ޖަޒްލާންގެ މަރާ މެދު ދައްކަމުންދާ ވާހަކަތައް އާއިލާ އިން ވެސް ދޮގުކޮށްފި
ލައިސަންސް ނެތި މީގެ ކުރިން ހަ ފަހަރެއްގެ މަތިން ފިޔަވަޅު އަޅާފައިވޭ
ހުޅުމާލޭގައި ހިނގި އެކްސިޑެންޓްގައި މަރުވި މުހައްމަދު ޖަޒްލާން
މި މަހުގެ 20 ވަނަ ދުވަހު ހުޅުމާލެ ފިތުރޯނުމަގުގައި ސައިކަލު ދުއްވަނިކޮށް ސައިކަލު ކަހާލައިގެން ވެއްޓި ސީރިއަސް ޒަހަމްތަކެއް ލިބި ހޮސްޕިޓަލުގައި ފަރުވާދެމުން ދަނިކޮށް މަރުވި މުހައްމަދު ޖަޒްލާންގެ މަރާ މެދު ދައްކަމުންދާ ވާހަކަތައް އޭނާގެ އާއިލާ އިން ވެސް ދޮގުކޮށްފިއެވެ.
އަންގާރަ ދުވަހު ރާއްޖެއެމްވީއަށް ދިން އިންޓަވިއުގައި ޖަޒްލާންގެ ބައްޕަ އަބްދުލް ޖަލީލް އަހުމަދު ބުނީ އެކަމުގައި އާއިލާގެ އެއްވެސް ޝަކުވާއެއް ނެތް ކަމަށާއި އެއީ އެކަން ހިނގާދިޔަ ގޮތް ކަމަށް ޤަބޫލުކުރެވޭ ކަމަށެވެ. ކުރިން ޝައްކު ކުރެވޭ ކަންތައްތަކެއް ހުރި ނަމަވެސް ފަހުން އެކަންތައްތައް އޮޅުން ފިލާފައިވާ ކަމަށް ޖަޒްލާންގެ ބައްޕަ މިއަދު ބުންޏެވެ.
ޖަލީލް އިތުރަށް ބުނީ ޖަޒްލާންގެ މަރާ މެދު ފުލުހުން ހިންގި ތަހުޤީޤާ ދެތެރޭ އެއްވެސް ޝައްކު ކަމެއް ނެތް ކަމަށާއި އާއިލާ އާއި ރައްޓެހިން ވެސް ޤަބޫލު ކުރަނީ އެގޮތަށް ކަމަށެވެ.
ޖަޒްލާންގެ މަރުގެ ހާދިސާ ހިނގާދިޔަ ގޮތާ ގުޅޭ ގޮތުން ބައެއް މީޑިއާތަކުގައި ހަގީގަތާ ހިލާފު ވާހަކަތައް ފަތުރަމުންދާތީ އަންގާރަ ދުވަހު ފުލުހުން ވެސް ވަނީ ސީސީޓީވީ ފޫޓޭޖް އާންމުކޮށް އަދި ނޫސްބަޔާނެއް ނެރެފައެވެ.
ފުލުހުން ބުނީ ފުލުހުންގެ ތަހުގީގުންނާއި އަދި އެ ސަރަހައްދުގެ ސީސީޓީވީ ފޫޓޭޖަށް ބަލާއިރު، އެ ހާދިސާ ހިނގާފައި ވަނީ ބާރު ސްޕީޑްގައި ސައިކަލް ދުއްވާފައި އައިސް ބަންޕަރުން އަރަން އުޅުމުގެ ތެރޭގައި ސައިކަލް ކޮންޓްރޯލް ނުވެގެން ކަހާލައިގެން ވެއްޓިގެން ކަމަށާއި، އެކަން ހިނގިއިރު އެ ސައިކަލްގައި އިނނީ ޖަޒްލާން އެކަނި ކަމަށެވެ.
ފުލުހުން ބުނީ އެ ހާދިސާ ހިނގާފައި ވަނީ އެއްވެސް އުޅަނދަކުން އެ ސައިކަލުގައި ޖެހިގެން ނޫން ކަން ފުލުހުންގެ ތަހުގީގަށް އެނގިފައިވާ ކަމަށެވެ.
ޖަޒްލާނަކީ އެއްގަމު އުޅަނދު ދުއްވުމުގެ ލައިސަންސް އޮތް ފަރާތެއް ނޫން ކަމަށާއި، ލައިސަންސް ނެތި މީގެ ކުރިން ހަ ފަހަރެއްގެ މަތިން ފިޔަވަޅު އަޅާފައިވާ ފަރާތެއް ކަމަށް ވެސް ފުލުހުން ބުނެއެވެ.
