޯޓެއް ދެމުންނެވެ.
ފިލްމު ޕްރޮމޯޓު ކުރުމުގެ ތެރޭގައި ބޯނީއަށް ކުރެވުނު ސުވާލަކީ ޖާންވީ ގޮތަށް ޚުޝީ ވެސް ފިލްމީ ދާއިރާއިން ފެނިދާނެތޯއެވެ.
ޖަވާބުގައި ބޯނީ ކަޕޫރު ބުނީ ޚުޝީ ފުރަތަމަ ބޭނުންވީ މޮޑެލްއަކަށް ވާންކަމަށާއި އެހެން ނަމަވެސް މިހާރު އޭނާ ބޭނުން ވަނީ އެކްޓަރަކަށް ވާން ކަމަށެވެ.
ޖާންވީ ވެސް ވަނީ އޭނާގެ މަންމަ ބޭނުންވަނީ ޚުޝީ އެކްޓަރަކަށް ވާން ކަމަށް ބުނެފައެވެ. އެހެން ނަމަވެސް ސްރިދޭވީ ބޭނުންވީ ޖާންވީ މެޑިސިން ދާއިރާއިން ކިޔަވައި ޑޮކްޓަރަކަށް ވުމަށް ކަމަށް ދަޅަކް ޕްރޮމޯޓު ކުރުމަށް ބޭއްވި ރަސްމިއްޔާތެއްގައި ޖާންވީ ވަނީ ބުނެފައެވެ.
ބޯނީ ކަޕޫރާއި ޖާންވީ، ޚުޝީ އެކްޓަރަކަށް ވުމަށް ބޭނުންވާ ކަމަށް ބުނެފައި ވީނަމަވެސް ޚުޝީ އަދި މިކަމާމެދު އެއްޗެއް ބުނެފައެއް ނުވެއެވެ.
ޖާންވީގެ ފުރަތަމަ ފިލްމު ދަޅަކް އަކީ ކަރަން ޖޯހަރް ޕްރޮޑިއުސް ކޮށްފައިވާ ފިލްމެކެވެ. މި ފިލްމަކީ 2016 ގައި ރިލީޒް ކުރި މަރާޓީ ފިލްމް ސައިރާތު އަސްލަކަށް ބަލައިގެން ހަދާފައިވާ އަސަރު ގަދަ ލޯބީގެ ފިލްމެކެވެ.
މި ފިލްމުން ޖާންވީއާ އެކު ފެނިގެންދަނީ އިޝާން ހައްތަރެވެ.
