ނިމިދިޔަ އަހަރު ސާނަވީ އިމްތިހާނު ނިންމި ކުދިންގެ ތެރެއިން އެންމެ ރަނގަޅު ނަތީޖާ ހޯދި ދަރިވަރުންނަށް އިނާމު ދިނުމުގެ ޖަލްސާ ބާއްވާފިއެވެ.

މިދިޔަ އަހަރު  އޯ ލެވެލް ހެދި ދަރިވަރުންގެ ތެރެއިން ރާއްޖޭގެ ގަދަ 10 ގައި 375 ދަރިވަރަކު ވަނީ ހިމެނިފައެވެ. އަދި 8 މާއްދާއިން އޭ ސްޓާ ހޯދައިގެން ހަ ދަރިވަރަކު ވަނީ ގައުމީ ގަދަ 10ގެ އެއްވަނަ ހޯދައިފަ އެވެ. އެ ދަރިވަރުންނަށް ތައުލީމީ ފަންޑުން ސްކޮލަޝިޕް ވަނީ ދީފައިވެ އެވެ.

ދުނިޔޭގެ ގަދަ 10ގައި މިދިޔަ އަހަރު ހިމެނުނީ 35 ދަރިވަރަކެވެ.އޯ ލެވެލްގައި ރަނގަޅު ނަތީޖާ ހޯދި ދަރިވަރުންނަށް އެވޯޑު ދިނުމަށް ދަރުބާރުގޭގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން އެޑިއުކޭޝަން މިނިސްޓަރު ޑރ. އާއިޝަތު ޝިހާމް ވިދާޅުވީ އެއްވެސް ކުއްޖަކު ބާކީނުކޮށް ކިޔަވައިދޭން ފެށުމުން، އޯ ލެވެލްގައި ދަރިވަރުން ހޯދަމުން އަންނަ ނަތީޖާ ރަނގަޅުވެފައިވާ ކަމަށެވެ. އެގޮތުން  ފާއިތުވި ހަތަރު އަހަރުގެ ތެރޭގައި، އޯ ލެވެލް ނިންމި ދިހަ ދަރިވަރުންގެ ތެރެއިން އަށް ދަރިވަރުންނަކީ މަދުވެގެން ފަސް މާއްދާއިން ފާސްވި ދަރިވަރުން ކަމަށް އައިޝަތު ޝިހާމް ވިދާޅުވިއެވެ.

މިދިޔަ އަހަރު ފަސް މާއްދާއިން ފާސްވި ދަރިވަރުންގެ އަދަދު އުޅެނީ 77 ޕަސެންޓުގައެވެ. ނަމަވެސް މިނިސްޓްރީން އަމާޒު ހިފާފައި ހުރީ ފަސް މާއްދާއިން ފާސްވާ ދަރިވަރުންގެ އަދަދު 60 ޕަސެންޓަށް ހެދުމަށެވެ.އެހެންކަމުން ފަސް މާއްދާއިން ފާސްވި ދަރިވަރުންގެ އަދަދު އިތުރުވެފައިވާ ކަމަށް މިނިސްޓްރީން ބުންޏެވެ.

ބީޓެކް އިން އޯ ލެވެލް ހެދި ދަރިވަރުންގެ ތެރެއިން ގައުމީ ގަދަ 10 ގައި ތިން ދަރިވަރަކު ވެސް މިދިޔަ އަހަރު ހިމެނިފައި ވެ އެވެ. މިއީ ބީޓެކް ހެދި ދަރިވަރަކު ގަދަ 10 ގައި ހިމެނުނު ފުރަތަމަ ފަހަރެވެ. އެ ދަރިވަރުންނަކީ ހިރިޔާ ސްކޫލުގެ ފާތިމަތު ޖަސްރާ ޖަވާދާއި، އިސްކަންދަރު ސްކޫލުގެ ދަރިވަރު އަހުމަދު އަލްހާން އިބްރާހިމް، ފޭދޫ ސްކޫލުގެ އާމިނަތު އީމާނެވެ.

ތައުލީމީ އުގެނުމުގައި  ކާމިޔާބު ނުވާނެ ކަމަށް ބަލައި ސްކޫލުތަކުން އުއްމީދު  ދޫކޮށްލާފައިވާ އެތައް ހާސް ކުދިންނަކަށް ސަރުކާރުން  އިސްނަގައިގެން ދަސްވާރާއި ބީޓެކް ޕްރޮގްރާމްގެ ތެރެއިން ކާމިޔާބު ހޯދައިދީ އެ ދަރިވަރުންގެ މުހިއްމު ކަމާއި ހުރި ހުނަރު އާއިލާއާ މުޖުތަމައުއަށް ހާމަކޮށްދެވުނު ކަން އެއީ ސަރުކާރަށ ްކުރެވުން ވަރަށް  މުހިންމު މަސައްކަތެއް ކަމަށް މިނިސްޓަރ ވިދާޅުވިއެވެ.