ޢަދާލަތު ޕާޓީގެ އިލްމުވެރިންގެ މަޖިލީހުގެ ރައީސް ޝައިޚް އިލްޔާސް ހުސައިން އެޕާޓީގެ އާއްމު ބައެއް މެމްބަރުންނާ ބައްދަލުކުރައްވައިފިއެވެ.

އަންގާރަ ދުވަހުގެ ރޭ މި ބައްދަލުކުރެއްވުން އޮތީ އަދާލަތު ޕާޓީގެ އޮފީހުގައެވެ. މި ބައްދަލުވުމުގައި އެޕާޓީގެ އާއްމު ބައެއް މެމްބަރުންނާއި އިސް ބައެއް ބޭފުޅުން ބައިވެރިވެވަޑައިގަތެވެ.  އެހެން ނަމަވެސް މި ބައްދަލުވުމުގެ މާބޮޑު ތަފްޞީލެއް އެޕާޓީން ހާމަކޮށްފައެއް ނުވެއެވެ. ޝައިޚް އިލްޔާސް ރާއްޖެ ވަޑައިގެންފައި ވަނީ ޤައުމުން ބޭރުގައި ގިނަ ދުވަސްތަކެއް ވަންދެން ހުންނެވުމަށް ފަހުގައެވެ.

ގުޅިފައިވާ ޕާޓީތަކާ އެކު ޢަދާލަތު ޕާޓީން ވެސް މަސައްކަތްކުރަމުންދާއިރު، އެޕާޓީގެ އިލްމުވެރިންގެ މަޖިލީހުގެ ރައީސް ޝައިޚް އިލްޔާސް އާއި، ޕާޓީގެ ރައީސް ޝައިޚް އިމްރާން އަބްދުﷲ އެމަނިކުފާނާ އެކު ވަޑައިގަތުމަށް ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީންގެ ރަނިންގ މޭޓެއްގެ ގޮތުގައި ނުކުމެވަޑައިގެން ހުންނެވި ޑރ. މުހައްމަދު ޝަހީމް އަލީ ސަޢީދު ވަނީ ދާދި ފަހުން ގޮވާލައްވާފައެވެ. އަދާލަތު ޕާޓީއިން އިލްޔާސް އާއި އިމްރާން އެކަނި ވަޑައިގަތަސް ފުދޭ ކަމަށް ޝަހީމް ވިދާޅުވިއެވެ.

އެހެން ނަމަވެސް އިމްރާނެކޭ އެއްފަދައިން އިލްޔާސް ވެސް ވަނީ އިދިކޮޅު ކެންޑިޑޭޓް އިބްރާހިމް މުހައްމަދު ސޯލިޙާއި އެމަނިކުފާނުގެ ރަނިންގ މޭޓް ފައިސަލް ނަސީމް އެންޑޯރޒް ކުރައްވާފައެވެ.