ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒާއި ބެހޭގޮތުން ރައީސް އަބްދުﷲ ޔާމީން ދައްކަވާފައިވަނީ ހަގީގަތާއި ހިލާފު ދޮގު ވާހަކަފުޅުތަކެއްކަމަށް ރިޔާޒްގެ އާއިލާއިން ބުނެފިއެވެ.
ރިޔާޒުގެ އާއިލާއިން ނެރުނު ބަޔާނުގައި ބުނެފައިވަނީ އޭނާ މިވަގުތު ޖަލުގައި ބަންދުކޮށްފައިހުރީ ފުލުހުން ތުހުމަތުކުރި މައްސަލައަކާ ގުޅިގެން ރިޔާޒްގެ ފޯނު ފުލުހުންނާ ހަވާލުކުރުމަށް އެންގުމުން ފުލުހުންނާއި ފޯނު ހަވާލުނުކޮށް އަދި ފޯނު ހަވާލުކުރުމަށް އިންކާރުކުރުމުން ކަމަށާއި އަދި ޕިން ކޯޑު ދިނުމަށްވެސް އިންކާރުކުރުމުންކަމަށް ރައްޔިތުންނަށް ދޭހަވާގޮތަށް ރައީސް އަބްދުﷲ ޔާމީން ވިދާޅުވެފައިވީނަމަވެސް، އެއީ މިމައްސަލައިގައި ކަންހިނގާފައިވާގޮތާ ކަނޑައެޅިގެން ޚިލާފަށް އެމަނިކުފާނު ރައްޔިތުންނަށް އޮޅުވާލެއްވުމަށް ހައްދަވާފައިވާ އިތުރުފުޅެއްކަމުގައި ދެކޭކަމަށެވެ.
ރައީސް ޔާމީން ހދ.ހަނިމާދޫ ރައްޔިތުންނާ މުޚާތަބުކޮށް ދެއްކެވި ވާހަކަފުޅުގައި ރިޔާޒަށް ނިސްބަތްކޮށް ވިދާޅުވީ ރިޔާޒުގެ މައްޗަށް ހުކުމެއްއައީ ގާނޫނީ މަރުހަލާގައި އެއްބާރުލުން ދޭން އިންކާރު ކުރެއްވުމުން ކަމުގައެވެ. އަދި ރިޔާޒުގެ ފޯނު ފުލުހުނަށް ދިނުމަށް ފުރަތަމަ އެކަމަށް އިންކާރު ކުރެއްވި ކަމަށާއި ފޯނު ހުޅުވަން ފަހުން ދެއްވީވެސް ނުބައި ޕިން ކޯޑެއް ކަމަށް ރައީސް ވިދާޅުވިއެވެ.
އެ ބަޔާނުގައި ބުނެފައިވަނީ ކޯޓު އަމުރަކާއިއެކު ފުލުހުން އައިސް ފޯން ދިނުމަށް ބުނުމުން ވަގުތުން ރިޔާޒު ފޯނު ހަވާލުކުރި ކަމަށާއި އަދި ޕިން ކޯޑް ދޭން ރިޔާޒް ފުރަތަމަ ދެކޮޅު ހެއްދެވީ ކޯޓު އަމުރުގައި ޕިންކޯޑް ދިނުމަށް ނެތުމުން ކަމަށާއި ކޯޓުން އެންގުމުން ރިޔާޒު ޕިންކޯޑް ދެއްވިކަމަށްވެސް އާއިލާގެ ބަޔާނުގައި ވެއެވެ.
ރިޔާޒު ހައްޔަރުކޮށްފައިވަނީ މަޖިލީހުގައި ރައްޔިތުންގެ އަޑު އިއްވުން ބަންދު ކުރުމަށް ކަމަށާއި ރިޔާޒު ކުރައްވަމުން ގެންދަވާ އިސްލާހީ މަސައްކަތަށް ހުރަސްއެޅުމަށް ކަމަށްވެސް އާއިލާއިން ނެރުނު ބަޔާނުގައި ވެއެވެ.
"އަޅުގަނޑުމެންގެ އާއިލާގެ ފަރާތުން ދެކޭ ގޮތުގައި ޢަބްދުﷲ ރިޔާޒް ހައްޔަރުކޮށް ބަންދުކޮށްފައިވަނީ އިދިކޮޅު ޕާޓީތަކުން ކުރާ އިސްލާޙީ މަސައްކަތުގައި ޢަބްދުﷲ ރިޔާޒް އަދާކުރާ ދައުރަށް ހުރަސް އަޅައި ރައްޔިތުންގެ މަޖިލީހުގެ ސާފު އަޣްލަބިއްޔަތު ސަރުކާރާއި އިދިކޮޅު ފަރާތްތަކަށް ލިބުމުން ރައްޔިތުންގެ މަޖިލީހުގައި ރައްޔިތުންގެ އަޑު އިއްވުމުގެ ފުރުސަތު ބަންދުކުރުމަށްޓަކައެވެ. އަދި ރައީސުލްޖުމްހޫރިއްޔާ ދައުލަތުގެ އެންމެ އިސްވެރިޔާގެ ހައިސިއްޔަތުން ރަސްމީގޮތުން ރައްޔިތުންނާ މުޚާތަބުރައްވާ ވާހަކަފުޅު ދައްކަވާ ފަހަރުތަކުގައި ރައްޔިތުން އިންތިޚާބުކޮށްފައިވާ މެމްބަރަކާ ގުޅޭގޮތުން މިފަދަ ހަޤީޤަތާ ޚިލާފު އިލްޒާމު އަޅުވައި ދޮގުވާހަކަ ދައްކަވަނީ ޢަބްދުﷲ ރިޔާޒާ މެދު ރައްޔިތުންގެ ހިތުގައި ނުރަނގަޅު ތަސައްވަރެއް އުފައްދައި ސިޔާސީ ގޮތުން ވަކި ކަހަލަ މަންފާއެއް ހާސިލްކުރުމަށެވެ." ރިޔާޒުގެ އާއިލާއިން ނެރުނު ބަޔާނުގައި ބުނެފައިވެއެވެ.
