އަނަންޔާ އެކްޓަރަކަށް ނުވާނެ ނަމަ އުފަން ނުވީސް: ޗަންކީ ޕާންޑޭ

ބޮލީވުޑް ތަރިންގެ ދަރިންގެ ތެރެއިން ފިލްމީދާއިރާއާއި ގުޅެން ބޭނުންވާ އެމީހުންގެ ދަރިން ވަރަށް ގިނައެވެ. އޭގެ ތެރޭގައި ފިލްމީ ތަރި ޗަންކީ ޕާންޑޭގެ އަންހެން ދަރިފުޅު އަނަންޔާ ޕާންޑޭ ހިމެނެއެވެ.

ޗަންކީ އޭނާގެ ދަރިފުޅާއި ބެހޭގޮތުން ދީފައިވާ އިންޓަވިއުއެއްގައި ބުނެފައިވަނީ އަނަންޔާ އުފަންވީ ވެސް ފިލްމީ ތަރިއަކަށް ވާންކަމަށާއި އެހެން ނޫންނަމަ އޭނާ އުފަން ނުވާނެ ކަމަށެވެ.

މުމްބާއި މިރާއަށް ދީފައިވާ އިންޓަވިއުއެއްގައި މީގެ ކުރިން ވެސް ޗަންކީ ވަނީ އޭނާގެ ދަރިފުޅާއި ބެހޭގޮތުން ވާހަކަ ދައްކާފައެވެ. ޗަންކީ ބުނީ ފިލްމު އިންޑަސްޓްރީއަށް ވަނުމަށް އޭނާގެ ދަރިފުޅު އަންނަނީ ތައްޔާރު ވަމުން ކަމަށެވެ. އަނަންޔާ ބަތަލާއަކަށް ވާން ވަރަށް ބޭނުންވެގެން އޭނާ ގާތު އެ ވާހަކަ ބުނެފައިވާ ކަމަށާއި އަމިއްލައަށް މަސައްކަތް ކޮށްގެން ފިލްމު އިންޑަސްޓްރީގައި ރަނގަޅު މަގާމެއް ހޯދުން އެއީ އޭނާ ދެކެން ބޭނުންވާ ކަމެއް ކަމަށް ޗަންކީ ވަނީ ބުނެފައެވެ.

ޗަންކީ މިހެން ބުނެފައިވާއިރު ކަރަން ޖޯހަރުގެ ކުރިއަށް އޮތް ފިލްމު ސްޓޫޑެންޓް އޮފްދަ އިޔާ2ގެ ޝޫޓިން ފެށުމަށް އިއުލާން ކޮށްފައި އޮންނަތާ ދުވަސްކޮޅެއް ވެއްޖެ އެވެ. ފިލްމުގައި ބައިވެރިވާ ތަރިންގެ ތެރެއިން އަދި ޔަގީން ވެފައިވަނީ ބަތަލު ޓައިގާ ޝްރޮފް އެކަންޏެވެ.

މި ފިލްމުގެ ލީޑު އެކްޓްރެސްއެއް ހޮވުމަށް ދާދި ފަހުން އޮޑިޝަންއެއް ބާއްވާފައިވާއިރު އޮޑިޝަންގައި ބައިވެރިވެ ސާރާ އަލީ ހާން އާއި ޖާންވީ ޕަކޫރަށް ވުރެ މަތިން އަނަންޔާ ވަނީ މާކްސް ހޯދާފައެވެ.

އެހެންކަމުން އަނަންޔާ ފެނިގެންދާނެ ފުރަތަމަ ފިލްމަކީ ސްޓޫޑެންޓް އޮފްދަ އިޔާ2 ކަމަށް ވަނީ ބެލެވިފައެވެ. އަދި އެފިލްމުން އަނަންޔާ ފެންނާނެ ސިގްނަލްތައް ދަނީ ލިބެމުންނެވެ. އެގޮތުން ސްޓޫޑެންޓް އޮފްދަ އިޔާ2 ގެ ޝޫޓިންތައް ނެގުމަށް ހަމަޖައްސާފައިވާ އިންޑިއާގެ ސްޓޭޓެއް ކަމަށްވާ ދެހްދަރުންއަށް ދިއުމަށް އަނަންޔާ އާއި ފިލްމުގެ ޑައިރެކްޓަރ ޕުނީތް މަލޯތްރާ ގޮސް ހުއްޓާ ވަނީ ނޫސްވެރިންނަށް ފެނިފައެވެ. އެހެން ކަމުން ބެލެވޭ ގޮތުގައި މި ފިލްމުގެ ޝޫޓިން ވަނީ މިހާރު ފަށާފައެވެ.

މީގެ 5 އަހަރު ކުރިން ނެރުނު ސްޓޫޑެންޓް އޮފް ދަ އިޔާގެ ފްރަންޗައިޒް ސްޓޫޑެންޓް އޮފް ދަ އިޔާ2 ރިލީޒް ކުރާނީ އަންނަ ނޮވެމްބަރުމަހުގައި ކަމަށް ފިލްމުގެ ޕްރޮޑިއުސަރު ކަރަން ޖޯހަރުވަނީ މީގެ ކުރިން ކޮށްފައިވާ ޓްވީޓެއްގައި ބުނެފައެވެ.

ކަރަން ޖޯހަރުގެ ރަސްމީ ޓްވިޓާ އެކައުންޓުން ކޮށްފައިވާ ޓްވީޓެއްގައި ބުނެފައިވަނީ ސްޓޫޑެންޓް އޮފް ދައިޔާ2 ނެރޭނީ އަންނަ ނޮވެމްބަރު މަހުގެ 23 ގައި ކަމަށެވެ. މީގެ ފަސް އަހަރު ކުރިން 2012 ވަނަ އަހަރުގެ އޮކްޓޯބަރު މަހު 19 ވަނަ ދުވަހު ނުކުތް ކަރަން ޖޯހަރުގެ ފިލްމުން ކުޅަދާނަ ތިން އާ ފަންނާނުން ބޮލީވުޑަށް ތައާރަފްވިއެވެ. އެއީ އާލިއާ ބަޓް، ސިދާތު މަލްހޯތުރާ އަދި ވަރުން ދަވަން އެވެ. ސިދާތް މަލްހަތްރާ އާލިއާ ބަޓް އަދި ވަރުން ދަވަން އަކީ މިހާރު ބޮލީވުޑްގެ ވެސް އެންމެ ކާމިޔާބު ތިން ފަންނާނުންނެވެ.