ހީލަމާ ޕްރޮގްރާމް މިފަހަރު ވެސް ހުށަހަޅައިދޭނީ މަހްލޫފު!

ރޯދަ މަހު ރާއްޖެޓީވީން ގެނެސްދޭ ކުޑަކުދިންގެ ޕްރޮގްރާމް "ހީލަމާ" ، މިފަހަރު ވެސް ހުށަހަޅައި ދެއްވާނީ ރައްޔިތުންގެ މަޖިލީހުގެ މެމްބަރު އަހްމަދު މަހްލޫފު ކަމަށް ހަމަޖައްސައިފި އެވެ.

ރާއްޖެ ޓީވީގެ ޕްރޮގްރާމް ހެޑް އާމިރު ސަލީމް ބުނި ގޮތުގައި، މިހާރު ޖަލު ހުކުމް ތަންފީޒުކުރައްވަމުން ގެންދަވާ މަހްލޫފު މިނިވަން ވުމާ އެކު، "ހީލަމާ" ޕްރޮގްރާމަށް އޭނާ އަރުއްވާނެ ކަމަށެވެ. މަހްލޫފު މިނިވަން ވާނީ ޖޫން 9 ގައެވެ.

ރޯދަ މަހުގެ ކޮންމެ ހުކުރު ދުވަހެއްގެ ހަވީރު 4:30 ގައި ގެނެސްދޭ މި ޕްރޮގްރާމުގެ ފުރަތަމަ ހަފުތާގެ ޕްރެޒެންޓަރެއްގެ ގޮތުގައި ފެނިގެންދާނީ އާމިރު ވިދާޅުވި ގޮތުގައި މަހްލޫފުގެ އަނބިކަނބަލުން ނަޒުރާ ނަސީމެވެ.

"އަޅުގަނޑުމެން މިގޮތަށް ނިންމީ ވަރަށް ގިނަ ބައެއްގެ އެދުމުގެ މަތިން. މަހްލޫފު ޔަގީންކަން ދެއްވާފައި އޮތީ މިނިވަންވެގެން ނުކުމެ ޕްރޮގްރާމް ހުށަހަޅައި ދެއްވާނެ ކަމަށް،" އާމިރު ވިދާޅުވި އެވެ.

މަހްލޫފުގެ އަނބިކަނބަލުން ނަޒުރާ ވިދާޅުވީ، "ހީލަމާ" ޕްރޮގްރާމުން ކުޑަކުދިންނާ ބައްދަލުކޮށްލުމަށް މަހުލޫފު ހުންނެވީ ކެތްމަދުވެފައި ކަމަށެވެ.

މިދިޔަ އަހަރުގެ މި ޕްރޮގްރާމް ވެސް ހުށަހަޅުއްވަިދެއްވީ މަހްލޫފެވެ.

މި ޕްރޮގްރާމް ސްޕޮންސަކޮށްފައިވަނީ ލޮޓަސް ފިހާރައިންނެވެ.