މައުމޫން ފައުންޑޭޝަނުން އިހްޔާ ޕްރޮގްރާމް މިއަހަރު ނުބާއްވާނެ
ރައީސް މައުމޫން އިހްޔާ ޕްރޮގްރާމް ބާއްވާތާ 38 އަހަރު ވެއްޖެ
މައުމޫން އަބްދުލް ގައްޔޫމް(މ)
މައުމޫން ފައުންޑޭޝަނުން ކޮންމެ އަހަރަކުވެސް ބާއްވާ އިހްޔާ ޕްރޮގްރާމްތައް މި އަހަރު ނުބާއްވާނެ ކަމަށް އެ ފައުންޑޭޝަނުން ބުނެފިއެވެ.
އެފައުންޑޭޝަނުން އިހްޔާ ޕްރޮގްރާމްތައް ނުބާއްވަން ނިންމީ ރޯދަ މަހުގެ ރޭތައް އިހްޔާކުރުމުގެ ޕްރޮގްރާމް ކޮންމެ ރޯދަ މަހަކު ވެސް ބާއްވާތާ 38 އަހަރު ވެފައިވަނިކޮށެވެ.
އެ ފައުންޑޭޝަނުން އާދީއްތަ ދުވަހު ނެރުނު ބަޔާނެއްގައި ބުނެފައިވަނީ އިހްޔާ ޕްރޮގްރާމްތައް މިއަހަރު ނުބާއްވަން ނިންމީ ފައުންޑޭޝަންގެ ޗެއާމަން ރައީސް މައުމޫން އާއިލީ ބޭނުންފުޅެއްގައި މިވަގުތު ރާއްޖޭން ބޭރުގައި ހުންނަވަން ޖެހިވަޑައިގަންނަވާފައިވާތީ ކަމަށެވެ.
ކުރީގެ ރައީސް މައުމޫން މިހާރު ރާއްޖޭން ބޭރުގައި އުޅުއްވާތާ ވަނީ ދުވަސްކޮޅެއް ވެފައެވެ. ރައީސް މައުމޫން އާދީއްތަ ދުވަހުގެ ރޭ ކުރެއްވި ޓްވީޓެއްގައި ވިދާޅުވީ 38 އަހަރު ވަންދެން ގަވައިދުން ބާއްވަމުން އަންނަ އެ ޕްރޮގްރާމް މި އަހަރު ނުބޭއްވޭތީ އެކަމާ ހިތާމަކުރައްވާ ކަމަށާއި ވީ އެންމެ އަވަހަކަށް އެ ޕްރޮގްރާމް ބާއްވާނެ ކަމަށެވެ.
މައުމޫން ފައުންޑޭޝަނުން ބާއްވާ އިހްޔާ ޕްރޮގްރާމްތަކުގައި ރައީސް މައުމޫނާއި ދީނީ ބައެއް އިލްމުވެރިން ވާހަކަފުޅު ދައްކަވައެވެ.
