ރައީސް ޔާމިންގެ ސަރުކާރުން އުޅެނީ ހާއްސަ އެހީއަށް ބޭނުންވާ މީހުންގެ ވޯޓު ފޭރިގަނެ ވަގަށް ނަގަން: މަހްލޫފް

ހާއްސަ އެހީއަށް ބޭނުންވާ ފަރާތްތަކަށް އެންމެ އޯގާތެރި ކަމަށް ބުނާ އަދި އުމުރުން ދުވަސްވީ ފަރާތްތަކަށް އެންމެ އަޅާލާ ކަމަށް ބުނާ ރައީސް އަބްދުﷲ ޔާމިންގެ ސަރުކާރުން އުޅެނީ އެ ފަރާތްތަކުގެ ވޯޓު ވެސް ފޭރިގަންނަން ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް ވިދާޅުވެއްޖެއެވެ.

އަންގާރަ ދުވަހު މަހްލޫފް ޓްވިޓާ މެދުވެރިކޮށް އިތުރަށް ވިދާޅުވީ ރައީސް އަބްދުﷲ ޔާމިންގެ ސަރުކާރުން އެންމެ ފަހުން ހާއްސަ އެހީއަށް ބޭނުންވާ ފަރާތްތަކާ އަދި އުމުރުން ދުވަސްވީ ފަރާތްތަކުގެ ވޯޓުވެސް އުޅެނީ ފޭރިގަތުމުގެ އިތުރުން ވަގަށްވެސް ނަގަން ކަމަށެވެ. އަދި މި ޖަރީމާ ހުއްޓާލަން ޖެހޭ ކަމަށްވެސް މަހްލޫފް ވިދާޅުވިއެވެ.

މަހްލޫފް މިހެން ވިދާޅުވިއިރު ޖިސްމާނީ ގޮތުން ނުކުޅެދުންތެރިކަން ހުންނަ މީހުންގެ ވޯޓު ކަރުދާހުގައި އިލެކްޝަންސް ކޮމިޝަނުގެ އޮފިޝަލުން ފާހަގަ ޖަހައިދޭ ގޮތަށް އެ ކޮމިޝަނުން ވަނީ ނިންމާފައެވެ. އިލެކްޝަންސް ކޮމިޝަނުން ބުނެފައި ވަނީ ސެޕްޓެމްބަރު 23ގައި ބާއްވާ ރިޔާސީ އިންތިހާބުގައި، ޖިސްމާނީ ގޮތުން ނުކުޅެދުންތެރިކަން ހުންނަ މީހުންނަށް ވޯޓު ލުމަށް އެހީތެރިވާނީ ވޯޓު ލާ މަރުކަޒުގެ އިސްކޮށް ހުންނަ މީހާ ކަނޑައަޅާ އިލެކްޝަންސްގެ އޮފިޝަލެއް ކަމަށެވެ. ކުރިން އޮންނަ އުސޫލަކީ ޖިސްމާނީ ނުކުޅެދުންތެރިކަން ހުންނަ މީހުންނަށް ފާހަގަ ޖަހައިދެނީ އޭނާގެ އެހީތެރިއަކަށް ހަމަޖައްސާފައިވާ މީހާ އެވެ.

މިކަމާ ގުޅިގެން ގުޅިފައިވާ އިދިކޮޅު ސިޔާސީ ޕާޓީތަކުން ދަނީ ވަރަށް ބޮޑަށް އިލެކްޝަންސް ކޮމިޝަނަށް ފާޑުކިޔަމުންނެވެ. ޖިސްމާނީ ގޮތުން ނުކުޅެދުންތެރިކަން ހުންނަ މީހުންގެ ވޯޓު ކަރުދާހުގައި އިލެކްޝަންސް ކޮމިޝަނުގެ އޮފިޝަލުން ފާހަގަ ޖަހައިދޭ ގޮތަށް އެ ކޮމިޝަނުން ނިންމުމަކީ ނުކުޅެދުންތެރިކަން ހުންނަ މީހުންގެ ހައްގުތަކަށް އަރައިގަތުން ކަމަށް ގުޅިފައިވާ އިދކޮޅު ސިޔާސީ ޕާޓީތަކުގެ ރިޔާސީ ކެންޑިޑޭޓް، އިބްރާހިމް މުހައްމަދު ސޯލިހުގެ ތަރުޖަމާނު މާރިޔާ އަހްމަދު ދީދީ ވަނީ ވިދާޅުވެފައެވެ. ސެޕްޓެމްބަރު 23 ގައި އޮންނަ ރިޔާސީ އިންތިހާބުގައި 263،000 މީހުންނަށް ވޯޓު ލުމުގެ ހައްގު ލިބިގެންވާ އިރު، 452 ވޯޓު ފޮށި ބެހެއްޓުމަށް ވަނީ ހަމަޖެހިފަ އެވެ.