ޒާތީ މަސްލަހަތައްޓަކައި މަޤާމުގެ ނުފޫޒް ބޭނުން ކުރުމަކީ ދީނުގައި ހުއްދަ ކަމެއް ނޫން: ޝައިޚް އިލްޔާސް
24 ޖުލައި 2018 | އަންގާރަ 05:08އެއީ ބޮޑުވެގެންވާ ޚިޔާނާތެއް
ޢަދާލަތު ޕާޓީގެ އިލްމުވެރިންގެ މަޖިލީހުގެ ރައީސް ޝައިޚް އިލްޔާސް ހުސައިން
ޒާތީ މަސްލަހަތައްޓަކައި މަޤާމުގެ ނުފޫޒް ބޭނުން ކުރުމަކީ އިސްލާމް ދީނުގައި ހުއްދަ ކަމެއް ނޫން ކަމަށް ޢަދާލަތު ޕާޓީގެ އިލްމުވެރިންގެ މަޖިލީހުގެ ރައީސް ޝައިޚް އިލްޔާސް ހުސައިން ވިދާޅުވެއްޖެއެވެ.
މަޝްހޫރު ދީނީ އިލްމުވެރިޔާ ޝައިޚް އިލްޔާސް ހުސައިން އަންގާރަ ދުވަހު ކުރެއްވި ޓްވީޓެއްގައި ވިދާޅުވީ "ޒާތީ މަސްލަހަތަށްޓަކައި މަޤާމުގެ ނުފޫޒް ބޭނުން ކުރުމަކީ ދީނުގައި ހުއްދަ ކަމެއް ނޫން" ކަމަށެވެ. އަދި އެއީ ބޮޑުވެގެންވާ ޚިޔާނާތެއް ކަމަށް ވިދާޅުވެފައިވެއެވެ.
ޝައިޚް އިލްޔާސް ވަނީ އެކަން ސާބިތުކޮށްދެއްވުމުގެ ގޮތުން މާތް ﷲ އެންގެވި އެންގެވުން ނަކަލް ކުރައްވާފައެވެ.
"ﷲ ވަހީ ކުރެއްވިއެވެ. إن الله لا يحب الخائنين. ހަމަ ކަށަވަރުން ޚިޔާނާތްތެރިންދެކެ ﷲ ލޯބިވެވޮޑިގެނެއް ނުވެއެވެ." ޝެއިޚް އިލްޔާސް ވިދާޅުވިއެވެ.
މީގެ އިތުރުން ހޯމަދުވަހު ކުރެއްވި އެހެން ޓްވީޓެއްގައި ޝައިޚް އިލްޔާސް ވަނީ މިއަދު ކުރެވެމުންދާ ދީނާ ހިލާފު ކަންކަމަށް ލާދިނީ ކަންކަމޭ ނުބުނެވެންޖެހޭ އެއްވެސް ސަބަބެއް ނެތް ކަމަށާއި ދީނާ ހިލާފު ކަމެއް ކޮންމެފަދަ ބޭފުޅަކު ކުރެއްވި ނަމަވެސް އެ ވާނީ ހަމަ ލާދިނީ ކަމެއް ކަމަށް ވިދާޅުވެފައެވެ.
