ވޯޓް ލުމުގެ ހައްޤު ހަނިކުރުމުގެ ކަންކަން ނުކުރެއްވުމަށް އިލްތިމާސް ކުރަން: އިބޫ
22 ޖުލައި 2018 | އާދީއްތަ 16:00ސަރުކާރުގެ މުވައްޒަފުން ވޯޓުލާން ރީ-ރަޖިސްޓަރ ކުރުމުގެ ކަންކަން ވަޒީރުންނާއި ކުންފުނިތަކުގެ ވެރިން ކުރައްވާތީ ކަންބޮޑުވޭ
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް
ވޯޓުލުމުގެ ހައްގު ހަނިކުރުމުގެ ކަންކަން ނުކުރެއްވުމަށް އިލްތިމާސް ކުރައްވާކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް (އިބޫ) ވިދާޅުވެއްޖެއެވެ.
އާދީއްތަ ދުވަހުގެރޭ އިބޫ ކުރެއްވި ޓްވީޓެއްގައި ވިދާޅުވީ ސަރުކާރުގެ މުވައްޒަފުން ވޯޓުލާން ރީ-ރަޖިސްޓަރ ކުރުމުގެ ކަންކަން ވަޒީރުންނާއި ކުންފުނިތަކުގެ ވެރިން ކުރައްވާތީ ކަންބޮޑުވެވަޑައިގަންނަވާ ކަމަށެވެ. އަދި ވޯޓުލުމުގެ ހައްގު ހަނިކުރުމުގެ ކަންކަން ނުކުރެއްވުމަށް އިލްތިމާސް ކުރައްވާކަމަށް އިބޫ ވިދާޅުވިއެވެ.
އިބޫ ވިދާޅުވީ އަމިއްލަ އިޚްތިޔާރުގައި ރީ-ރަޖިސްޓަރ ކުރުމުގެ ހައްގު ކޮންމެ ރައްޔިތަކަށްވެސް ލިބިގެންވާ ކަމަށެވެ.
އިބޫ މިމޭރުމުން އިލްތިމާސް ކުރައްވާފައި މިވަނީ ސަރުކާރުގެ މުވައްޒަފުންނަށާއި ސަރުކާރު ކުންފުނިތަކުގެ މުވައްޒަފުންނަށް ވަކިތަނެއްގައި ވޯޓުލުމަށް ރަޖިސްޓްރީ ކުރުވަމުންދާ ކަމަށާއި އެކަމުގައި ވަޒީރުންނާއި ކުންފުނިތަކުގެ ވެރިން އުޅުއްވަމުން ގެންދަވާކަމުގެ ތުހުމަތު ކުރަމުންދާ ދަނޑިވަޅެއްގައެވެ.
