ރާއްޖޭގެ ޙާލަތާއިމެދު ޔޫރަޕިއަން ޕާލަމެންޓްގެ މެމްބަރުން ކަންބޮޑުވެ، ޚިޔާލު ފާޅުކުރަނީ
20 ޖުލައި 2018 | ހުކުރު 18:45ރައީސް ޔާމީން އިންތިޚާބުން ބަލިކުރުން ނޫން ގޮތެއް ދިވެހިންނަށް ނެތް
ޔޫރަޕިއަން ޕާލަމެންޓް މެމްބަރ ނިކޮލަސް ބޭ
ރާއްޖޭގައި އިންސާނީ ހައްޤުތަކަށް އަރައި، އިންސާފުވެރި އިންތިޚާބެއް ބޭއްވުމަށް ހުރަސް އަޅާ ފަރާތްތަކާއިމެދު ވިލާތުގެ އިއްތިޙާދުން ދަތިކުރުމުގެ ފިޔަވަޅު އަޅަން ނިންމައި، އަޅާނެ ފިޔަވަޅުތައް ނިންމާފައިވާއިރު، ރާއްޖޭގެ ޙާލަތު ބަދަލުކުރުމަށް ސަރުކާރުން މަސައްކަތްކުރަމުން ނުދާތީ ވިލާތުގެ އިއްތިޙާދުގެ ޤާނޫނު ހަދާ މަޖިލީހުގެ މެމްބަރުން ކަންބޮޑުވުން ފާޅުކުރައްވަމުން އެބަގެންދަވައެވެ.
ވިލާތުގެ އިއްތިޙާދުން ރާއްޖެއާ ދެކޮޅަށް ފިޔަވަޅު އަޅަން ނިންމީ ރާއްޖޭގެ ސަރުކާރަށް އެންގުމަށް ފަހު ކަމަށާއި އަދިވެސް ރާއްޖޭގެ ހާލަތު ބަދަލުނުވާ ކަމަށް ޔޫރަޕިއަން ޕާލިމެންޓުގެ މެމްބަރު ތޯމަސް ޒެޗޮވްސްކީ ވިދާޅުވެފައި ވަނިކޮށް، އެމަޖިލީހުގެ އެހެން މެމްބަރެއްކަމަށްވާ ނިކޮލަސް ބޭ ވަނީ ރައީސް ޔާމީން އިންތިޚާބުން ބަލިކުރުން ނޫން ގޮތެއް ދިވެހިންނަށް ނެތްކަމަށް ވިދާޅުވެފައެވެ.
ފަރަންސޭސީވިލާތަށް ނިސްބަތްވެވަޑައިގަންނަވާ ބޭ ވިދާޅުވީ ރައްޔިތުންގެ ބާރާއި، ޤާނޫނުގެ ވެރިކަމާއި އިންސާފަކީ ރައީސް ޔާމީން އެކަމާ މާ ވިސްނަވާ ކަންކަމެއް ނޫންކަމަށާއި، އެހެންކަމުން ދިވެހިންނަށް އޮތް ގޮތަކީ އެމަނިކުފާނު ވޯޓުން ބަލިކުރުންކަމަށެވެ. އަދި ރައީސް ޔާމީނާއި ދެކޮޅަށް ތުހުމަތުކުރެވޭ ކޮރަޕްޝަނާއި، ފަސާދައިގެ އަމަލުތަކުގެ އިތުރުން ޚުދުމުޚުތާރު އަމަލުތަކާއިމެދު ވިލާތުގެ އިއްތިޙާދުން އަޅާނުލިޔަސް ޤާނޫނުގެ ވެރިކަމާއި އިންސާފުވެރި ފަނޑިޔާރުގެއެއް ޤާއިމްކުރުމަށް ރައީސް ޔާމީން މާބޮޑު ވިސްނުންފުޅެއް ނުގެންގުޅުއްވުމަކީ ރާއްޖޭގެ ހަމަޖެހުމާއި ޑިމޮކްރަސީއަށް އޮތް ބޮޑު ބިރެއްކަމަށް ނިކޮލަސް ބޭ ސިފަކުރެއްވިއެވެ. އަދި ރައްޔިތުންގެ ހެވާއި ލާބައަށްވުރެ ބޮޑަށް ރައީސް ޔާމީން އިސްކަން ދެއްވަނީ އެމަނިކުފާނުގެ މުއްސަނދިކަމަށްކަމަށް އޭނާ ސިފަކުރެއްވިއެވެ.
ވިލާތުގެ އިއްތިޙާދުގެ ޤާނޫނު ހަދާ މަޖިލީހުގެ މެމްބަރުންގެ އެކި ލިޔުއްވުންތައް ޝާއިއުކުރާ އީޕީ ޓުޑޭގައި ލިޔުއްވާފައިވާ ލިޔުއްވުމެއްގައި ހުކުރު ދުވަހު ނިކޮލަސް ބޭ ވަނީ ރާއްޖޭގެ ސިޔާސީ މަސްރަހުގައި ރައީސް ޔާމީންގެ ވެރިކަމުގައި ހިނގާފައިވާ ޑިމޮކްރަސީއާއި ޚިލާފު ގިނަ ކަންތައްތަކަށް އަލިއަޅުއްވާލައްވާފައެވެ.
ނިކޮލަސް ބޭ އާއި ތޯމަސް ޒެޗޮވްސްކީގެ އިތުރުންވެސް ވިލާތުގެ އިއްތިޙާދުގެ ޤާނޫނު ހަދާ މަޖިލީހުގެ ގިނަ މެމްބަރުންތަކެއް ރާއްޖޭގެ މައްސަލައިގައި ކަންބޮޑުވެ މިހާރުވެސް އަދި މީގެ ކުރިންވެސް ވާހަކަ ދައްކާފައިވެއެވެ. ވިލާތުގެ އިއްތިޙާދުގެ ޚާރިޖީ ވަޒީރުންގެ ކައުންސިލުން ރާއްޖޭގެ ވަކިވަކި ފަރާތްތަކާއި ވަކިވަކި މުއައްސަސާތަކާއިމެދު ފިޔަވަޅު އެޅުމަށް ނިންމީ މިއަހަރުގެ ފެބްރުއަރީ މަހުގެ ފަހުކޮޅު، ރާއްޖޭގެ ޙާލަތު އިސްލާހު ނުވެއްޖެނަމަ ފިޔަވަޅު އެޅުމަށް ގޮވާލާ ވިލާތުގެ އިއްތިޙާދުގެ ޤާނޫން ހަދާ މަޖިލީހުން ޤަރާރެއް ފާސްކުރުމާއި ގުޅިގެންނެވެ. އަދި އީޔޫ ފޮރިންގ އެފެއަރޒް ކައުންސިލްގެ ނިންމުން ބިނާކޮށްފައިވަނީ އީޔޫ ޕާލަމެންޓުން ރާއްޖޭގެ އިންސާނީ ހައްޤުތަކުގެ ޙާލަތު ރަނގަޅު ކުރުމަށާއި، މިނިވަން އިންސާފުވެރި އިންތިޚާބެއް ކަށަވަރުކޮށް، އިންސާފު ޤާއިމްކޮށް، ސިޔާސީ ހައްޔަރީން ދޫކޮށްލުމަށް ގޮވާލާ ނެރުނު ޤަރާރުގައިވާ ކަންކަން އިސްލާހުވެފައިވާ މިންވަރަށެވެ. މިއިން އެއްވެސް ކަމެއް އިސްލާހުނުވެ، ކަންތައް އިތުރަށް ގޯސްވުމަކީ މިފިޔަވަޅު އަޅަން ޖެހުނު ސަބަބެވެ.
